S’aeroportu de Casteddu-Su Masu at serradu su mese de trìulas cun una performance etzetzionale, crompende sa prima borta su traguardu de sos 600.000 passigeris, cunsiderende siat sos arribos siat sas partèntzias. Custu resurtadu at superadu su primadu pretzedente, istabilidu in s’austu de su 2019, cunfirmende una crèschida costante de su tràficu aèreu in s’iscalu sardu.

Ocannu, giai sos meses de maju e làmpadas ant evidentziadu tzifras bonas, cun 443.775 e 525.698 passigeris, ma est istadu su mese de trìulas a signare una bortada ispantosa, totalende su bellu de 614.674 passigeris. Custu at fatu lòmpere su totale de sos biagiadores durante su cumintzu de s’istiu (maju-trìulas) a 1.584.147 in totu.

Sa crèschida de s’afluèntzia est galu prus arta si cunsideremus su cunfrontu annu cun annu de sos primos tres meses de s’istade 23, ue si sunt registrados aumentos significativos in sos volùmenes de tràficu subra sas tratas internatzionales. Maju at registradu una crèschida de s’11,8%, làmpadas de su 10,4%, e trìulas de s’11,9%. Unu datu bonu chi dimustrat comente Casteddu-Su Masu siat semper prus apretziadu comente iscalu internatzionale de riferimentu.

Analizende sos datos prus in sa minuda, in trìulas 2023, bene 412.762 passigeris ant boladu in sas 41 rotas natzionales, mentras 201.912 biagiadores ant seberadu sas 50 tratas internatzionales. Custu sutalìniat s’importu de s’aeroportu sardu siat pro sos collegamentos domèsticos, siat pro cuddos internatzionales, oferende una gama ampra de sèberos de biàgiu a sos passigeris.

Sa tendèntzia positiva sighit fintzas in su perìodu dae ghennàrgiu a trìulas 2023. In custu ratu de tempus s’aeroportu at acollidu in manera cumplessiva 2.702.493 passigeris. Su datu rifletet una crèschida importante de su 13,9% respetu a su matessi perìodu de su 2022 e una crèschida de su 3,9% respetu a ghennàrgiu-trìulas 2019, dimustrende sa costàntzia de sa crèschida de su tràficu aèreu in sos annos.

Custos resurtados ant dadu otimismu a sos operadores de su setore e a sas autoridades aeroportuales, in bista de sa segunda parte de s’istajone istiale 2023. In totale, s’aeroportu de Casteddu-Su Masu bantat  91 collegamentos diretos intre 18 Istados, operados dae 23 diversas cumpangias aèreas. Custa rete manna de destinatziones internatzionales faghet de s’aeroportu sardu una meta importante siat pro sos turistas siat pro sos biagiadores de afares, contribuende in manera significativa a sa crèschida econòmica e a su turismu in sa regione.

Nointames sa resessida de s’aeroportu de Casteddu-Su Masu, est importante sighire a garantire istandard de seguridade artos e calidade de sos servìtzios pro satisfàghere sa crèschida de sa dimanda e mantènnere sa fidùtzia de sos passigeris. Sa gestione e s’isvilupu infrastruturale, paris cun una pianificatzione sèria de sas rotas, ant a èssere fundamentales pro sustentare custa crèschida costante e consolidare sa positzione de Casteddu-Su Masu comente unu de sos aeroportos prus importantes e dinàmicos de s’Itàlia e de s’Europa.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa fine drammatiga de su zovanu benturzu Arricelli, pustis de su bolu attrividu dae sa Sardigna a sa Sicilia, nos ammentat sos arriscos de sos movimentos de ispartinadura de sos zovanos alabros.

Su destinu sou, interrumpidu cando fit bolande supra su mare in mesu de Punta Raisi e San Vito lo Capo, nos ponet daenanti a sa debilesa de custas creaduras magniffigas, in d’unu mundu semper pius bortadu a sos interessios de sos
omines.

Arricelli fit unu de sos 15 benturzos de sa colonia noa de su Sarrabus- Gerrei, e sa perdida sua est una disgrassia non solu po sa comunidade iscentifica chi lu compudabat, ma puru po tottus sos chi appretziant e si affuscant de sa rimunida de sos animales arestes.

Bell’e chi non tottu est perdidu. In su mentres chi pranghimos sa perdida de Arricelli, semus animados dae sos sutzessos e dae sa resistentzia de sos atteros membros de sa colonia de Villasalto. Su benturzu Sannicolò sighit s’iscumbattamentu de sa Sardigna, ispinghindesi cun atza in medas regiones de s’isula, cun su bentu chi che lu diat leare fintzas in Corsica.

A sa mattessi manera, sos atteros benturzos commente Sinnai,Ballao,Gerrei,Armungia,Quirra e Muravera, mustrant unu adattamentu chi surprendet meda, addurante po su pius tempus in sa sura de sos Sette Frades, ma iscumbattande puru iscroccas pius attesu, ma torrande semper a sa sicuresa de sa gabbia Forestas. S’azzudu de sos pastores, commente sos frades Aledda, est importante meda po garantire unu approvistamentu de cosa de pappare po sos benturzos.

Su rolu insoro non solu assicurat chi custas creaduras ispantosas potant bivere, ma azzuat puru a su sutzessu totale de su disignu po conservare sos benturzos, apparande unu ispartimentu ecologicu de sas carasas chi faghet bene siat a s’ambiente siat a sa comunidade locale.

In su mentre chi pranghimos sa perdida de Arricelli, rennovamos s’impignu nostru po diffendere e preservare sas zenias minettadas, pro itte atteras disgrassias commente custa si potant iscansare e chi su chelu sigat a essere surcadu dae sas alas de custos alabros magnifficos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22