Naschida in Casteddu 64 annos a oe, aiat fotografadu sos mannos de sa mùsica. Una de sas fotos suas prus famadas est cussa fata a Maria Lai cun sa pistola. In cudda imàgine si podet bìdere su talentu de Daniela Zedda, sa fotògrafat casteddaja morta custu mangianu a 64 annos. Pro Daniela su retratu fiat chirca e cuntatu, un’arte de su contadu prus atenta a sa sustàntzia umana chi a su fàbricu estèticu. “Iseto- aiat naradu in una de sas raras essidas televisivas suas- su momentu chi sas persones s’interiorizant, rinùntziant a sa fatzola e si mustrant comente sunt a beru”.

Aiat cumintzadu a giòvana pro cumbinatzione in una Casteddu ingiogatzada dae sos isteddos de su jazz. Ùnica pitzoca in unu mundu totu de òmines, giraiat cun totu sos aians suas pronta a tirare fotos a sos artistas chi beniant a sonare a Casteddu.

Dae sos mostros sacros de sa mùsica diat èssere istadu naturale pro las s’iscostiare in su mundu de s’arte e de sa literadura, mutida dae sos fèstival culturales sardos, comente L’isola delle storie de Gavoi, posca Tuttestorie in Casteddu. Sos iscatos suos ant fatu su giru de su mundu, collidos in sas mustras de New York (fintzas in su palatzu de su New York Times), de Parigi, de Praga e de Budapèst.

Cheriat bìvere in Casteddu, ue fiat naschida, ma sas fotografias suas sunt istadas rechertas dae sos cuotidianos natzionales prus importantes. Su talentu suo l’at fata traballare finas cun rivistas de moda, de architetura, de arte e cuotidianos de totu su mundu. Fiat de pagas paràulas. In s’ùrtimu perìodu de sa vida sua aiat seberadu de non fàghere prus intervistas o essidas in sos giornales, e aiat detzisu de si tènnere probe petzi unas cantas persone, cussas chi pro issa sunt istadas sas prus importantes de su traballu e de sa vida privada sua.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Pinnettos sardos, furriadorzos antigos chi contant sa vida de sos pastores.

Sos pinnettos, sunt intre sas testimonias prus beras de sa Sardigna de campagna e contant una manera de bivere ligada in manera funguda a sa pastoria e s’iscrocca. Ispartos mescamente in sas zuras de intro de s’isula, in manera particulare comente s’Ozzastra, beniant fraigados dae sos pastores comente furriadorzos in su mentres chi passaiant tempus meda in campagna imparis cun sos masones. S’istruttura insoro est simple ma zeniosa:tenent una forma tunda cun d’una base fatta cun pedras e una copertura fatta de rampos e frastamazas intritzadas, a s’ispissu de ghiniperu, impittande solu materiales naturales chi si agattaiant in cussu logu.

Intro, su logu est essentziale ma funtzionale, chi bastaiat pro si amparare dae su frittu,dae su bentu e s’abba,coghinare e costoire sos istrumentos de tribagliu,chena mai essere pensados comente domos abbarrantes ma comente puntos de accottu ligados a sa vida pastorale.

Custos fraigos naschent dae una connoschentzia funguda de s’ambiente e de sos medios suos, inube nudda capitat pro casu: su seperu de sos materiales,sa forma,s’orientamentu, tottu rispondet a esigentzias pratigas e a sa netzessidade de si adattare a cundissiones a s’ispissu diffitziles.Sos pinnettos sunt duncas non solu unu furriadorzu fisicu,ma fintzas unu esempru beru de ecchilibriu intre omine e natura, fraigados chena trastoccare sa bista ma intregandesi intre issa in manera perfetta.

Ancora oe sunt presentes in medas zuras de sa Sardigna, calicunu cusservadu bene, atteros sinzados dae su tempus, e sighint a contare un’istoria fatta de tribagliu, sacriffissiu e vida de donzi die attesu dae sas biddas.In sos urtimos annos est creschida s’attentzione a banda de sa tutela e balorizzassione insoro, cun interventos de recuberu e insertu in caminos naturalisticos e culturales, signu de unu rennoadu attuamentu de su balore insoro istoricu e de s’identidade.

Sos pinnettos non sunt solu fraigos de su passadu, ma conas de una cultura chi at ischidu resistire e si adattare in sos seculos.Costoire custa istrutturas cheret narrere de mantennere biva sa memoria de unu mundu chi at formadu s’identidade de sa Sardigna e chi fintzas oe podet indittare meda.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22