Una busta serrada, imbiada dae su comunu de Battipaglia, a probe de Salerno e indiritzada a su presidente de sa giunta regionale de s’Emilia Romagna, Stefano Bonaccini. In intro 135 èuros a manu e unu billete cun sa frase: «Pro s’Emilia Romagna, cun totu su coro meu». A los imbiare est istadu unu betzu de 76 annos chi dae domo sua at seberadu de dare una manu a sos alluvionados in custa manera.

«Unu gestu istraordinàriu chi mi prenat su coro e chi balet prus de milli paràulas», at cummentadu su presidente Bonaccini, agatende pro un’istante su risitu mentras s’Emilia Romagna sighit a s’agatare in una situatzione drammàtica. Sunt 36.000 sas persones isfolladas, a su mancu 305 sas franadas contadas mentras sos caminos  serrados sunt belle 500. Abarrat s’abbìgiu ruju de sa Protetzione Tzivile: in sa die de cras, abarrat s’abbìgiu ruju chi balet pro sas prenas de sos rios in sas provìntzias de Ferrara, Bologna, Ravenna, Forlì-Cesena, Rimini.

«Est commovente chi unu betzu de 75 annos siat bighinu a chie nde tenet bisòngiu, in unu momentu gasi difìtzile pro custa regione», at cummentadu sa sindaca de Battipaglia, Cecilia Francese. «Pro mene est un’onore chi unu cuntzitadinu nostru apat chertu manifestare, cun custu gestu, sa solidariedade sua in sos cunfrontos de chie in custu momentu est in dificultade». Solidariedade chi arribbat fintzas dae sas paràulas de Papa Francesco dae Pratza Santu Pedru: «Rinnovu de coro sa bighinàntzia mea a sa populatzione de s’Emilia Romagna, corfida in custas dies de sas aundaduras».

Su Cussìgiu de sos ministros pro aprovare providimentos apretosos indiritzados a s’alluvione est prevìdidu pro martis 23 maju un’atopu. Sos disacatos a s’economia mannos meda. Segundu Coldiretti «s’alluvione at cumpromìtidu produtziones chi balent 1,5 milliardos e sunt andados pèrdidos 400 milliones de chilos de trigu».

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

In sa bidda de São Lourenco do Bairro, in su nord-ovest de su Portugallu, sos residentes ant assistidu a un’iscena in sa die de su 10 de cabudanni. Custu chi in comintzu pariat un’alluvione s’est riveladu èssere calicuna cosa meda prus  prus ispantosa: unu riu de binu ruju at invàdidu sos caminos de su bidditzolu.

S’orìgine de custa aundadura est istada sa segadura de duos serbatojos de sa distilleria Levira, un’azienda nòdida in sa zona. Custu intzidente at causadu s’essida de binu ruju, cun una cantidade impressionante de 2,2 milliones de litros chi at curtu fatu de sos caminos de su bidditzolu. Sos vìdeos de s’eventu insòlitu ant tzirculadu a sa lestra in sas retes sotziales, atirende s’atentzione de persones de totu su mundu.

Sos abitantes de su logu sunt abarrados abebelecados biende custu binu chi bastaiat pro prenare belle una piscina olimpiònica. Nointames s’ispantu initziale, siat s’azienda chi sas autoridades locales ant afrontadu in deretura sa situatzione.

S’azienda Levira s’at leadu deretu sa responsabilidade de sos disacatos causados a sa comunidade locale.  sSos vìgiles de su fogu locales sunt intervènnidos in tempus pro evitare chi su binu arrivare a su riu Certima. Custa atzione at contribuidu a prevènnere unu potentziale disastru ambientale, ca una cantidade gasi manna de binu ruju in su riu diat àere tentu cunsighèntzias malas meda.

Nointames s’intzidente, unos cantos espertos ant afrontadu sa situatzione in modu insòlitu, ponende in lughe sos benefìtzios potentziales de su binu ruju pro sa salude umana. Segundu s’epidemiòlogu britànnicu Tim Spector, bufare una variedade de binu ruju cun moderatzione podet tènnere efetos positivos subra de s’echilìbriu de s’istentina e subra de su benèssere mentale. Custos efetos benefìtzios sunt atribuidos a su ruolu antiossidante acumpridu dae sos polifenolos, unu grupu de cumpostos naturales presentes in sa sarmenta, in particulare in s’ua impreada pro sa produtzione de binu. Sos polifenolos sunt nòdidos pro sas propiedade issoro antiossidantes e antinfiammatòrias chi podent contribuire a su benèssere cumplessivu.

Mancari s’isvilupu de sos eventos e su disacatu ambientale potentziale evitadu, custa istraordinària aundadura de binu at atiradu s’atentzione subra sa capatzidade umana de afrontare sos disafios in modos creativos e positivos. Sa comunidade de São Lourenco do Bairro at dimustradu resilièntzia cara a custa situatzione istraordinària, mentras sos espertos ant torradu a nàrrere s’importu de consumare su binu cun moderatzione pro tènnere benefìtzios pro sa salude.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”