Una busta serrada, imbiada dae su comunu de Battipaglia, a probe de Salerno e indiritzada a su presidente de sa giunta regionale de s’Emilia Romagna, Stefano Bonaccini. In intro 135 èuros a manu e unu billete cun sa frase: «Pro s’Emilia Romagna, cun totu su coro meu». A los imbiare est istadu unu betzu de 76 annos chi dae domo sua at seberadu de dare una manu a sos alluvionados in custa manera.

«Unu gestu istraordinàriu chi mi prenat su coro e chi balet prus de milli paràulas», at cummentadu su presidente Bonaccini, agatende pro un’istante su risitu mentras s’Emilia Romagna sighit a s’agatare in una situatzione drammàtica. Sunt 36.000 sas persones isfolladas, a su mancu 305 sas franadas contadas mentras sos caminos  serrados sunt belle 500. Abarrat s’abbìgiu ruju de sa Protetzione Tzivile: in sa die de cras, abarrat s’abbìgiu ruju chi balet pro sas prenas de sos rios in sas provìntzias de Ferrara, Bologna, Ravenna, Forlì-Cesena, Rimini.

«Est commovente chi unu betzu de 75 annos siat bighinu a chie nde tenet bisòngiu, in unu momentu gasi difìtzile pro custa regione», at cummentadu sa sindaca de Battipaglia, Cecilia Francese. «Pro mene est un’onore chi unu cuntzitadinu nostru apat chertu manifestare, cun custu gestu, sa solidariedade sua in sos cunfrontos de chie in custu momentu est in dificultade». Solidariedade chi arribbat fintzas dae sas paràulas de Papa Francesco dae Pratza Santu Pedru: «Rinnovu de coro sa bighinàntzia mea a sa populatzione de s’Emilia Romagna, corfida in custas dies de sas aundaduras».

Su Cussìgiu de sos ministros pro aprovare providimentos apretosos indiritzados a s’alluvione est prevìdidu pro martis 23 maju un’atopu. Sos disacatos a s’economia mannos meda. Segundu Coldiretti «s’alluvione at cumpromìtidu produtziones chi balent 1,5 milliardos e sunt andados pèrdidos 400 milliones de chilos de trigu».

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Una femina, decrerada morta, si est ischidada pustis de che l’aere leada in s’istanzia de sos mortos, ispantande sos parentes.

Custu abbenimentu chi non si podet creere, est accadessidu accanta a Lincoln, in su Nebraska, in sos Istados Unidos. S’interprete de custa istoria chi non si podet creere, est una femina de 74 annos, chi biviat in d’una RSA. Secundu sas primas notissias, su personale de sa RSA aiat costadu chi su coro de sa femina si fit frimmadu e chi s’alenu pariat de non bi essere pius. Sa fenima est bistada decrarada morta, e sos responsabbiles de sa RSA, ant giammadu un’agentzia po che la leare a s’istanzia de sos mortos.

Arrivada inie, sos dipendentes de s’agentzia si sunt acciappidos in daenanti de una iscena chi non si aiant immaginadu mai: sa femina bezza, chi creiant morta, fit ancora bia. Unu de sos dipendentes, bidinde carchi signale de vida, at incumintzadu a chircare de la faghere piccare. Sa situassione fit gai fora de sa realidade, chi sa femina fit giai intro de su baule, cando ant bidu sos primos signales de vida.

Custu istravanadu abbenimentu at dassadu tottus chentza paraulas e at ingendradu medas dimandas e dudas commente siat possibile chi una femina, decrarada morta potat essere in realidade ancora bia. Sa polizia at fattu partire un’iscruccullu devuccadu po cumprendere commente siat pottida capitare una cosa commente custa.

Sa muda at tentu una attumentzia de sos media manna abberu, e at pesadu preguntas importantes supra sa pretzisione de sas decraratziones de morte e s’abbisonzu de controllos pius pretzisos po evitare chi una cosa commente custa potat torrare a abbennere in su tempus benidore.

Sa famiglia de sa femina, chi commente si podet cumprendere est bistada attrippada e iscuntzertada, est chircande rispostas e zustizia po cantu est accadessidu. Sas autoridades ant assiguradu chi si ant a faghere tottu sas scruccullas chi serbint po faghere lughe supra custa muda e po accrarare si bi sunt responsabilidades. In su mentres, sa femina, chi est bia po miraculu est sutta de su controllu de sos duttores.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22