S’istudiante Benedetta Maltis de s’Istitutu artìsticu e musicale “Foiso Fois” de Casteddu at bintu sa seletzione regionale de su Prèmiu literàriu “Giacomo Leopardi”. Un’onore mannu pro su litzeu de Casteddu, chi dimustrat un’òtima formatzione in campu literàriu umanìstica, musicale e artìstica de sos dischentes suos. S’istudiante Benedetta Maltis de Ùssana de sa de Cuarta B Gràfica de sa sede de bia de Bixio a Pirri est resèssida a bìnchere in s’ùrtimu atu in àmbitu regionale de su prèmiu natzionale dedicadu a Giacomo Leopardi arribbadu a sa de ses editziones.

Como s’istudiante, apassionada de literadura italiana, at a pigare parte a s’ùrtimu atu de sa manifestatzione in campu natzionale chi s’at a fàghere su 1 de làmpadas in Recanati e at a rapresentare totu Ìsula in custu prèmiu importante meda in campu literàriu. Pro s’eventu sa pitzoca at a bènnere acumpangiada dae s’insegnante de lìteras Marcella Frau, chi at ghiadu s’aprendimentu de s’istudiante pro su chi pertocat custu poeta famadu cun aficu e impinnu.

Sa giuria regionale de sa Sardigna formada dae sos dotzentes Gian Luigi Pittau (presidente de sa cummissione e dotzente de limba e literadura italiana), Federica Assorgia e Maria Luisa Brodu ant analizadu sas seletziones in àmbitu regionale de sa manifestatzione. Sa dotzente Nicoletta Rossi chi ghiat s’Istitutu casteddaju, at manifestadu s’entusiasmu suo e su brègiu suo pro su resurtadu significativu cunsighidu dae s’istudiante. In prus est un’èsitu rilevanre meda chi atestat s’impinnu dedicadu a sa formatzione in campu literàriu de custu Istitutu de su cabulogu.

S’istudiante Benedetta Maltis s’est agiudicada su primu logu in sa proa regionale, tenta in s’Istitutu Meucci de Casteddu. In sa matessi fase- afirmat Marcella Frau– s’est afirmadu peru un’àteru dischente de su litzeu nostru, Daniele Melis, de sa matessi classe. Custa est una àtera cunfirma de sa preparatzione e de s’aficu chi sos istudiantes nostros manifestant dae semper in ocasione de initziativas, progetos e cumpetitziones de àmbitu regionale o natzionale. Un’augùriu de bona fortuna a Benedetta chi at a andare a Recanati pro sa cumpetitzione finale, in ue at a tènnere s’onore de rapresentare totu sa Sardigna’.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”