Sos 10 annos imbenientes ant a èssere detzisivos in sa lota contra su cancru ca, «intro su 2030, ant a èssere disponìbiles  vatzinos contra medas tumores». Ma fintzas contra «maladias cardiovascolares, autoimmunes e medas patologias raras».

A lu nàrrere  est s’azienda farmatzèutica americana Moderna, ispetzializada in sa produtzione de vatzinos a tecnologia mRna. Su diretore mèdicu de sa sotziedade, Paul Burton, at naradu a su giornale britànnicu TheGuardian chi, gràtzias a sos isfortzos fatos contra su Covid, in 12-18 meses sunt istados acumpridos progressos de importu.

Dae sos primos cumproos paret a beru chi sas isperimentatziones siant dende sos frutos isperados. Proa nd’est su fatu chi s’ente reguladore de sa meighina de sos Istados Unidos, su Fda, at cuntzèdidu a Moderna sa protzedura de revisione atzelerada siat pro unu vatzinu mRna pro su virus respiratòriu sincitziale – contra su cale s’immunizante diat èssere eficatze a s’83,7% pro prevènnere a su mancu duos sìntomos, tùssiu e calentura, in sos adultos dae 60 annos in susu –, siat pro unu vatzinu oncològicu, subra de sa base de sos resurtados otentos contra su melanoma, su tumore de sa pedde prus  malu.

Pro sa sotziedade Moderna at fatu custu s’annùntziu, chi at a andare suportadu dae àtero datos prus fungudos, chi ant a èssere valutados cun atentu meda dae sos entes reguladores de totu su mundu.

Tando paret a beru chi custos annos potzant batire a una rivolutzione, chi in parte est  giai realidade, contra medas maladias, su cancru primu de totus. Immunoterapia, terapia gènica e vatzinos sunt tèrmines destinados a devènnere familiares in su tratamentu de sa segunda càusa de morte de su mundu otzidentale (a pustis de sas maladias cardiovascolares). Eja,  finas a su deghènniu colafu, sas novidades prus significativas pariant indiritzadas belle totus a sos tumores ematològicos, comente  leutzemias e linfomas (chi ant bidu unu abassamentu mannu de sa mortalidade), oe sas cosas sunt cambiende ca sos avantzamentos de sa chirca interessant puru sos prus tìmidos tumores fortes.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Unu fogu devastante at reduidu in chisina chentinaias de ettaros de
approendas,pabariles e buscos de su Nugoresu, lassande in daesegus sa
destrussione. Prus de 300 cabidos de bestiamene sunu mortos e sas
contesturas de sa laurantza ant tentu dannos chi ant a costare dinari
meda.

Sas dittas de pesada sunt bistadas corpadas in manera particulare, cun
buscos e olivarios issos puru abbuttinados in manera grave.
Su bisestru est incumintzadu in mesu de dominica e lunis, cando unu fogu

Ispabinu meda at devastadu una zura chi est posta in su mesu e su norti
de s’isula. De particulare signifficu est su casu de unu pesadore de 44
annos de Oroteddi, una de sas biddas prus corpadas. Sotziu de sa
Coldiretti de Nugoro-Ozzastra, cust’omine at perdidu tottu su masone suo
de prus de 250 berbeghes e tottu sos fraigos de sa ditta sua. In custu
momentu est a sa chirca disisperada de sos caddos suos, fuidos po si che
istesiare dae su fogu. Puru atteros pesadores de cussa zura sunt faghinde
controllos po cumprendere tottu su chi ant perdidu.

Alessandro Serra, direttore de sa Coldiretti Nugoro-Ozzastra,
aggiunghet:”Cussa de sos fogos est una praga chi teppet essere
frimmada.Donz’ annu, custos abbenimentos devastant s’iscrocca nostra,
cajonande dannos chi non si podent calculare a sas dittas nostras. Custu
est su momentu de bistare accanta a sas dittas nostras, e Coldiretti est,
commente semper, in prima linia. Pius a daenanti, at a servire un’accottu
de sas istitussiones po poderare sas dittas.”

Su cardu record e sos campos siccos po sa mancantzia de abba ant
sustentadu sa diffusione de sos fogos. Sigundu un’istudiu de sa Coldiretti,
fundadu supra sos datos Effis, casi 7.000 ettaros sunt brusiados in Italia
dae sos primos de triulas. Sa situassione arriscat de peorare cun
s’assuttura chi sighit a corpare sas regiones de su Mesudie.

Sos pesadores e sos massajos de su Nugoresu como si teppent parare una
porfia chentza cabidianu, chircande de torrare a fraigare sas dittas insoro
e isperande in d’unu azzudu beru da parte de sas istitussiones po
binchere custu momentu de crisi.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22