Su  13 de martzu coladu fiat intrada intre sas primas bintighimbe, comente  giai li fiat sutzèdidu in su 2021. Como Chiara Miscali, pitzoca de deghenoe annos de Ardaule, s’est superada: su contu suo “La quattrocentoquaranta hertz” est istadu seletzionadu pro sos chimbe finalistas de su “Campiello giovani”.

Si tratat de unu de sos prèmios literàrios prus importantes de Itàlia, chi sa Sardigna at giai bìnchidu in su 2019 gràtzias a su libru  “Talismani” de Matteo Porru.

Chiara Miscali at a dèpere cuncùrrere cun àteros bator talentos de sa literadura italiana: Elisabatta Fontana, Valeria Lanza, Ester Mennella e Emanuele Tomasoni.

Chiara Miscali, istudiante a su de bator annos de su litzedu iscentìfiu de sa sede de Bilartzi est intre sos 25 finalistas de s’importante prèmiu literàriu Campiello Giòvanos abertu a  sos giòvanos de edade cumprèndida intre sos 15 e sos 22 annos pro s’iscritura de unu contu a tema lìberu . Chiara at partetzipadu cun unu contu noir a  tìtulu” Pettegolezzi assassini”

In sa prima fase de su cuncursu a giudicate at a èssere cun una giuria formada  dae binchidores/finalistas de su prèmiu, dae letores de domos editoras e dae su binchidore de sas Olimpìades de Italianu. Sa segunda fase bidet su sèberu de 5 finalistas a incuru de unu comitadu tècnicu. Sa proclamatzione de sos 5 finalistas at a acontèssere in s’agabbu de abrile. Chiara Miscali est fintzas una giornalista de sa redatzione de su giornale “Volta Pagina”.

Su Prèmiu Campiello est unu prèmiu literàriu italianu chi benit assignadu cada annu a un’òpera de narrativa italiana imprentada in s’annu de riferimentu. Su Campiello est su resurtadu de un’initziativa de sos industriales de su Vènetu, in su 1962, pro voluntade de sa famìlia Valeri Manera; su nùmene benit dae sa cummèdia de Carlo Goldoni Il campiello e fiat istadu seberadu dae Edilio Rusconi (membru de sas primas giurias) in onore a s’importu chi, in sa tzitade de Venètzia, tenent dae semper sas piticas pratzas suas (i campielli, apuntu) comente puntos de addòbiu e de iscàmbiu culturale e econòmicu de totu sa tzitadinàntzia, sena pompiare sas orìgines sotziales.

“Attività realizzata colcontributo della Regione Sardegna — IMPRENTAS 2022-2023. LR 22/2018, art.22”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22