Imparare s’inglesu gioghende: interessante progetu in s’iscola de s’infàntzia de Elini
Su "Progetu Limba Inglesa" aviadu a su cumintzu de s'annu iscolàsticu at interessadu sos pipios dae sos 3 a sos 5 annos de s'iscola de s'infàntzia de Elini.
In sos Indicos Natzionales 2012 sunt presentes diversos riferimentos subra de s’importu de un’espositzione a prus limbas pro sos iscolanos. A esèmpiu s’aprendimentu de s’inglesu, permitit a s’iscolanu de isvilupare una cumpetèntzia pluriculturale e de achirire sos primos trastos ùtiles a esertzitare sa tzitadinàntzia ativa in su cuntestu acanta istat.
Su progetu ponet a pare s’Iscola de s’Infàntzia e sas insegnantes suas chi annòrios formant sas generatziones noas de su territòriu, sos dotzentes collaboradores e su Comunu de Elini chi giughent progetos innovativos pro projetare sos iscolanos cara a su benidore issoro. Totus paris tenent cuncordadu unu calendàriu de istùdiu e letziones.
“Su traballu — at naradu Paula Vara Moralejo, insegnante de limbas istràngias e tradutora — cunsentit a sos iscolanos de sighire e cumprèndere mègius sas formas linguìsticas noas, arrichire su lèssicu issoro, fintzas pro mesu de s’iscurtu de istòrieddas e cantzones in inglesu, de imparare a traessu de sas capatzidades gràfica e motòria e dundas de assotziare elementos a su lèssicu inglesu”.
Dae mese de Ladàmine a Maju sos pipios de sos 3 a sos 5 annos sunt impinnados in unu cursu chi sighit un’acostamentu lùdicu e istruturadu in modu de sighire s’isvilupu cognitivu de su pipiu e su mundu esperientziale suo. S’insegnamentu de sa limba inglesa est basadu subra su contu de istòrias e su giogu pro ammanniare s’aprendimentu in modu naturale. Cantzones, giogos a atzinnos e de grupu e traballos creativos sunt sos mètodos impreados pro imparare paràulas noas e afortire su lèssicu agigu iscobertu.
“Amus retzidu cun praghere e cuntentu sa proposta de s’amministratzione comunale- at agiuntu sa dotzente de inglesu- pro more chi ischimus chi sas limbas istràngias siant s’arrichimentu importante pro s’oferta formativa”.
“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”
© RIPRODUZIONE RISERVATA
Su regista de Tortulè Mauro Aragoni conchistat Netflix USA cun “That Dirty Black Bag”
Una mira manna po Mauro Aragoni, su registra prenu de talentu de Tortulè, connoschidu po su curtzu “Nuraghes S’Arena”, chi at retzidu premios meda. Sa serie nova sua, “That Dirty Black Bag”, est bistada seperada dae Netflix USA po essere trasmittida in su mese de Austu, marcande un’atteru passu in daenanti in sa carriera de su regista.
“Netflix America seperat 13 series novas in lista, e bi semus nois puru.”That Dirty Blak Bag” at a bessire supra Netflix USA in su mese de austu” at abbisadu prenu de galabera Aragoni. Custa serie, produida dae Paramount+ e affilada dae su mattessi regista ozzastrinu, at giai mustradu sutzessu supra sa contestura televisiva americana AMC,canale giai nodidu po aere dadu vida a duas de sas series TV prus conicas de tottu sos tempos: “Breaking Bad” e “The Walking dead”.
Sa serie “That Black Dirty Bag”, non solu bantat una produssione de livellu artu, ma fintzas una cumpanzia de rispettu mannu.. In mesu de sos attores principales brillat Dominic Cooper, nodidu po sos rolos in “Preacher” e “Mamma Mia!”. Accanta a issu, acciappamos Douglas Booth, famadu po “The Dirt”, e Niv Sultan, primu attore de sa serie “Teheran”.
Non mancant sas presentzias italianas: in mesu de sos primos attores bi est puru Guido Caprino, appretziadu po su rolu suo in sa serie Sky “1992”. Sa cumbinassione de una cumpanzia internatzionale e una trama chi appassionat meda, promittit de acciappare s’attentzione de su pubbricu americanu e non solu.
Mauro Aragoni, at mustradu un’attera borta su talentu suo, contande istorias chi accisant e in su affilare produssiones de livellu artu. Su seperu de Netflix USA de incluidire “That Dirty Black Bag” in su catalogu suo de austu est unu riconnoschimentu importante meda de su tribagliu suo e de sa calidade de sa serie.
Custu risurtadu non solu ponet in lughe su talentu de Aragoni, ma affortigat fintzas sa presentzia de sa cinematografia italiana in sa bista de sa televisione internatzionale. Cun “The Dirty Black Bag”, su regista ozzastrinu si cunfirmat commente una de sas boghes chi promittin de prus e chi battint modernidade in su tzinema de oe, capatze de affaschinare su pubbricu cun istorias cadrias e figuras cumplicadas.
Attività realizzata col contributo della Regione Sardegna — IMPRENTAS 2023-2024. LR 22/2018, art. 22
© RIPRODUZIONE RISERVATA
