Torrat dae su 29 a su 30 de abrile s’editzione nùmeru 6 Slalom Città di Loceri , segunda tapa de su Campionadu Italianu Slalom 2023 cun Trofeu Nord e Copa ACI segunda zona, bàlidu pro su Campionadu Regionale Slalom Sardigna istabilidu dae sa Delegatzione ACI ISPORT Sardigna.

Istudiada subra de unu percursu collaudadu de 3.900 metros cun 12 postòtgios de birillos, in sa duas dies de cumpetitzione, s’ant cunfrontare pilotas bènnidos dae totu Itàlia.

S’Iscuderia Ogliastra Racing cunfirmat programmas, motivatziones e impinnu,pro s’editzione aprovada in su calendàriu natzionale. Pròpiu s’impinnu de s’organizatzione caraterizat sa gara de su 2023 cun Loceri chi divenit apuntamentu isolanu in ue s’islalom at a bìvere torra un’esòrdiu in su tzicuitu terramannesu.

Impinnada meda in s’organizatzione e in sa programatzione durante su perìodu ierrile, s’Iscuderia Ogliastra Racing in collaboratzione cun s’Assòtziu Arbus ProMotors, cun su C.O.S.S (Comitadu Organizadores Slaloms Sardigna), abarrat acapiada a sa collaboratzione cun su Comunu de Loceri, pro consolidare un’amparu fundamentale chi cunsentit de insertare diversas novidades e ricunfermas a cumentzare dae sas fainas collaterales comente sa degustatzione de sos màndigos e sos ballos sardos in sa Pratza Nonnu Melis. Garantidu su tastu de sos produtos de sa sagra Loceri con Gusto, sa fortunada manifestatzione gastronòmica chi si faghet cada annu in su tzentru istòricu de sa bidda.

In su cuartieri generale acasagiadu in su palatzu munitzipale de Bia de Roma, ant a èssere abertos sas lollas espositivas de sos produtos tìpicos. Su tzentru de Loceri, at a devènnere sede isportiva e enogastronòmica pro acurtziare galu de prus su slalom a sa gente. Su sero de sàbadu 30 abrile sos pilotas e sos echipàgios ant a èssere in pratza pro tastare su màndigu e ascurtare sa mùsica folk, totus cumbidados a sa festa de s’isport.
Pro nde ischire de prus, pompiade su situ ìnternet de Ogliastra Racing: https://www.ogliastraracing.it/

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Cada annu, in sa de tres domìnigas de cabudanni, sas biddas Gàiru e Cardedu tzèlebrant sa festa de  Nostra Sennora de Bonucaminu, nòdida fintzas comente “Sa Santa”, su cale bultu torrat a sètzere in sa crèsia parrochiale de Gàiru. Custa festa, cun raighinas profundas in s’istòria locale, unit sa dimensione religiosa e cudda tzivile, interessende sa comunidade in un’eventu de grandu significadu culturale.

Sa chenàbura sero, s’istàtua de “sa Santa” benit carrada dae sa crèsia parrochiale de Gàiru finas a sa crèsia de su campu de Bonucaminu, sighende unu percursu antigu chi rugrat sas biddas de Osini, Ulassa e IJersu. In passadu, custa professone colaiat in caminos diferentes, ca su modernu caminu de “sa costa” fiat istadu fatu in sos annos sessanta. Sa tzelebratzione s’acumprit in sa crèsiedda de su sartu finas a sa domìniga, e si concruit su lunis sero in Gàiru cando “Sa Santa” benit torrada a pònnere in sa crèsia parrochiale sua.

Durante custa festa, in passadu, sos devotos colaiant duas notes  dormende in sos muristenes a s’esternu de sa crèsia. Su sèberu de tzelebrare Nostra Sennora de Bonucaminu in cabudanni, in cointzidèntzia cun su cumintzu de s’annada agrària nòdidu comente  “cabudanni” faghet cumprèndere s’importu de sa Madonna comente  sìmbulu de bona fortuna pro s’incùngia. Si contat chi in tempos antigos, sa Madonna fiat venerada in un’àtera crèsia, posta in sa localidade de Foddini, a presu de su mare. Nointames, sa crèsia fiat istadu distrùida pro timoria de sos antracosi de sos corsaros e de sos bàrbaros. Intre su 710 e su 1015 p.C., sa crèsia fiat istadu torrada a costrùere in s’atuale positzione sua, semper pro s’amparare dae sos atacos morescos, e fintzas sos abitantes de Gàiru aiant lassadu sa marina e si fiant fuidos in su monte.

In su 1801, sa crèsia  est istada ogetu de ristruturatzione. Oe presentat una navada retangulare cun unu cobertura tìpica de sas crèsias de sartu, cun una cobertura in canna, tèulas sardas e traes in linna. Sa fatzada est bianca, arrichida cun unu portale in linna pro s’intrada e una ventana pitica subra s’intrada. Subra de sa cobertura si biet unu campanile cun una campana impreada in sas tzelebratziones in onore de “Sa Santa”.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”