Su Partidu Democràticu de s’Ogliastra at fatu un’apellu a sas fortzas sindacales, a sos amministradores locales, a totu sos partidos polìticos, a sos comitados e a sos assòtzios de volontariadu pro more chi “bi siat un’atzione unitària pro evitare sa serrada, incumentzada gia dae diora, de su Repartu de Ostetrìcia e Ginecologia de s’ispidale N.S. della Mercede de Lanusè”.

Est s’invitu fatu dae su su segretàriu territoriale democràticu Ivan Puddu  a nùmene de su PD de s’Ogliastra. “Cois cherimus informare de su problema su Ministru de sa Salude, pro chi connoscat una situatzione de uno de sos territòrios prus marginales de Itàlia e chi est devènnida oramai insostenìbile. Su de non pòdere nàschere signìficat a mòrrere. Signìficat cundennare a morte unu territòriu chi est ispobulendesi pro more de sa farta de servìtzios essentziales pro sa vida de sas persones”.

“Finas a oe amus isperimentadu subra de sa pedde nostra sos fallimentos de sa polìtica sanitària in s’ìsula nostra, in ue sa farta de personale in sas istruturas ospedalieras e territoriales est devènnida un’apretu, a su cale tocat a pònnere remèdiu. Oe semus bivende su perìgulu sa serrada de su repartu de Ostetrìcia  e Ginecologia de s’ispidale de Lanusè, in unu cuntestu in ue su bassu livellu de infrastruturatzione e sa mancàntzia de sos servìtzios rendent galu prus pitica, in tèrmines sotziales e econòmicos, sa prus pitica Provìntzia de Itàlia”.

Pro custu, su Pd si girat diretamente a su ministru de sa Sanidade, Orazio Schillaci pro “torrare a cramare s’atentzione sua subra de sos graves problemas chi afigint sa sanidade in su territòriu ogiastrinu.

“M’incarrèssio a vostè – at iscritu Ivan Puddu – ca sa polìtica de guvernu de sa regione Nostra, in sos ùrtimos annos, no est istada a tretu de risòlvere custa e  àteras  crititzidades, cun s’adotzione de provedimentos chi si sunt riveladas ineficatzes, tantu de bìdere decretada, in su tempus, sa serrada de sos repartos ospedalieris. Est in oramai un’annu chi in Ogliastranon si podet nàschere  a càusa de sa serrada de su repartu de Pediatria e duncas de su Naschidòrgiu, oblighende sas fèminas de sa provìntzia nostra a si nche andare a Casteddu e a Nùgoro, cun maicantos  sacrifìtzios”.

“Attività realizzata colcontributo della Regione Sardegna — IMPRENTAS 2022-2023. LR 22/2018, art.22”

Pàulu Fresu: su sonu de su Mediterràneu in su mundu de su jazz

Pàulu Fresu, naschidu su 10 de freàrzu de su 1961 a Brechìdda, in Sardigna, est unu de sos prus mannos sonadores de trumba e flicornu de su jazz europeu.

Cumintzat a sonare sa trumba a ùndighi annos in sa Banda Musicale “Bernardo De Muro” de sa bidda sua, e a pustis si diplomat in su Conservatòriu de Casteddu. In sos annos ottanta iscoberit su jazz e pigat parte a sos Seminàrios de Siena Jazz, cumintzende una carriera chi dd’at agiughere a palcos internatzionales. S’istile lìricu e poèticu sou si podet reconòschere pro su sonu modde e fungudu, chi podet unire su connottu de su jazz americanu cun sas aeras mediterràneas e sas raighinas sardas.

Fresu est un’artista chi amat ammisturare: tribagliat in progetos chi partint dae su jazz traditzionale a sa world music, dae sa mùsica ètnica a cussa contemporànea, fintzas a su trio “Mare Nostrum” cun Richard Galliano e Jan Lundgren, sìmbulu de su diàlogu intre Nord e Sud de s’Europa. In su cursu de sa carriera sua at retzidu medas reconnoschimentos, intre sos cales su Django d’Or comente Menzus Musicista Europeu, e sighit a èssere unu puntu de relata pro su jazz italianu.

In prus de s’atividade artìstica sua, est diretore de sa festa Time in Jazz a Brechìdda, naschida pro giughere sa mùsica in sas pratzas e in sas bistas de sa Sardigna, e fundadore de s’etichetta Tŭk Music, chi promovet giovanos talentos e visiones sonoras noas.

Mancari bivat intre Sardigna, Bologna e Parigi, Fresu cunservat unu lìgamine fungudu cun sa terra sua, chi benit a foras in sa manera de sonare sua: unu faeddu cuntinu intre identidade locale e limba universale. Ambasciadore Giovanes UNESCO pro s’Itàlia, rapresentat s’esèmpru perfetu de comente sa mùsica podet unire culturas diferentes sighinde a èssere autèntica. Pàulu Fresu est prus de unu musicista: est unu ponte intre su passadu e su benidore, intre su silèntziu de sos coronzos sardos e s’alenu cosmopolita de su jazz mundiale.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”