Sas òperas, sas fotografias e sa vida de Frida Khalo, s’artista messicana devènnida un’icona pop feminile, regortas in una mustra multimediale chi at a aprodare a su tzìnema Ariston de Vitzi dae s’8 de abrile a su 9 de trìulas.

“Frida Kahlo – Viva la vita ” est su tìtulu de s’espositzione, cun projetziones, vìdeos, efetos luminosos e acùsticos, pro tzelebrare sa figura sua de fèmina e artista e regalare a su visitadore un’impatu sensoriale forte gràtzias a sa multimedialidade. Una rapresentatzione chi at ghiare sos bisitadores intro sas pinturas, a su tzentru de unu mundu de colores esòticos e de animales bàrios, imàgines chi current mentras una boghe foras de campu e unu lèbiu tapete musicale, ant a fàghere de sutafundu acùsticu a sa presentada.

Sa mustras, contivigiada dae s’istòrica de s’arte Emanuela Manca e gestida dae sa Cooperativa Istelai – tzèlebrat s’istile ùnicu de s’artista chi si definiat a traessu de sa cultura messicana e sa disabilidade sua, elementos chi ant marcadu su percursu artìsticu e s’ideologia polìtica sua.

Sa mustra proponet fintzas una Frida Kahlo bista cun sos ogros de su fotògrafu colombianu Leo Matiz: in sas 13 fotografias tiradas in s’intimidade domèstica de Casa Azul, in su bighinadu de Coyocàn in Tzitade de su Mèssicu, su fotògrafu collit s’ograda magnètica e penetrante e su caràtere determinadu de s’artista, elementos chi rivelant sa personalidade e s’essèntzia de s’ànima sua.

“Sa mustra presentat sa vida de s’artista caraterizada dae una cunditzione fìsica difìtzile e marcada dae una capatzidade manna de resilièntzia, ma fintzas una seletzione de fotos suas tiradas dae sos fotògrafos mundiales prus importantes de su ‘900 – at naradu sa curadora de s’espositzione durante sa presentada de s’eventu in Nùgoro -. Dae custa mustra nde essit a campu su retratu de una fèmina indipendente e rivolutzionària, chi at ischidu trasformare s’immobilidade sua in un’energia chi l’at fata divènnere immortale”. (ANSA).

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22