Sa famada sotziedade ispetzializada in turismu Mabrian Technologies, at publicadu sos datos chi pertocant sas mègius 10 destinatziones prus bramadas dae sos turistas pro su 2023.

Dae sos datos est essidu a campu chi tra sas deghe metas preferidas b’est s’Itàlia, e mancu a lu nàrrere sas duas  ìsulas mannas de Sardigna e Sitzìlia chi si sunt piatzadas a sa de duas positziones de sa classifica.

Sa prima est sa localidade turìstica de Bali, in Indonèsia ma sa cosa chi ispantat de prus est pròpiu sa presèntzia de sa Sardigna de se sa Sitzìlia, chi segundu su raportu podent cumpètere cun metas medas prus famadas a livellu mundiale.

Sos datos chi pertocat sa Sardigna cunfirmat sa resessida de sa Bit de Milanu in ue sa Sardigna est istada una de sas protagonistas prus importantes  intre sas destinatziones turìsticas natzionales e internatzionales, sende chi in su 2022 at tentu 7 milliones de arribos.

Sos èsitos de sa bursa internatzionale de su turismu fiant istados cumentados cun favore dae su Presidente de sa Regione Christian Solinas chi aiat naradu, in serrada de sa Bit de Milanu: “Nos isetamus de consolidare sa moda. Su 2023 podet èssere unu àteru annu de primadu. S’obietivu como est su de unu contivigiare e consolidare un’allonghiamentu prus mannu de s’istajone turìstica. Sa Sardigna estduncas in primu positzione . Sos investimentos chi amus postu in campu pro pònnere fronte s’apretu, e cuddos sutzessivos pro ammaniare unu partèntzia  cunsentint a sa Sardigna de acumprire semper prus unu ruolu de protagonista.”

Segundu s’Osservatòriu Bit, ocannu at a èssere a beru cussu acanta su turismu e sos biàgios ant a torrare a cumentzare-  Monte, mare, sartu, matrimònios e campègios, fieras e crusieras. Sos datos ponet in evidèntzia comente b’at a èssere una torrada manna de sos turistas in sas tzitades de arte. Roma prima de totus, e posca Venètzia, Firenze e Milanu chi podimus considerare sa ghenna de intrada e sa cartulina de su turismu italianu. Su 2023 duncas podet èssere s’annu de sa rinàschida de su turismu italianu, peri pro ite ant a torrare sos istràngios. Ma fintzas sos italianos, chi a pustis de su firmu a sos biàgios a s’èsteru ant torradu a iscobèrrere sas bellesas italianas. Segundu s’Osservatòriu Bit, sos italianos ant a gastare belle 2 milli èuros pro sos biàgios.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Sa bellesa de Casteddu at ammajadu sos americanos. Sa “tzitade bianca”, comente la pintat sa rivista  Forbes Istados Unidos at conchistadu su coro de sos istaduidensos.

Gràtzias a un’artìculu essidu in sa rivista americana sa tzitade de Casteddu at paradu una fama manna in sos USA. Sa rivista proponet unu giru de una die e mesu in sa “tzitade bianca, comente la mutint issos, mescamente durante sa istajone bassa, est a nàrrere in s’ierru. Su giornalista chi at iscritu s’artìculu dedicadu a Casteddu est istadu acumpangiadu a connòschere sos ùrbidos e sos caminos de su tzentru istòricu de sa tzitade dae sa capassa e brava Maria Paola Loi, una ghia turìstica de cabbale.

In sa bisita de unas 36 oras, est a nàrrere una die e mesu de permanèntzia, s’artìculu proponet de bisitare sos logos prus caraterìsticos de sa capitale sarda, andende fatu de sos caminos istòricos de Casteddu, e firmendesi ogna tantu a tastare e sos durches, sos pratos e sas bèvidas de su logu. Totu custu durante s’ierru, est a nàrrere in istajone bassa. Su servìtziu est firmadu dae Rebecca Ann Hughes, una giornalista chi iscriet pro Forbes Usa, una firma connota meda in su setore de su turismu.

In sas pàginas de su giornale s’inviada narat comente sa tzitade est chirchende de nde essire dae su sòlitu istereòtipu de tzitade de mare e de tzitade portuale, e est faghende a manera de si fàghere connòschere mescamente comente logu de culura e logu de pàsiu. Totu custu pro fàghere a manera chi Casteddu potzat allonghirare s’istajone turìstica sua, chi est acapiada meda a su mare e duncas a s’istade. Sos cafès de sa tzitade, sos ristorantinos acuados fatu de sos caminos de su tzentu istòricu e sos museos tzitadinos, podent èssere unu motivu importante pro cumbìnchere sos letores de su giornale a bisitare sa tzitade sarda.

Intre sas atratziones prus consigiadas b’at su bighinadu de Castello, su Bastione Saint-Remy, su mercadu de San Bendetto, e s’istàinu de Molentàrgius.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”