Importante meda s’addòbiu chi s’assessora a sa Cultura de su Comunu de Samugheu, Elisabetta Sanna, at oaparitzadu chenàbura su 16 de nadale in sos locales de su MURATS – Museu regionale de s’Arte tèssile sarda, pro allegare de sos istereòtipos de gènere.

S’atopu est istadu fatu cun su coordinamentu de Loredana Rosa, presidente de s’assòtziu ogiastrinu Voltalacarta. Ant partetzipadu a su cumvegnu per sas assistentes sotziales Maria Giovanna Melis e Maria Chitti. Paris cun issas bi fiant peri unos cantos imprendidores de Samugheo: sa responsàbile de sa cantina de Neunele, s’enòloga Emanuela Flore, e Giuseppe Demelas, amministradore de MU, s’azienda de tessidura  apretziada a livellu internatzionale.

Su cunvegnu est istadu s’ocasione pro contare esperièntzias personales e de traballu, cun testimonias relativas a sos medas casos de sessismu e discriminatzione. Pro Loredana Rosa de Voltalacarta “sa luta a pregiudìtzios e istereòtipos est un’aficu chi totus e totus nois devimus assùmere in sa prima persone, a cumentzare dae s’annestru giai de piseddos, pro costruire una tzitadinàntzia prus giusta”

Giuseppe Demelas at contadu  s’esperièntzia de s’azienda MU, eredada dae sa mama tessidora Mariantonia Urru. In unu setore cunsideradu appannaggio esclusivu de sas fèminas, comente a sa tessidura, Samugheu est etzetzione sende chi bantat sa presèntzia de medas òmines chi si dèdicant a custa arte. Emanuela Floras, ùnica enòloga in Sardigna e intre sas pagas meda in Itàlia, at contadu s’àtera cara de sa medàllia, sende chi issa est una etzetzione in unu mundu pro su prus de òmines.  In prus de fàghere s’enòloga est devènnida amministradora delegada e Brand Ambassador de sa dita Moratti.

A sa dibata ant intervènnidu peri Debora Chitti e Maria Giovanna Melis, assistentes sotziales de su Comunu de Samugheu, chi ant contadu s’esperièntzia issoro in intro de sa realidade locale.

Importantes peri sos interventos de su pùblicu chi ant contadu fatos e acontessimentos de sessismu personales o de àteras persones de su logu. Dae s’atopu nd’est essidu a campu chi est importante parare barra a custos istereòtipos de genere e chi pròpiu sas fèminas chi nche l’ant fata a los bìnchere devent èssere de esèmpiu pro sas àteras. Loredana Rosa at acabbadu s’interventu cosa sua torrende gràtzias a  totu s’amministratzione comunale de Samugheu, bidda acanta esistint meda esèmpios de cabbale e bonas pràticas de sighire.

 “Progetu finantziadu cun s’Avisu Pùblicu IMPRENTAS annualidade 2021-2022”

Dae sa presone a su tzinema:s’istoria de Beniamino Zuncheddu divennit unu film.

S’istoria de Beniamino Zuncheddu, unu de sos casos prus graves de faddinu zudissiariu in Italia, at a divennere a sa lestra unu film.Un’istoria longa e prena de dolore chi at sinzadu in manera funguda sa vida de un’omine, adduradu in presone pro prus de trint’annos mancari eppat semper nadu de essere innotzente. Zuncheddu, ex pastore sardu, fuit bistadu arrestadu in su 1991 accusadu de una mattansa in Sinnai, in sa cale fuint bistadas bocchidas tres pessonas e un’attera fuit addurata ferta in manera grae.

In cussu tempus fuit pagu prus che unu piccioccu, ma fuit bistadu cundennadu a sa presone a vida pro mesu de elementos chi in su tempus si sunt iscobiados chena nissuna fidantzia. Pro prus de trint’annos at bividu in daesegus de sas travessas,perdinde sos annos prus importantes de sa vida sua,attesu dae sa famiglia, dae sos affettos e dae cale si siat possibilidade de si fraigare unu tempus benidore. Una vida suspesa, sinzada dae s’isettu e s’isperantzia de podere dimustrare
s’innocentzia sua. Solu in su 2024, pustis de una battalla legale longa, fatta de ricursos e controllos de su protzessu, est arribada s’assolutzione deffinitiva chi at reconnoschidu chi no aiat cummittidu su fattu, torrandeli sa libertade.

Una detzisione chi at atzesu s’attentzione supra s’accadessidu e supra sas responsabbilidades de unu sistema chi, in custu casu, at faddidu in manera grae.Como cust’istoria arribat a su tzinema cun d’unu film chi at a contare non solu su casu personale suo,ma fintzas su pesu umanu e sotziale de una cundenna male
fatta.Sas ripresas si prevedint in Sardigna e su disignu puntat a faghere connoschere a unu pubbricu prus mannu una muda chi at corpadu in manera funguda su pubbricu.

Su film at a contare sa sufferentzia,sa soledade e sa fortza de chie sighit a battallare fintzas cando tottu paret perdidu,poninde a su tzentru sa dignidade de una pessona chi non at mai tzessadu de si decrarare innotzente. A su mattessi tempus,at essere fintzas una manera pro meledare supra cantu siat importante su
tribagliu de sa zustissia e supra cantu siat chidrinu su compidu de atzertare sa veridade.

Cussa de Beniamino Zuncheddu est un’istoria chi andat addia de su casu singulu.Est sa dimustrassione de cantu pottant essere graes sas cusseguentzias de unu errore e de cantu siat diffitzile remediare a su tempus perdidu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22