In Casteddu sos vìgiles munitzipales ant postu sa contraventzione a sas  màchinas de sos isposos in parchegiadas in sa pratza de sa Catedrale

S’ant agatadu unu bellu regalu sos invitados de sa coja chi s’est tzelebrada in sa Catedrale de Casteddu. Difatis is guàrdias munitziapales, mancari sa die de festa, ant postu una multa a sas màchinas parchegiadas in sa pratza, sena risparmiare cussa de  sos duos isposos.  Una multa de 80 èuros chi seguramente at a abbarrare in s’istòria de sa tzitade, ma prus che totu in s’album de sas fotografias de sos isposos chi ant detzisu de si unire in matrimòniu in sa Catedrale de Santa Maria.

Sos agentes casteddajos no ant tentu pena peruna e ant cumentzadu pònnere sas multas a totu sas màchinas postas males. Sa noa est essida in sos giornales locales e at fatu su giru de sas retzas sotziales, iscasidende protestas ma fintzas caliunu risitu.

So isposos ant agatadu in su bidru de sas màchinas impreadas pro s’isposòriu sas multas pro sa proibitzione de parchègiu, chi est in vigèntzia in pratza Palatzu dae in antis sa Catedrale de Santa Maria.

Sos agentes de sa Politzia Munitzipale de Casteddu, sena coro, no ant pompiadu in cara a nemos e mancari calicuna protesta, non b’est istada possibilidade de apellu. A pagu sunt serbidos sos tentativos dae banda de unos cantos invitados de los fàghere renuntziare a aplicare de sa lege. Una cosa mai bida prima de tando ma chi faghet cumprèndere chi sa polìtica de sa munitzipalidade contra su “parcheggio selvaggio” est a tolleràntzia zero. Sos isposos s’ant a subènenre pro semper custu fatu e seguramente fintzas sos àteros isposos chi s’ant a bòlere cojuare in sa Catedrale ant a donare cura a parchegiare sa màchinas.

“Progetto finanziato con l’Avviso Pubblico IMPRENTAS annualità 2021-2022”

S’atteru manzanu, bi est bistada un’accorrada importante meda de su comidadu de sa provintzia de Nugoro, de s’ordine e sa seguresa pubbrica, cun sa presidentzia de su Prefettu de Nugoro Dionisi, a sa cale ant partetzipadu sos cumandantes provintziales de sas Fortzas de s’ordine, e de sa polizia de sos cartzereris Antoni Galati. S’argomentu printzipale est bistadu un’attera borta cussu de s’emergentzia chi bi est in sa presone de Badu e’ Carros, una chistione custa, chi est dimandande interventos chi si leant tottu paris.

Respundinde a s’imbiu de s’Esercitu po controllare sa presone dae sa parte de fora, si ispettant interventos puru da parte de s’amministrassione de sa Presone. Su provvedidore at isboddiadu tottu sos particulares de s’imbiu intro de pagu tempus, in Sardigna de 71 agentes mascros,21 feminas e 34 arrezzentes, chi arrivant dae sos cursos
chi sunt finidos dae pagu.

Su segretariu generale de sa Uil Pa Polizia de sas Presones de sa Sardigna, Migheli Cireddu, at faeddadu de sa desemplada assione leada dae su Prefettu Dionisi, chi at collaboradu meda cun su Provvedidore Galanti, po i sfidare sa situassione cun meda detzisione. Bell’e gai, Cireddu at evidentziadu chi s’imbiu de personale nou, est solu unu signale positivu, no est sa solutzione deffinitiva, ispetzie si cunsideramos sos pensionamentos chi ant esser fattos in pagu tempus.

Su personale de sa polizia de sa presone, in manera particulare in Nugoro e Tattari, sighint a tribagliare in manera precaria, cun orarios de tribagliu longos meda e paga claresa de su controllu. Cireddu at nadu puru chi bi est s’abbisonzu de torrare a ordimizare su tribagliu e de interessare de pius sos sindacados in custu processu, in manera chi sas intetziones bonas de sas istitussiones si potant traduire in assiones e mesorias beras.

S’impignu de onzi die, de su cumandu regionale e de su Prefettu, est appretziadu meda, ma est urgente chi si passet dae sas ideas a sa pratichesa,interessande sos de sos sindacados in s’ordimizu de su tribagliu. Solu in custa manera si at a podere iscansare chi carchi derettura e cumandante, mancari tenzant sas menzus intentas, sigant a
faghere dannos mannos a livellu logale.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22