Sa situatzione difìtzile de sa sanidade in Sardigna, ancora prus grae in Ogiastra, at portadu a su consigeri regionale Salvatore Corrias a iscriere una lìtera de denuntzia a su guvernadore
Christian Solinas.

Su polìticu ogiastrinu, at cumbidadu fintzas a su presidente a andare in su territòriu pro bìdere cun is ogros suos is dificultades fitianas de sa populatzione e de su sistema sanitàriu. Si liget in sa missiva: “Garbosu Presidente, scrio a Fostei, in deretura a Fostei, deliberatamente a Fostei, foras de su rollu chi tengio a comente de Consigeri regionale, pro lu contare ancora sa situatzione de sa sanidade in Ogiastra, situatzione chi conoschet bene, tanto de s’èssere pigadu pubblicamente s’impignu a agatare solutziones, no ùrtimu su 21 de arbili coladu, cando – presentes totus is rapresentantzas localis, istitutzionales e sotziales – su problema printzipale parriat èssere sa nòmina de su diretore generale, gai mannu chi totus is àteros, no esistiant. E gai est acontèssiu.

Epuru, dae tando, sa ASL nostra unu diretore lu tenet, ma is problemas, mancare is impignos mannos pigados, is problemas verdaderos, abbarrant. Antzis, aumenatant. Dae tando est silentziu, nemos faeddat, asuta de s’efetu de una (in)cosciente narcosi, a palas su prus de is perfetos silentzios de is innotzentes. Dae tando peruna boghe de democràtica denuntzia si nd’est pesada.

E sa mia, oe, est una boghe de denuntzia. Su spidale de Lanusei est patende meda: su Puntu nàscida non nc’est prus; Cardiologia at serradu (e a su nàrrere chi una batalla po s’Emodinàmica, is cardiopàticus, l’ant fata); su Pronto Socorso est un’anticamera sbuida, in unu spidali cun pagus ortopedicus e prus pagus anestesistas; su servìtziu de Neuropsichiatria est sboidu; s’elisuperficie a servitziu de s’emergentza-urgentza, mancai is promissas mannas, non est mai partia.

Sa medighina territoriale est unu puzzle chene tesseras, abompiadu de chini, intra milla dificultades, est sa ghia, ma chene risultados: comunidades interas sunt chene medicu de famìlia e chene guàrdia medica né turistica, in custu territòriu turisticamente vocadu; su servìtziu de su 118, in Tortolì, bivet a comente podet a sa ridutzione manna de su personale
solu gratzias a su sacrifitziu de is operadores in servìtziu.

Custus sunt is problemas, e sa rispusta de bos’àterus est semper e solu una: non ci sunt medicos, e sa curpa est de chini, finas a immoe, no at scipidu programmare, e po agatare una solutzione iat a serbire una rivolutzione, o una riforma, comente cussa aprovada, sustenida fintzas cun is agiudos cumpratzidos de nos (in is bursas de stùdiu e in is RAR chi ancora depint cunsignare), una riforma monca, atzopiada dae is atos aziendales chi no ant tentu ancora esecutzione.

E tando is medicos – bivat sa rivolutzione – ddus importamos de Cuba, chene pensare a is medas, giòvanos professionistas, sardos, ogiastrinos, chi si nde andant ca agatant in àteros logos una diversa e prus forte motivatzione, cussa chi custo sistema, chi bos’àteros, solu bos’àteros, oe, seis is responsabiles, no est in gradu de ofrire e garantire.

Deo creo, de fronte a is fainas e a is giustificatziones, chi pagu ballint, de s’Assessore a sa sanidade e de s’aparadu suo finas a is ùrtimas articolatziones territoriale, de creo chi totu  custo non si potzat bariare prus.

No innoghe, non dae nos, in ue patimos sa pandemia de su spopolamentu. No innoghe, non dae nos, in ue s’ammarariamos a comente in tzitade e imbetzamos de prus. No innoghe, non dae nos, in ue ònnia sfortzu est fatu po abompiare s’emorragia de is giòvonos chi si ndi andant pro non torrare. Deo la cumbido duncas a bènere inoghe in Ogiastra, Presidente. Bengat, fintza a manere informale bengat a bìdere su spidale nostru sboidu de medicos, ma non de patzientes, bengat a bìdere su traballu mannu de is operadores sanitarios nostros, chi pro amore, solu pro amore de custa terra e de su traballu intzoru, abompiant. Bengat, Presidente, bengat a bìdere sa gente cantu patit. Gai at a podere pigare cuscientzia de sa gravidade de sa situatzione. Deo seo pronto a lu fàghere acatu. E cun mie totus is ogiastrinos, cussos chi ant pèrdiu sa fiede e sa passientzia. In abetu de una rispusta, cordialmente la saludo”.

“Progetto finanziato con l’Avviso Pubblico IMPRENTAS annualità 2021-2022”

TikTok, AI e sa manera noa de sos giòvanos de fàghere sas chircas online

In sos ùrtimos annos, sa manera de chircare novas de sos giòvanos est mudada in manera profunda. Si unu tempus Google e sas entziclopedias online fiant su puntu de partèntzia primàriu, oe no est prus gasi. Pitzocos e pitzocas meda preferint trastos de inteligèntzia artifitziale, chat innovativas e prataformas social comente TikTok, in ue vìdeos curtzos e crarimentos lestros permitint de cumprèndere luego sos cuntzetos dificultosos.

A bortas dae sos motores de chirca clàssicos non bi passant nemmancu. Sa chirca no est prus liniare e isulada. Sos giòvanos passant in presse dae vìdeos a post, dae link cumpartzidos in chat de grupu a discussiones in comunidades online. De custa manera sa chirca si faghet dinàmica e collaborativa: si passant sos pàrreres pari-pari, si ponent a cumone sas fontes e si ponent a cunfrontu sas novas in s’istante. Custu critèriu tenet de bonu chi est lestru e vàriu, ma bi cheret sensu crìticu ca non totu su chi s’agatat online est seguru o bene fatu.

Sos trastos de AI, pro esempru, permitint de tènnere rispostas in s’istante, curtzas e adatadas a chie preguntat, imbetzes TikTok e àteras prataformas social dant crarimentos visivos chi agiuant a ammentare mègius sas informatziones. Però, sa lestresa de s’impreu podet causare una connoschèntzia incumpleta, e duncas est de importàntzia manna a ischire chircare sas fontes giustas, a pònnere a cunfrontu argumentos diferentes e a organizare sas informatziones in manera informada.

Non cheret ismentigadu poi chi finas aplicatziones comente WhatsApp dant possibilidade de interrogare s’Inteligèntzia Artifitziale subra de tantas chistiones. A sa fine de sos contos, sos giòvanos de oe si movent in unu panorama digitale dificultosu ma prenu de oportunidades. Chie est bonu a impreare custos trastos cun impignu resurtat a mudare sa velotzidade de sa Retza in connoschèntzia cuncreta, impreende in sa mègius manera sa cantidade ispantosa de informos disponìbiles cun unu click.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”