Sa situatzione difìtzile de sa sanidade in Sardigna, ancora prus grae in Ogiastra, at portadu a su consigeri regionale Salvatore Corrias a iscriere una lìtera de denuntzia a su guvernadore
Christian Solinas.

Su polìticu ogiastrinu, at cumbidadu fintzas a su presidente a andare in su territòriu pro bìdere cun is ogros suos is dificultades fitianas de sa populatzione e de su sistema sanitàriu. Si liget in sa missiva: “Garbosu Presidente, scrio a Fostei, in deretura a Fostei, deliberatamente a Fostei, foras de su rollu chi tengio a comente de Consigeri regionale, pro lu contare ancora sa situatzione de sa sanidade in Ogiastra, situatzione chi conoschet bene, tanto de s’èssere pigadu pubblicamente s’impignu a agatare solutziones, no ùrtimu su 21 de arbili coladu, cando – presentes totus is rapresentantzas localis, istitutzionales e sotziales – su problema printzipale parriat èssere sa nòmina de su diretore generale, gai mannu chi totus is àteros, no esistiant. E gai est acontèssiu.

Epuru, dae tando, sa ASL nostra unu diretore lu tenet, ma is problemas, mancare is impignos mannos pigados, is problemas verdaderos, abbarrant. Antzis, aumenatant. Dae tando est silentziu, nemos faeddat, asuta de s’efetu de una (in)cosciente narcosi, a palas su prus de is perfetos silentzios de is innotzentes. Dae tando peruna boghe de democràtica denuntzia si nd’est pesada.

E sa mia, oe, est una boghe de denuntzia. Su spidale de Lanusei est patende meda: su Puntu nàscida non nc’est prus; Cardiologia at serradu (e a su nàrrere chi una batalla po s’Emodinàmica, is cardiopàticus, l’ant fata); su Pronto Socorso est un’anticamera sbuida, in unu spidali cun pagus ortopedicus e prus pagus anestesistas; su servìtziu de Neuropsichiatria est sboidu; s’elisuperficie a servitziu de s’emergentza-urgentza, mancai is promissas mannas, non est mai partia.

Sa medighina territoriale est unu puzzle chene tesseras, abompiadu de chini, intra milla dificultades, est sa ghia, ma chene risultados: comunidades interas sunt chene medicu de famìlia e chene guàrdia medica né turistica, in custu territòriu turisticamente vocadu; su servìtziu de su 118, in Tortolì, bivet a comente podet a sa ridutzione manna de su personale
solu gratzias a su sacrifitziu de is operadores in servìtziu.

Custus sunt is problemas, e sa rispusta de bos’àterus est semper e solu una: non ci sunt medicos, e sa curpa est de chini, finas a immoe, no at scipidu programmare, e po agatare una solutzione iat a serbire una rivolutzione, o una riforma, comente cussa aprovada, sustenida fintzas cun is agiudos cumpratzidos de nos (in is bursas de stùdiu e in is RAR chi ancora depint cunsignare), una riforma monca, atzopiada dae is atos aziendales chi no ant tentu ancora esecutzione.

E tando is medicos – bivat sa rivolutzione – ddus importamos de Cuba, chene pensare a is medas, giòvanos professionistas, sardos, ogiastrinos, chi si nde andant ca agatant in àteros logos una diversa e prus forte motivatzione, cussa chi custo sistema, chi bos’àteros, solu bos’àteros, oe, seis is responsabiles, no est in gradu de ofrire e garantire.

Deo creo, de fronte a is fainas e a is giustificatziones, chi pagu ballint, de s’Assessore a sa sanidade e de s’aparadu suo finas a is ùrtimas articolatziones territoriale, de creo chi totu  custo non si potzat bariare prus.

No innoghe, non dae nos, in ue patimos sa pandemia de su spopolamentu. No innoghe, non dae nos, in ue s’ammarariamos a comente in tzitade e imbetzamos de prus. No innoghe, non dae nos, in ue ònnia sfortzu est fatu po abompiare s’emorragia de is giòvonos chi si ndi andant pro non torrare. Deo la cumbido duncas a bènere inoghe in Ogiastra, Presidente. Bengat, fintza a manere informale bengat a bìdere su spidale nostru sboidu de medicos, ma non de patzientes, bengat a bìdere su traballu mannu de is operadores sanitarios nostros, chi pro amore, solu pro amore de custa terra e de su traballu intzoru, abompiant. Bengat, Presidente, bengat a bìdere sa gente cantu patit. Gai at a podere pigare cuscientzia de sa gravidade de sa situatzione. Deo seo pronto a lu fàghere acatu. E cun mie totus is ogiastrinos, cussos chi ant pèrdiu sa fiede e sa passientzia. In abetu de una rispusta, cordialmente la saludo”.

“Progetto finanziato con l’Avviso Pubblico IMPRENTAS annualità 2021-2022”

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22