Binti annos a oe est cumentzadu su progetu “Memòria e Identidade”

S’òpera riproduit una fotografia de artu balore etnogràficu e est istada realizada dae s’artista Bruno Pisu.

De s’imàgine riproduida s’ischit chi est istada impreada comente cartulina in sos primos de su ‘900 e diat pòdere èssere una de sas primas cartulinas de sa Sardigna comente ispiegant sos membros de s’assòtziu de Orthullè chi at promòvidu sa realizatzione de su murale a binti annos dae s’inghitzu de su progetu “Memòria e Identidade”.

A presentare s’òpera a sos mèdios de comunicatzione sotziales est istadu su sìndigu de sa bidda subra-montina Ennio Arba, chi in unu messàgiu longu in facebook at iscritu:

“S’artista de Orthullè Bruno Pisu at realizadu custu murale bellu meda a s’intrada de sa bidda, chi rapresentat sete òmines de Orthullè, sete antepassados nostros, cun su bestidu traditzionale a sos cumintzos de su ‘900.

S’òpera, bòlida meda dae s’Amministratzione Comunale, est istada cummissionada a s’Assòtziu “Sòciu po su de jocu de sa murra” a s’internu de su progetu “Memòria e Identidade”, chi cunsistet in sa riprodutzione fidele petzi de fotos in biancu e nieddu chi rafigurant momentos de istòria de sa comunidade nostra.

Si tratat de una de sas foto prus antigas (si non sa prus antiga) chi rafigurat gente de bidda e sa didascalia, bogada dae sos iscritos de Vittorio Angius, allegat de s’orgòlliu, de su coràgiu e de sa solidariedade de su pòpulu de Orthullè.

Est fintzas cun custas òperas chi su cuntzetu de comunidade benit afortigadu, a traessu  sa memòria basada subra imàgines, sonos, contados, manufatos, chi arrichint su patrimòniu culturale nostru e chi nos projetant cara a unu tempus benidore prus profetosu a su cale, totus paris, semus traballende.

A nùmene de totu sa tzitadinàntzia de Orthullè disigiamus fàghere sos cumplimentos e ringratziamentos prus singillos a Bruno, a s’Assòtziu de sa murra e a totus cussos chi ant contribuidu a sa realizatzione de cust’òpera mastra”.

“Progetu finantziadu cun s’Avisu Pùblicu IMPRENTAS annualidade 2021-2022”

Su casu de sa morte de una femina chi at abbolottadu Casteddu e tottu sa Sardigna intrea s’annu passadu, s’incarrelat a una fase nova de su zudissiu.

Igor Sollai, 43 annos, chi po como est intro de sa presone de Uta, si est preparande po accomettare luego su zudissiu po aere mortu sa muzzere, Francesca Deidda, de 42 annos. S’omine at cunfessadu su delittu, chi est bistadu fattu in sa domo insoro in Santu Sperau in su mese de Maju 2024, ammittinde puru de aere cuadu su corpus.

Cun su depositu de sos urtimos risurtados fattos dae sa Procura de Casteddu, in mesu de sos cales bi est sa resessia de sa lotomia, sunt finidas sas crompiduras de ammaniada. S’esamene de su corpus at cunfirmadu sa violentzia isferitzada de su delittu: Francesca est bistada fartada a su nessi otto bortas cun d’unu marteddu, chircande a sa disisperada de si diffendere, ma chentza bi resessire a si che fuire dae sa furia de su maridu.

Su corpus de de sa femina est bistadu acciappidu solu pustis de duos meses, su 18 de triulas, serradu intro de una bussa manna disamparadu in sas campagnas in mesu de Sinnai e Santu Idu, accanta a s’istatale bezza 125. Un’accattu chi at battidu atteru dolore a custa disgratzia, abbolottande sos de famiglia e sos amigos giai afferiados dae s’isettu longu.

Sollai at cunfessadu de aere mortu sa muzzere in su mentres chi lu fit preguntande in sa presone de Uta su pubbricu ministeriu Marco Cocco, su 22 de su mese de sant’Andria passadu.

Intamene, addurat azzesa sa dibatta supra su motivu de su delittu. Sa deffensa escluidit chi siat bistadu fattu a belle posta, nande chi tottu est sutzessu in d’unu momentu de arrenegu. S’accusa, invetzes, narat chi su mortoriu siat bistadu fattu pro itte su maridu cheriat balanzare dinari ca sa muzzere teniat un’assigurazione supra sa vida sua. Cun s’isserru de sas scruccullas chi si faghent a s’incumintzu, s’isettat in pagu tempus sa torradura de su corpus a sos familiares, chi ant in pagu tempus podere faghere s’interru de Francesca.

Sa comunidade de Santu Sperau, chi est galu attrippada, si est preparande a onorare sa memoria de sa femina. S’indolimentu po sa perdida si ammisturat a s’arrenegu po sa violentzia patida, atzendinde un’attera borta sa dibatta supra su bisonzu de diffendere sas feminas dae istinnas e violentzias intro de sas domos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22