Sardigna si cunfirmat a livellu natzionale sa regione cun prus banderas biaitas: bìndighi sas localidades premiadas dae su reconnoschimentu de sa Fundatzione pro s’educatzione ambientale (Fee) chi garantit marinas netas e mare lìmpidu, cun unu passu a in antis respetu a s’annu coladu rapresentadu dae s’intrada de Budune.

A custos nùmeros s’agiunghent posca sas banderas biaitas pro sos aprodos, deghe in totu. Sa Sardigna in generale est a su de sete postos in Itàlia fatu fatu Ligùria (32), Campània, Toscana e Pùglia (18), Calàbria e Marche (17).

A s’internu de s’Ìsula a fàghere de maere est s’ex provìntzia de Tàtari cun unu tertzu de sos reconnoschimentos: premiados Badesi, Casteddu Sardu, Sòssu, Sassari, Lungone, Aglientu, Trinidades de Agultu-Vignola, Sa Madalena, Palau, Budune, intrada in su 2022. Posca b’at Aristanis, Cuartu Sant’Aleni e Santu Antiogu, e pro s’Ogiastra Tortuelie e Barì.

Proportziones chi si poderant belle fintzas in sa graduatòria de sos portigheddos. Su nord de sa Sardigna binchet Cala Gavetta (Sa Madalena), Portu turìsticu comunale de Palau (Palau), Portu de Lungone, Marina de s’Orso de Poltu Quatu (Altzaghena), Porto Cervo Marina (Altzaghena), Marina de Porto Rotondo (Terranoa), Marina de Portisco (Terranoa), Porto turìsticu de Casteddu Sardu. In Ogiastra reconnoschimentu a Marina de Baunei e Santa Maria Navarresa. Mentras su sud Sardigna si devet acuntentare de sa Marina de Capitana, in su litorale de Cuartu.

Fintzas ocannu – ispiegat sa Fee- est istada donada importàntzia manna a sa gestione de su territòriu e a s’educatzione  ambientale promòvidos dae  sas amministratziones pro preservare s’ambiente e promòvere unu turismu sustenìbile. Unos cantos indicadores: impiantos de depuratzione e retzas fognàrias, gestione de sos refudos, initziativas de promòtzione pro una mègius vivibilidade  in su perìodu istadiale, valorizatzione de sas àreas naturalìsticas, cura de s’arredu urbanu e de sas marinas, possibilidades de atzessu a su mare pro totus sena limitatziones.

Matteo Gregorio, sucurridore marìtimu in sa Guardia Costera de Arbatassa, at  mòvidu in bitzicleta in dae Maracalagonis  sàbadu s’ 11 làmpadas a ora de is 18.30 e arribbadu su 15 a mesudie. In totu at fatu 864 km e 8.617 metros de dislivellu in modalidade “ultracycling” in 42 oras de pedalada efetiva.

Lòmpidu a Orosei a ora de is 8 e mesu de meria,  at acodidu a si papare calincuna cosa pro torrare in fortzas e posca s’est corcadu. A dolu mannu però no est resèssidu a si pasare pro more de su trèulu de una discoteca.

At ismurgiadu a ora de is  6:30 e at torradu a mòvere conca a Terranoa fatu de sa ss 125 “orientale sarda”, cun bentu de grecale contràriu. Fadigadu e mortu est lòmpidu a Terranoa, acanta s’est pasadu in unu B&B. Ischidada a chitzo partèntzia conca a Santa Teresa acanta est lòmpidu cun dolores fortes pro more de su meda tempus sètzidu in sa seddigedda de sa bici. A S’Alighera est arribbadu a is 19:00. A pustis de àere chenadu, reposadu e posca torradu a mòvere a is 6:00 dae S’Alighera conca a Teulada pro arribbare a Maracalagonis a ora de is 12:00, a pustis de 30 oras de pedalata sena pasu.

Unu pagu de reposu in una banchita in unu distribudore de benzina in Santu ‘Uanni Sruexu e un’ora e mesa in una banchita in Teulada. In Bugerru at brincadu su rifornimentu de abba e sa chena  conca a Nèbida. Apo Dae inoghe su biàgiu est andadu a in antis cun su telèfonu sena signale e cun prus pagu de mesa burràscia de abba, pro fortuna at agatadu un’agriturismu in mesu de su nudda chi dd’at cumbidadu abba e cafè.

Est istada un’esperièntzia fantàstica chi dd’at permìtidu de ammirare is bellesas de s’ìsula, impreende solu sas ancasa suas e sa bitzicleta chi est istada s’ùnica cumpàngia de custu meravigiosu biàgiu fatu de is caminos de sa Sardigna. Un’impresa duncas chi at a abbarrare in s’istòria de custu isport! Amus a bìere si calicun’àteru at a chircare de superare su record de Gregorio.