Sos pastores sardos torrant a protestare contras su rincaru de sos prètzios
A tres annos dae sa gherra de su late, torrant a si chesciare sos pastores sardos chi eris sunt falados in caminu pro pedire s'interventu istatale e protestare contra ss’aumentu de su prètziu de contzimes, gasòliu e energia elètrica. Sa mobilitatzione est torrada a mòvere dae ue fiat comintzada in su 2019, dae su ponte subra su caminu Vitzi Sòlogo.
canale WhatsApp
In s’ierru de su 2019 sos allevadores sardos aiant detzìdidu de protestare pro pedire prètzios prus giustos respetu a sos 55 tzentèsimos a su litru pro su late de berbeghe e 44 tzentèsimos pro cussu de cabra pagados dae sos industriales. “Mègius a nche lu imbolare chi atzetare prètzios gasi bassos” naraiant sos pastores in su freàrgiu 2019, chi aiant peri meletzadude blocare sas eletziones regionales de su 24 freàrgiu si non s’esseret arribbados a unu acòrdiu cun sas istitutziones: “No at a intrare nemos a votare!”
Sas protestas si fiant concruidas cun una crèschida de sos prètzios pagados a sos pastores, chentinas de denùntzias e diversos protzessos. Duos de custos s’ant a tènnere etotu in sas chidas imbenientes, cando sos acusados ant a èssere mutidos a rispòndere de su reatu de blocu istradale. “Ambos sos protzessos sunt sos ùnicos in Sardigna acanta si protzedit pro su reatu de blocu istradale” iscriet a riguardu s’assòtziu indipendentista Libertade.
Eris una fila longa de tratores e àteros mezos agrìculos cun deghinas de allevadores sardos duncas ant protestadu contra su caru energia e s’aumentu esageradu de sos costos de sas matèrias primas.
Sos pastores si sunt atopados eris a merie in su bìviu Vitzi-Sòlogo, dae ue si sunt postos in caminu fatu de sa SS 131, in diretzione zona industriale de Pradu Sardu (Nùgoro).
“Nos bolides iscraos, ais a tènnere rebellos” est istadu iscritu in unu de sos medas cartellos picados a sos tratores.
S’initziativa de chèscia arribat a pustis de s’àtera protesta manna de sos pastores de su 2019, cando aiant fuliadu su late in caminu pro otènnere unu prètziu prus giustu pro su late.
“Progetto finanziato con l’Avviso Pubblico IMPRENTAS annualità 2021-2022”
© RIPRODUZIONE RISERVATA
