Si nd’est andadu Giampiero Galeazzi.

S’est mortu a 75 annos, su giornalista isportivu de sa Rai chi dae annos gherraiat contra unu male malu.

Una làurea in economia e unu passadu de isportivu a grandu livellos in su canotàgiu, acanta aiat bintu su tìtulu italianu in su sìngulu in su 1967 e in su dòpiu cun Giuliano Spingardi in su 1968. Semper in custu ùrtimu annu aiat partetzipadu a is seletziones pro is Olimpìades de Tzitade de su Mèssicu.

A pustis arribbat a su giornalismu, cun s’assuntzione in Rai in is primos annos ’70. In is annos ’80 arribbant sa Domenica sportiva, Mercoledì sport, 90° minutu, trasmissiones istòricas in ue su naturale e sa cortesia de Galeazzi si còjuat in manera perfeta cun unu fùbbalu galu antigu, in ue is giornalistas podiant calare a campu deretu a pustis de is partidas: de subènnere is intervistas improvisadas suas a is eroes de cussu chi a s’època fiat su campionadu prus bellu de su mundu.

Maradona, Platini, Bruno Conti e is allenadores istòricos comente Liedholm, Radice e Trapattoni. Is chi issu intervistaiat, bìnchidos dae s’imponèntiza fìsica de su cronista, non podiant fàghere a mancu de contare totu su chi pensaiant.

De issu s’ammentant is telecrònacas de is eventos isportivos comente sa mìtica medàllia de oro de is frades Giuseppe e Carmine Abbagnale a is Olimpìades de Seul in su 1988 e sa de Antonio Rossi e Beniamino Bonomi a Sydney 2000.

In is annos ’90 e is 2000 Galeazzi devenit unu pessonàgiu televisivu amadu dae totus, dende proa de èssere geniosu e brulleri. De ammentare is ballitos suos a Domenica In cun s’amiga Mara Venier, cantzones, iscenas, su dopiàgiu de su film Space Jam.

Cun issu si nd’andat unu modellu de cronista isportivu, capatzu de trasformare is garas in momentos èpicos, fintzas gràtzias a una cumpetèntzia tècnica manna, gasi comente is telecronacas de su tennis in còpia cun s’amigu Adriano Panatta, esaltende is atletas e trasmitende s’impresa immortale in sa memòria colletiva.

Medas is messàgios de consulèntzias de totu su mundu de s’isport, dae is iscuadras de fùbbalu a is istitutziones.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Si est custituida in su notaju sa Delegassione po Poderare sa naschida de sa IGP porcheddu de Sardigna, e si est assemidada in manera uffitziale sa Delegassione Iscentifica, chi in sa prima assortida, fatta in Macumere, in s’agentzia de Contas, su 15 de Abrile, at tribagliadu po approntare, medas puntos de su regolamentu de produssione de custa saporitesa totta sarda.

S’intentu, preparare sos documentos chi serbint de presentare a sa Commissione Europea po alcansare su riconnoschimentu de s’arrennomini IGP e faghere naschere una delegassione chi tenzat commente faina printzipale cussa de creare un’unione de sos pastores, masellajos e sos trasformadores de s’eccellentzia sarda, chi potant ordiminzare una filera e dare unu fentomu balidu a su mercadu, po tottu cussu chi appartennet sas fases de pesadura e de trassa de sos porcheddos chi teppent andare a su mercadu.

A sa mattessi manera,bardare sa produsssione locale sarda dae su periculu de battire importassiones chentza controllu perunu, e duncas tutelare s’issida de su prodottu. Unu arminzu balidu puru po sos consumadores, chi ant podere tennere unu trattadore chi potat garantire supra su rispettu de unu regolamentu de produssione. Fases importantes meda, cussas de sa naschida de sas duas delegassiones.

Importante meda at essere sa retza de sos sardos in Italia e in su mundu: su motivu de sa presentzia in sa delegassione de Bustianinu Mossa, presidente de sa Fasi, sa retza de sos corriglios sardos in Italia.”Sos emigrados” si dant itte faghere in cust’intentu commente consumadores,sustenidores,ambasciadores, narat Mossa. Semus 2,5 miliones sos sardos fora de sa Sardigna, ispartinados in tottu su mundu.

Solu in Italia sa Fasi contat casi 30.000 iscrittos, in 68 delegassiones presentes in 12 regiones de s’Italia. Sa pius a mesudie est Ciampino. Su tzentru e su norti de s’Italia sunt su puntu de arribu menzus de operajos, pastores,sordados e istudiantes ligados in manera chi non si podet isligare dae sa cultura sarda chi prima de tottu est sa cosa de mandigare. Esist commente una venerassione de su porcheddu. E difattis partizas sunt sas initziativas chi tenent commente base custu prodottu pittitteri.

Tenimos po custu un’istruttura de negossiu de produttos de calidade funguda, a sa cale si diritzant sos sardos emigrados.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22