Su Casteddu in sa partida contra sa Sampdoria depet bìnchere a ogna còstitu: serbint tres puntos, ca a pustis de oto garas, non nd’at galu bintu una.

S’iscuadra ghiada dae Walter Mazzarri, difatis, est ùrtima in classìfica cun tres puntos ebbia, otentos cun tres parègios. Immoe, duncas, a pustis de duas partidas pérdidas e una paregiada in domo contra su Venezia, cun sa Sampdoria est obligada a bìnchere, si bolet adderetzare s’istajone.

No at èssere comente andare a funtana, mancari s’iscuadra genovesa non siat comente a sa de s’annu coladu allenada dae s’ex ruju-blù Claudio Ranieri, òmine e tècnicu sabìu, meda istimadu is Sardigna pro èssere renèschidu a fàghere torrare is sardos dae sa Sèrie C a sa A, cun duos promotziones de sighidu. Ocannu is lìgures sunt allenados de Roberto D’Aversa, e a bellu a bellu sunt insertende su ghetu giustu pro pòdere giogare bene.

Is òmines de Mazzarri, si bolent superare sa crisi de resurtados in custu comintzu de campionadu, nd0ant a dèpere bogare totu sa balentia issoro.

Tzertu, sa pàsida de sa Sèrie A pro is cualificatziones a su Mundiale in Qatar in su 2022, no at agiudadu meda sa situatzione, sende chi medas giogadores, comente is duos uruguayanos, ant a dèpere afrontare unu biàgiu longu pro torrare in Sardigna.

Amus a bìdere in cale cunditzione fìsica ant a lòmpere pro sa partida e si su tècnicu ruju-blu ddos at a fàghere giogare. Seguramente s’isperàntzia pro su Casteddu at a èssere chi su capitanu,Joao Pedro siat de muta bona pro indanimare s’iscuadra cun giogadas bellas e, mancari, faghende carchi gol.

Semus seguros chi at a bastare a bìnchere custa isfida contra is dorianos pro nche bogare sa timoria chi s’est intesa in is ùrtimas partidas, mescamente in su segundu tempus. Tocat a fàghere innamorare is tifosos cun su giogu bellu, e in domo diat a èssere su logu mègius pro chi torret a capitare. Isperamus bene.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Est istada una manifestatzione manna a beru sa de ocannu, organizada dae sa sienda Agris de Tanca Regia in Abbasanta.

Sunt istados 287 is caddos presentes a su 59° Prémiu Regionale Sardu de allevamentu de caddos, mancari su Covid, in custos duos annos s’allevamentu at poderadu bene.

A organizare s’atopu de custa domìniga colada, est istada s’Agentzia Agris Sardigna-Servìtziu Chirca pro sa Calidade e Valorizatzione de is Produtziones de Caddos, in collaboratzione cun su Comitadu Regionale FISE Sardigna, suta de s’atentzione de su Mipaaf.

Su campione regionale sardu nou est Cloes, de ratza sedda italianu dae Clarimo e Nora De Bois (dae Orame) pesada dae Raffaele Mulas de Cabuterra e presentada dae Pietro Arba.

S’ebba dae tres annos at bìnchidu sa cumbinada chi at postu in paris is resurtados de su “brìnchidu in libertade”, in ue est lòmpida segunda e sa proa “morfo-atitudinale” in ue s’est classificada in su de tres.

Cloes at pigadu in totale 237,6 puntos, segunda est lòmpida Coupe de Rain, pesada dae Enrico Olla e de propiedade de Giangavino Serra, presentadu dae Antonio Niedda. In su de tres Hannibal Lecter, pesadu dae Antonio Piras e de propiedade de Enrica Dettori, presentadu dae Riccardo Dettori

Su “brìnchidu in libertade – sena cadderi- est istadu bìnchidu pro sedda italianu dae Campidanu, pesadu dae Efisio Lepori de Santa Giusta e presentadu dae Agostino Mascia.

Tra is anglu-arabos de tres annos, vitòria pro Coro Eranu, pesadu dae Luigu Ladu dae Benetuti e presentadu da Andrea Pes.

Pro is caddos de duos annos, at bìnchidu sa proa dae prontesa a su brìnchidu, s’ebba Deboi, pesada e presentada dae Leonardo Galleri de Biddanoa Monteleone. Su primu de is anglu-arabos est istadu imbetzes Doria de Francesco Murgia, issu puru de sa bidda de su poeta a bolu Remundu Piras.

A premiare is binchidores est istadu su dirigente de is Servìtzios Ìpicos Agris, Raffaele Cherchi, su presidente de sa Fise Sardigna Stefano Meloni e sa sìndiga de Abbasanta Patrizia Carta.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22