S’azienda farmatzèutica americana Merck at a pedire cantu prima s’autorizatzione de apretu pro sa cummertzializatzione sua, comente comunicadu oe in die.

Finas a immoe is isperimentatziones ant dimustradu sa capatzidade de custa meighina, chi si dept pigare in modu orale, de reduire s’arriscu de ricòveros e de detzessos. Sa noa at fatu bolare is atziones de su grupu in bursa.

Ma comente funtzionat? Segundu su chi s’ischit finas a immoe, sa meighina, andat assùmida deretu comente essint a campu is primos sìntomos de Covid, pro chimbe dies duas bias a sa die, duncas deghe pìndulas in totale. S’est mustradu meda eficatze pro reduire is arriscos de ricòveru e de morte, e paret chi funtzionet fintzas contra is variantes gama, delta e mu. Pro Anthony Fauci, chi at bidu is datos presentados dae s’azienda, is resurtados sunt ispantosos mancari, at pretzisadu, sa cosa mègius est a non si contagiare e a si vatzinare.

S’azienda at giai depositadu a sa Fda, sa Food and Drug Administration, sa recherta pro s’autorizatzione a s’impreu in apretu e at comintzadu sa produtzione, previdende 10 milliones de doses intro sa fine de su 2021. In Itàlia sunt sete sos ispidales chi dd’ant a isperimentare.

Custa meighina diat abèrrere iscenàrios noos in cura de su virus, cun sa fatzilidade de s’assuntzione, evitende fintzas is filas longas de persones chi si sunt sutapostas in passadu a is vatzinatziones.

Craru, a medas at a bènnere a mente s’iscena de su film de Matrix e de seguru no ant a mancare is atzinnos a sa paristòria tzinematogràfica famada chi at tentu comente protagonista Keanu Reeves.

In prus de totu benit a mente una dimanda, in casu de aprovatzione de su produtu de s’azienda farmatzèutica Merck, is “no vax” ant a devènnere “no pill”?

In prus de tènnere unu significadu ambìguu e de fàtzile ironia in sa limba sarda, diant pòdere ammoddiare sa lìnia issoro e atzetare cun prus fatzilitade de assùmere sa meighina?

Su tempus ebbia at a pòdere iscoviare ite at a capitare in is meses sighentes, in s’ora isperamus chi cantu prus persones possìbile andet a si vatzinare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Su benidore est semper prus a presu.

A nos fàghere acurtziare ancora de prus, est sa briantzola Oversonic Robotics chi at presentadu ‘RoBee’, unu protòtipu de 170 tzentìmetros de artària in printzìpiu destinadu a traballaduras perigulosas e posca a su campu sanitàriu, cumpresos is repartos comente su Covid in ue s’espositzione de su personale podet èssere un’arriscu.

Sa start up istimat de pònnere in su mercadu is primos esemplares a cumentzare dae su 2022, cun unu totale de 50 robot bèndidos durante s’annu.

S’amministradore delegadu e co-fundadore de s’azienda, Paolo Dentes, at afirmadu chi sunt giai istados fatos is primos pre-òrdines, e at iscoviadu chi mancari siant in su cumintzu de sa faina impresnditoriale noa, cun probabilidade meda sa Bursa at a èssere unu possìbile arribu naturale pro una sotziedade de custa casta.

In austu ddoe est istada una crèschida de capitale dedicadu de Oversonic Robotics pro s’intrada de Fintel, sa finantziària de sa famìlia Bulgarelli, chi at achiridu su 33% de sa sotziedade briantzola.

Sa sotziedade, chi tenet comente co-fundadore Fabio Puglia, laureadu in matemàtica e fìsica cun indiritzu in astrofìsica a s’Universidade istatale de Milanu, intrat in unu setore de primore a livellu mundiale e puntat subra una màchina de pesu cumprèndidu tra is 65 e is 75 chilos (a segunda de sa cunfiguratzione de impreu) chi rèplicat non isceti in manera estètica s’istrutura mecànica de su corpus umanu, cun 40 giunturas mòbiles e unu servìtziu cumpletu de sensores chi ddis permitit de bìdere e navigare in manera autònoma in s’ispàtziu a inghìriu.

Is duos cofundadores ant afirmadu chi giai dae custu atòngiu at a èssere sutapostu a totus is tzertificatziones, e a pustis at a èssere unu produtu adatàbile a beru a is bisòngios de su mercadu: fintzas personalizàbile, ma de prodùere in iscala manna.

Un’innovatzione importante chi permitit a s’Itàlia de intrare dae protagonista in custu mundu tecnològicu meda e cun possibilidades infinidas pro su benidore.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22