Unu gestu eròicu chi at evitadu una tragèdia.

Faeddamus de unu carabineri de Ceraxus, Simone Ambu, s’òmine chi at sarvadu unu pitzinnu de 12 annos chi arriscaiat de mòrrere afogadu in su ritzolu Lesina, a s’intrada de sa Valtellina.

Su fatu est acontèssida eris a merie: su pitzocu si fiat betadu a s’abba paris cun unos cantos fedales suos ma, forsis pro unu malore, no est torradu a pìgiu. Is bagnantes ant fatu gente e in su logu est arribbada una màchina cun duos carabineris.

Su militare, Simone Ambu, 27 annos, in fortza a s’istatzione de Delebio, no at pèrdidu mancu unu segundu: s’est liberadu de is bestires e s’est iscutu in s’abba in su puntu acanta is amigos aiant bidu isparire su pitzocu, andende suta de unos 3 metros. A pustis de unu pagu su militare est torradu a essire a pìgiu cun su giòvanu.

Su carabineri est resèssidu gasi a nde ddu bogare de s’abba: is cunditziones de su pitzocheddu fiant mala a beru ma est istadu rianimadu dae is sanitàrios e est istadu leadu in s’ elicòteru, in còdighe ruju, a s’ispidale de Bèrgamu, in prògnosi riservada.

Amus collidu sa testimonia de su carabineri, de su chi est acontèssidu in su riu chi no est mannu meda, ma perigulosu pro more de sa currente e de is tuvos cuados. «A pustis de s’avisu de sa tzentrale operativa, apo intervènnidu deretu. Mi nde so pesadu is bestires e mi nche so betadu a s’abba pro sarbare su pitzocheddu. A pustis de s’interventu de su personale mèdicu su piseddu est istadu elitrasportadu a s’ispidale de Bèrgamu e est ancora in prògnosi riservada».

Simone no at isetadu unu minutu-segundu. Unu gestu lestru cussu de su de su carabineri sardu, chi dae cando a giovaneddu at seberadu de bestire sa divisa de sa Benemèrita, at cumpresu chi coràgiu e sàmbene fritu fiant sas dodas prus importantes pro custu traballu.

Un’interventu de eroe, est istadu tzelebradu in custas oras dae is collegas suos, dae is familiares e dae sa terra sua, fiera de issu. Ambu cummentat gasi: «Pro mene est istadu normale, dia èssere prontu a ddu torrare a fàghere àteras bias. Cando faghes custu traballu deves tènnere s’istintu pro intervènnere e in su matessi tempus mantènnere sa calma, pro non cummìtere imprudèntzia».

Attività realizzata col contributo della Regione Sardegna – IMPRENTAS 2020-2021. LR 22/2018, art. 22

Pro su Casteddu sa prima partida de su campionadu est istada istragosa meda, pro more de su Spezia.

In s’istàdiu Unipol Domus, su disafiu est acabbadu 2-2, cun is lìgures de Thiago Motta a in antis pro duas bortas gràtzias a is retes de Gyasi e de Bastoni.

A cumintzu de sa gara is atacantes de su técnicu argentinu no ant donadu puntos de riferimentu a su Casteddu, faghende ammachiare is defensores ruju-blu.

Difatis Gyasi, gràtzias a una triangulatzione cun su cumpàngiu Verde, cun un’iscuta de pee at portadu in vantàgiu is ispetzinos. Is ruju-blu ant proadu a paregiare ma is lìgures ant fatu guàrdia bona, e su portieri Zoet at fatu una bella parada a sa coa de su primu tempus.

A pustis su cumintzu de sa segunda parte de gara, su Spezia est istadu capatzu de agatare sa rete de su duos a zero cun Bastoni, bravu a isfrutare unu passàgiu de Gyasi.

Ma pròpiu cando su Casteddu pariat ammortighinadu, est lòmpida sa reatzione de is sardos, ghiados dae su capitanu Joao Pedro.

Prima at acurtziadu is distàntzias cun unu gol serbidu dae su cumpàngiu de atacu, Pavoletti, e a pustis de una pariga de minutos at marcadu sa rete de su duos a duos, gràtzias a unu rigore.

Finas a s’acabbu de sa gara is meres de domo ant proadu a conchistare is tres puntos, ma su resurtadu de sa partida no at prus cambiadu.

Pro comente si fiat posta sa partida, a su Casteddu est andada meda bene, ma s’allenadore ruju-blu, Semplici, no at a èssere grandu cuntentu.

Una partida giogada male in sa zona de sa defensa pro is sardos e in prus de s’àteru sa reatzione est lòmpida a pustis de àere pigadu duos tzafos dae un’iscuadra chi no est tra is prus balentes de sa Sèrie A.

Joao Pedro s’at carrigadu a coddu s’iscuadra in s’ora de su peus istragu, ma custu no at a bastare semper. Si in sa partida sighente contra su Milan su Casteddu at a giogare comente a lunìs, seguru chi at a pèrdere in malu modu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22