Raffaella Carrà s’est morta a 78 annos, a dare s’annùntziu de sa dipartida sua est istadu su cumpàngiu Sergio Japino.

S’artista manna s’est morta a pustis de una maladia chi at tentu cuada a s’opinione pùblica finas a s’ùrtimu, sena iscoviare nudda. Unu modu pro non fàghere pònnere in umbra in sa gente s’ammentu de cussa alligria e energia chi issa trasmitiat.

Su beru nùmene suo fiat Raffaella Maria Roberta Pelloni. Su nùmene de arte suo si dd’aiat consigiadu s’iscenegiadore e regista televisivu Dante Guardamagna, chi si fiat ispiradu a su nùmene de su pintore Raffaello Sanzio e a cussu de un’àteru pintore, Carlo Carrà.

S’esòrdiu televisivu suo est de su 1961 a su costàgiu de Lelio Luttazzi, posca in sa cummèdia musicale Scaramouche (1965). In su 1970 diat istada mutida a Canzonissima, divenende sa prima ballerina de su piticu ischermu in biancu e nieddu.

Durante sa carriera sua at dimustradu de ischire fàghere totu: ballerina, cantante, atora e autora. Definida sa reina de sa televisione italiana est resèssid a a si fàghere amare dae is italianos de ogna edade.

Capatza de rivolutzionare is costùmenes italianos cun sa manera sua de si bestire, a cumentzare dae Canzonissima, aiat fatu discùtere meda su fatu de su ballu Tuca Tuca.

S’istella de sa tv cun is pilos a cascheto colore plàtinu chi totus copiaiant, fiat intrada in iscena cun s’imbìligu in campu e cun su ballerinu Enzo Paolo Turchi si tocaiant a pare pare sa conca, is coddos, is fiancos e is ancas. A tempos de oe, torrare a bìdere cuddas imàgines faghet rìere, ma a s’època aiat iscasiddadu medas polèmicas e crìticas, peri si sa cantzone fiat arribada prima in totu is classìficas. Famada meda s’isceneta de Carrà cun Alberto Sordi, chi aiat istorchidu sa matessi dantza.

Nche diat bòlere tropu tempus pro fàghere sa lista de is programmas conduidos in Itàlia e in Ispagna, acanta fiat ateretantu amada, comente in Sud Amèrica. Carrà fiat una bera istella internatzionale, tra is pagas in Itàlia .

In sas ùrtimos disponimentos suos, Raffaella at pedidu unu baullu de linna sena decoratzione e un’urna acanta allogare is chinisinas suas.

Adiosu Raffaella, semus seguros chi gràtzias a su risu tuo as a resèssere a torrare mègius finas su logu acanta ses andada.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

S’Itàlia, immoe chi at iscunfitu su Bèlgiu, s’iscuadra nùmeru unu su mundu est finida tra is primas bator de Europa e non si bolet prus firmare.

Martis s’Ispagna a Londra nos at a nàrrere si est un’iscuadra potente a beru, finas si at giai dimustradu de èssere una de is prus fortes de sa cumpetitzione.

Roberto Mancini nch’at semper crèidu, sa fortza de is ideas suas e sa calidade issoro ant costruidu, plasmadu un’iscuadra chi no est galu perfeta, ma totus diat tìmere a dd’afrontare.

Is Asulos torrant a una semifinale de is Europeos noe annos a in fatu e cun totus is mèritos. Una natzionale capatza de superare su Bèlgiu in su pranu tàticu e de sa calidade, cun una fase difensiva a tretos mannosa e capatza de corpire cun s’atacu lestru.

Su Bèlgiu si movet bene, cun Lukaku e De Bruyne perigulosos, ma Bonucci e Chiellini faghent bona guàrdia e Donnarumma sarbat sa situatzione in duas ocasiones.

Ma a metade primu tempus s’Itàlia si trasformat e comintzat a impònnere su giogu suo. Su tzentrucampu asulu pigat su puntu in susu e sa mùsica càmbiat.

Barella isblocat sa partida cun unu gol chi est una prenda de tècnica e agilidade. Ma sa Natzionale non si firmat, e Insigne imbentat sa giogada: unu tiru cun su destru chi Courtois, in bolu, mancu tocat.

Su Bèlgiu però torrat in partida: De Lorenzo aterrat Doku e s’àrbitru cuntzedet su rigore. Lukaku in su dischetu ispiatzat a Donnarumma e is giogos si torrant a abèrrere.

Sa ripresa si torrat a abèrrere cun s’iscuadra de Martinez motivada e is asulos sufrint. In un’atzione de Lukaku Spinazzola est bravu a sarbare sa situatzione. Posca calicunu minutu a pustis su difensore devet essire in barella pro unu dannu a su tèndine de Achille.

A bellu a bellu is ritmos s’abbassant e a sa fine de sa partida decretat su passàgiu de su turnu pro is asulos. In sa semifinale is òmines de Mancini ant a agatare s’Ispagna, un’aversàriu chi mèritat respetu ma chi s’Itàlia bolet superare pro sighire su bisu de bìnchere s’Europeu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”