A pustis de un’annu de rinvios, is Olimpìades s’ant a fàghere.

Tra pagas chidas at a cumintzare s’Olimpìade de Tokyo, chi si diat dèpere èssere fata in s’istade 2020, ma chi est istada fata fugire a ocannu pro more de su Covid-19.

Difatis, bida sa situatzione mala, is atletas chi pro 4 annos s’allenant pro partetzipare a custu avenimentu importante, si sunt dèpidos arrèndere a sa realidade: tando sa cosa prus pretzisa fiat s’apretu causadu dae su Covid-19. Sa pròpiu cosa fiat sutzèdida cun totus is àteras manifestatziones isportivas mannas de su 2020, comente is Europeos de fùbalu chi sunt gioghendesi immoe.

Ma in fines, a pustis de un’annu de isetu, su 23 de argiolas is giogos a chimbe tzìrculos ant a cumentzare. mancari in Giapone siant torrende a aumentare is cundiduras, su presidente de su sótziu organizadore de Tokyo 2020, Seiko Hashimoto, at naradu chi no ant èssere fatos àteros rinvios.

Medas is novidades in custas Olimpìades, comente is bator isport noos aprovados dae su Sótziu Olìmpicu Internatzionale (apicada, surf, skat, karare e skateboard). In prus ant a torrare su baseball e su softball, chi mancaiant dae Pechinu 2008.

A Tokyo 2020 ant a partetzipare prus de 200 paisos, chi dae su 23 de argiolas a s’8 de austu ant a cumpètere in 33 isport pro 50 disciplinas.

E s’Itàlia comente est posta? Seguru at a proare a lòmpere a su mancu a 28 medàllias, comente is chi aiat bìnchidu a Rio de Janeiro 2016, e finas de prus, peri si no at a èssere aici fàtzile.

Ma a parte totu, sa cosa bella at a èssere chi is atletas chi ant coladu is ùrtimos annos a s’allenare, in fines, ant a tènnere sa possibilidade de dimustrare su valore issoro, e mancari fintzas de bìnchere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

De non creère su chi est capitadu a Maiorca. Sunt prus de setighentos is istudiantes ispagnolos, lòmpidos in s’ìsula dae oto comunidades autònomas, chi sunt istados contaminados dae Covid-19. Àteros tres mìgia, intrados in cuntatu cun is positivos, s’agatant immoe in cuarantena.

Is datos sunt istados donados dae is autoridades e dae su ministeru de sa Salude. Sa cundidura, si leghet in is giornales locales, s’est iscasiddada a càusa de su cuntzertu “reggaeton” in Plaza de Toros a Palma de Maiorca e de àteras festas barca e in is albergos.

Pro custu is autoridades ispagnolas ant abertu un’indàgine pro si nde segurare si is locales apant sighidu is régulas pro prevènnere s’ispàinu de su Covid-19. Dae unas cantas dies in Ispagna sa mascaredda no est prus obligatòria a s’abertu.

Custa no est bella noa pro s’economia de Maiorca, chi est intrada in zona ruja, pròpiu in su mègius de s’istajone turìstica.

Su chi est acontèssidu in is Baleares nos devet fàghere cumprèndere chi a su virus bastat pagu pro s’ispainare. Pro custu tocat a donare cura, pro ite a pustis de totus is sacrifìtzios fatos in custos meses e s’isperièntzia de s’annu coladu, diat èssere làstima a beru chi su virus si torret a iscasiddare in Itàlia e Sardigna.

Tzertu, gràtzias a is vatzinatziones s’arriscu est prus bàsciu, ma non totus sunt istados imunizados. Dae su 28 de làmpadas peri in Itàlia sa mascaredda no est prus obligatòria foras de is locales pùblicos e in is chidas sighentes ant a èssere torradas a abèrrere is discotecas a s’abertu.

Amus a bìdere. Meda at a dipèndere de comente s’at a cumportare sa gente: die cun die, in base a s’andamentu de su contàgiu, s’ant a pigare provedimentos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”