De non creère su chi est capitadu a Maiorca. Sunt prus de setighentos is istudiantes ispagnolos, lòmpidos in s’ìsula dae oto comunidades autònomas, chi sunt istados contaminados dae Covid-19. Àteros tres mìgia, intrados in cuntatu cun is positivos, s’agatant immoe in cuarantena.

Is datos sunt istados donados dae is autoridades e dae su ministeru de sa Salude. Sa cundidura, si leghet in is giornales locales, s’est iscasiddada a càusa de su cuntzertu “reggaeton” in Plaza de Toros a Palma de Maiorca e de àteras festas barca e in is albergos.

Pro custu is autoridades ispagnolas ant abertu un’indàgine pro si nde segurare si is locales apant sighidu is régulas pro prevènnere s’ispàinu de su Covid-19. Dae unas cantas dies in Ispagna sa mascaredda no est prus obligatòria a s’abertu.

Custa no est bella noa pro s’economia de Maiorca, chi est intrada in zona ruja, pròpiu in su mègius de s’istajone turìstica.

Su chi est acontèssidu in is Baleares nos devet fàghere cumprèndere chi a su virus bastat pagu pro s’ispainare. Pro custu tocat a donare cura, pro ite a pustis de totus is sacrifìtzios fatos in custos meses e s’isperièntzia de s’annu coladu, diat èssere làstima a beru chi su virus si torret a iscasiddare in Itàlia e Sardigna.

Tzertu, gràtzias a is vatzinatziones s’arriscu est prus bàsciu, ma non totus sunt istados imunizados. Dae su 28 de làmpadas peri in Itàlia sa mascaredda no est prus obligatòria foras de is locales pùblicos e in is chidas sighentes ant a èssere torradas a abèrrere is discotecas a s’abertu.

Amus a bìdere. Meda at a dipèndere de comente s’at a cumportare sa gente: die cun die, in base a s’andamentu de su contàgiu, s’ant a pigare provedimentos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Comente aìamus naradu a in antis de sa partida, sa gara contra is austrìacos est istada traballosa meda. Difatis sunt serbidos is tempos suplementares pro detzìdere cale iscuadra si diat èssere cualificada a is cuartos de finale de is Europeos.

Una gara a ue is austrìacos ant fatu de totu pro istorbare su bellu giogu de is Asulos, betendesi a pitzu de ogna botza e serrendesi in difesa ma prontos a su contratacu.

Is aversàrios sunt resèssidos a marcare una rete puru, cun Arnautovic – su giogadore prus balente de sa natzionale austrìaca – ma su VAR at annulladu su gol pro ite fiat foras de giogu.

A pustis de is noranta minutos de is tempos regulares, sa gara est abarrada in ecuilìbriu finas a is tempos suplementares, cando su tertzinu Spinazzola at serbidu una botza a Chiesa chi fiat lìberu in s’àtera banda de su campu. Su giogadore italianu est istadu bravu meda a firmare sa botza cun su pè e a marcare sa rete.

Su duos a zero pro is Asulos est lòmpidu unos deghe minutos a pustis, cun su tzentrucampista Pessina, chi at aici fatu duos gol in duas partidas.

Mèritu mannu però est istadu de s’allenadore Mancini, chi at intzertadu is càmbios de is duos giogadore, paris cun s’atacante Belotti chi at pigadu a pala s’iscuadra contra sa defensa austrìaca.

Is aversàrios ant donadu pensamentu a s’Itàlia finas a s’ùrtimu minutu, sena s’arrèndere mai, marchende sa rete de su 2-1 cun Kalajdzic e chirchende su parègiu pro lòmpere a is rigores, ma pro de badas.

Is òmines de Mancini immoe ant agatare su Bèlgiu, una de is iscuadras prus fortes de is Europeos. Chi podet bantare giogadores comente Lukaku, Hazard, De Bruyne e Curtois, giustu pro nde remonare calicunu ebbia.

Ma s’Itàlia at fàghere sa parte sua e at a chircare de bìnchere: unu bellu regalu pro is immigrados italianos in Bèlgiu e pro is fìgios issoro.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”