Non s’ischit comente a at a andare a finire s’iscontru intre Giuseppe Conte e Beppe Grillo.

Una briga chi andat a in antis dae unas cantas dies e chi diat pòdere portare s’ex presidente de su Consìgiu a lassare su Movimentu.

A Conte fiat istadu afidadu s’incàrrigu difìtzile de torrare a fundare unu Movimentu 5 Isteddos dannificadu dae una grave crisi de identidade e dae lutas internas.

Ma immoe su Movimentu est galu prus fràgile, su còmicu genovesu at postu is cosas in craru a Conte.

Su garante non si cheret pònnere in su segundu pranu: cheret sighire a èssere protagonista de su partidu e detzìdere sa lìnia polìtica de su M5I.

A s’àtera parte però ddoe est “s’abogadu de su pòpulu”, chi de seguru non s’at a bòlere pònnere a una banda.

Is partidos, mescamente de is de sa majoria, sunt chirchende de ddoe cumprèndere calicuna cosa. Sa timoria est chi sa situatzione potzat pònnere in perìgulu s’istabilidade de su guvernu e causare cunseguèntzias graes pro s’esecutivu. Su Partidu democràticu est in pensamentu mannu pro ite non si cumprendet a ite potzat giùghere custa gherra interna a su M5S.

Ma in generale totu is fortzas polìticas càstiant a su chi est capitende in su mundu pentastelladu, sende chi diat pòdere tènnere efetos negativos in su guvernu ghiadu dae Mario Draghi, prus che totu pro ite su Movimentu 5 Isteddos est su partidu prus importante de sa majoria.

S’atentzione prus manna est pro cussos senadores prontos a sighire a Conte si esseret a formare unu partidu suo. S’arriscat difatis un’èsodu dae su Parlamentu, cun medas eletos prontos a àrrere adiosu a Grillo e duncas a su guvernu. Is dies imbenientes ant a èssere detzisivas pro cumprèndere ite at a capitare a beru.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

De non creère su chi est capitadu a Maiorca. Sunt prus de setighentos is istudiantes ispagnolos, lòmpidos in s’ìsula dae oto comunidades autònomas, chi sunt istados contaminados dae Covid-19. Àteros tres mìgia, intrados in cuntatu cun is positivos, s’agatant immoe in cuarantena.

Is datos sunt istados donados dae is autoridades e dae su ministeru de sa Salude. Sa cundidura, si leghet in is giornales locales, s’est iscasiddada a càusa de su cuntzertu “reggaeton” in Plaza de Toros a Palma de Maiorca e de àteras festas barca e in is albergos.

Pro custu is autoridades ispagnolas ant abertu un’indàgine pro si nde segurare si is locales apant sighidu is régulas pro prevènnere s’ispàinu de su Covid-19. Dae unas cantas dies in Ispagna sa mascaredda no est prus obligatòria a s’abertu.

Custa no est bella noa pro s’economia de Maiorca, chi est intrada in zona ruja, pròpiu in su mègius de s’istajone turìstica.

Su chi est acontèssidu in is Baleares nos devet fàghere cumprèndere chi a su virus bastat pagu pro s’ispainare. Pro custu tocat a donare cura, pro ite a pustis de totus is sacrifìtzios fatos in custos meses e s’isperièntzia de s’annu coladu, diat èssere làstima a beru chi su virus si torret a iscasiddare in Itàlia e Sardigna.

Tzertu, gràtzias a is vatzinatziones s’arriscu est prus bàsciu, ma non totus sunt istados imunizados. Dae su 28 de làmpadas peri in Itàlia sa mascaredda no est prus obligatòria foras de is locales pùblicos e in is chidas sighentes ant a èssere torradas a abèrrere is discotecas a s’abertu.

Amus a bìdere. Meda at a dipèndere de comente s’at a cumportare sa gente: die cun die, in base a s’andamentu de su contàgiu, s’ant a pigare provedimentos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”