Su ministru de sa Salude, Roberto Speranza at firmadu is ordinàntzias a pustis de su còmpudu de cada chida de s’Iss-ministeru de sa Salude: bona parte de s’Itàlia abarrat in àrea groga.

A is territòrios chi giai s’agatant in sa fàscia a bàsciu arriscu si nd’agiunghent àteros tres. Sa Sitzìlia e sa Sardigna abarrant in colore de arantzu, a sa matessi bentina colat sa Badde de Aosta chi duncas no est prus ruja.

Sa permanèntzia de sa Regione sarda in sa zona arantzu, mancari megioramentu de su cuadru epidemiològicu chi est cumpatìbile cun sa fàscia de arriscu groga, at fatu infadare su presidente Christian Solinas.

Su guvernadore at faeddadu in modu craru de s’inadeguadesa de su sistema de classificatzione atuale e de una situatzione paradossale, bidu chi s’ìnditze de contàgiu R(t) est a 0,74 – su prus bàsciu de Itàlia -.

In prus, comente at torradu a nàrrere Solinas, sa detzisione de Roma non prèmiat is sacrifìtzios de is sardos e mancu s’impignu de totu is fortzas in campu contra su Covid.

De sa pròpiu idea s’assessore regionale de sa Sanidade, Mario Nieddu, chi at sutaliniadu comente sa regione siat istada penalizada meda dae custa detzisione de su Ministru, non cunsiderende s’atuale cuadru generale fintzas pro more de su nùmeru artu de vatzionatziones, chi sighit a crèschere.

At afirmadu puru chi s’Ìsula e totu su Paisu non podent abarrare acapiados a unu sistema chi ponet fatu a virus e chi no est capatzu de rispòndere a is netzessidades de cuntenimentu de sa pandemia, cun resurtados farsados non prus sustenìbiles.

Nieddu pedit sa revisione lestra de su sistema de classificatzione, màssimu in bista de s’istajone istiale. Fintzas ca, comente at bòlidu ammentare s’assessore, s’apretu no est petzi sanitàriu, ma fintzas econòmicu e sotziale.

Una cosa est segura, custa detzisione est istada leada in pitzu de sa pedde de is medas imprendidores sardos de su setore de sa retzidura, chi de sòlitu in custu perìodu cumentzaiant a traballare bene.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Festa manna eris pro s’Internazionale chi est rèsessidu a bìnchere s’iscudetu nùmeru deghennoe de s’istòria sua.

Difatis gratziàs a su parègiu pro 1 a 1 tra Sassuolo e Atalanta, is nieddos-asulos sunt istados decrarados Campiones de Itàlia firmende su podèriu de sa Juventus, chi at bìnchidu pro noe annos de sighidu su màssimu campionadu natzionale de fùbalu.

Is òmines de Antonio Conte si sunt dimustrados is prus fortes e continos cun is resurtados prus de totus is àteros: in su girone de torrada ant superadu is “fradiles” de su Milan e a pustis ddos ant istrombulados pro 3 a 0.

Cuntentu meda pro sa vitòria de su tìtulu italianu su mere de s’iscuadra milanesa, su tzinesu Steven Zhang – primu presidente istràngiu a bìnchere in Sèrie A – chi pro s’ocurrèntzia est torradu in tzitade pro festare paris cun is giogadores e tifosos.

Tzertu, no est istada una cosa bella meda cussa chi est capitada in Pratza de su Duomo, in ue prus de trinta mìgias persones si sunt atopadas pro festare sa vitòria de s’iscudetu de is nieddos-asulos. Su Covid-19 non càstiat in cara a nemos e cun custu cumportamentu immoe s’at arriscare àteras cundiduras de custa pesta malaita. Nos preguntamus: fiat pretzisu a festare gosi? Creimus chi sa vida e sa salude de totus balet meda de prus de unu campionadu de fùbalu e tocat a rispetare is régulas gosi comente dd’ant fatu is butegheris chi sunt cungiados e sena traballare.

Su Casteddu imbetzes est rèsessidu a leare unu puntu contra su Napoli in s’istàdiu Diego Armando Maradona. A pustis de una partida istragosa meda pro is ruju-blu,su resurtadu est istadu de 1-1, cun is partenopeos chi ant fatu su primu gol gratziàs a Osimhen, e is casteddajos ant paregiadu a coa de sa partida – 94′ minutu – cun s’argentinu Nandez.

Immoe pro is sardos at a èssere importante meda, a bìnchere a ogna còstitu sa gara de sa giorronada benente contra su Benevento. In s’istàdiu Vigorito at a èssere unu beru isparégiu pro si sarbare.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”