In Ìndia s’apretu Covid est semper prus drammàticu, cun 3645 detzessos in is ùrtimas 24 oras.

Dae su cumintzu de sa pandemia is contàgios sunt prus de 18 milliones e is mortos prus de 200 mìgia, mancari is espertos narant chi custu datu siat sutastimadu, sende chi is persones chi ant pèrdidu sa vida a càusa de su virus diant èssere a su mancu 5 bias de prus de su nùmeru ufitziale. Difatis diant mancare a s’apellu is biddas de su sartu e in unas cantas istruturas sanitàrias non benint fatos is controllos subra de is càusas de morte de is malàidos.

A influire subra custa grave situatzione est istada una mudadura de su virus, mutida variante indiana – B. 1.617 – e is numerosas tzerimònias acanta creant grandu ammuntonamentos de persones, prus che totu in is oros de su riu Gange. Tocat a nàrrere chi in su Paisu asiàticu non s’agatat prus s’ossìgenu, fundamentale pro su tratamentu de is positivos a su Coronavirus, e mancat sa linna pro brusiare is mortos fatu de is caminos. Difatis is furros crematòrios istatales non resessent a ismartire su grandu nùmeru de mortos de ogna die.

Peri in Europa si timet pro s’ispàinu de sa variante indiana, difatis dae pagu est istadu cumproadu calicunu casu riferìbile a sa mudadura de su virus in unos cantos istados, tra custos fintzas s’Itàlia.

Dae una banda s’Unione Europea e àteros Paisos tenende da manu a s’Ìndia – produtore prus de vatzinos a su mundu a in antis de Covid – e dae s’àtera sunt limitende is arribos dae unas cantas natziones de su continente asiàticu.

Bastat a pensare a s’ordinàntzia de su Ministru de sa Salude italianu Speranza, chi cun un’ordinàntzia at blocadu s’intrada in su territòriu natzionale a chie siat istadu in is ùrtimas 14 dies in Ìndia e in Bangladèsh – fintzas petzi de passàgiu -. Dae custos paisos podent intrare in Itàlia petzi persones residentes in Itàlia, a pustis de una recherta a su Ministeru a su mancu 48 oras prima e a pustis devent restare in cuarantena 14 dies.

Giustu eris est arribbadu un’aeroplanu dae Noa Dehli cun 213 passigeris prus 10 cumponentes de s’echipàgiu e de custos sunt resurtadas 23 persones positivas a su Covid-19.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Mèrcuris, su 28 de abrile a ora de is 11 in s’Àula de su Consìgiu regionale de sa Sardigna ant cumentzare is tzelebratziones de “Sa Die de sa Sardigna”.

Is traballos ant a èssere abertos dae su presidente de su Consìgiu regionale Michele Pais. Ant a sighire: sa relatzione de Antonello Angioni (Cumponente de su Comitadu pro Sa Die de sa Sardigna) a su tìtulu “Sa Die 2021: Riflessiones tra Sardidade e Istòria” e is interventos de is Presidentes de is Grupos contziliares.

Su grupu musicale Tazenda at intonare s’innu sardu “Procurade de moderare”. Sas tzelebratziones ant a èssere serradas dae su Presidente de sa Regione Christian Solinas.

Fintzas ocannu pro more de s’apretu sanitàriu sa festa at a èssere tzelebrada cun unu nùmeru de partetzipantes limitadu. Pro difùndere s’eventu a foras de s’Àula contziliare est istada aparitzada sa direta internet chi at a èssere trasmìtida in su giassu istitutzionale de su Consìgiu regionale.

Ma ite est Sa Die de sa Sardigna? Est sa festa de su pòpulu sardu, chi ammentat sa rebellia populare de su 28 de abrile 1794 chi nche aiat bogadu dae Casteddu is Piemontesos e su vitzeré Balbiano, a pustis chi su guvernu torinesu no aiat iscurtadu is rechertas de s’ìsula.

Is Sardos pediant chi esserent riservadas a issos is càrrigas tziviles e militares e prus autonomia respetu a is detzisiones de sa classe dirigente locale.

Su guvernu piemontesu aiat naradu chi nono a ogna recherta, pro custu sa burghesia tzitadina, cun s’agiudu de su restu de sa populatzione, aiat iscadenadu su movimentu insurretzionale.

A parte custu, is sardos fiant iscronnosos pro ite cando sa flota frantzesa in su 1793 aiat chircadu de ocupare s’ìsula de Carluforti e de isbarcare a Casteddu, is piemontesos belle si fiant difèndidos a solos, e s’isetaiat unu reconnoschimentu dae su guvernu sabàudu.

A nde betare su noe fiat istadu s’arrestu ordinadu dae su vitzeré de duos capos de su partidu patriòticu, is abogados casteddajos Vincenzo Cabras e Efisio Pintor. Su fatu fiat acontèssidu pròpiu su 28 abrile de su 1794: sa populatzione afelonada aiat detzìdidu de nche bogare dae sa tzitade su vitzeré Balbiano e totu is Piemontesos, chi in su mese de maju s’annu etotu fiant istados imbarcados a truba e incumandados foras de s’ìsula. Indanimados dae su chi fiat sutzèdidu a Casteddu, is abitantes de S’Alighera e Tàtari aiant fatu ateretantu, faghende cumentzare sa Sarda Rivolutzione.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”