Sete ex terroristas italianos amparados in Frantza sunt istados arrestados, pro recherta de s’Itàlia, mentras àteros tres sunt bandidende e sunt chircados. Custas persones sunt acusadas de atos de terrorismu acontèssidos in is annos ’70 e ’80.

Is arrestados sunt Enzo Calvitti, Giovanni Alimonti, Roberta Cappelli, Marina Petrella e Sergio Tornaghi – totus de is Brigatas Rujas – Giorgio Pietrostefani – Lotta Continua – e de Narciso Manenti – Nuclei Armati contro il Potere territoriale -.

Is tres ex terroristas chi si nche sunt fuidos imbetzes sunt Luigi Bergamin, Maurizio Di Marzio e Raffaele Ventura.

S’operatzione est istada conduida dae s’Antiterrorismu de sa politzia natzionale frantzesa (Sdat) in collaboratzione cun su Servìtziu de cooperatzione internatzionale de sa Criminalpol e cun s’Antiterrorismu de sa Politzia italiana.

Sa chistione de is ex terroristas italianos amparados in Frantza si diat èssere isblocada cun s’addòbiu a distàntzia s’8 abrile coladu intre is ministros de sa Giustìtzia de is duos Paisos.

Sa ministra Marta Cartabia, at sutaliniadu comente s’Itàlia apat mandadu a sa lestra sa rechesta de estraditzione de is ex terroristas, in antis chi pro una pariga de custos iscadiret s’òbligu. Recherta atzetada dae Eric Dupond-Moretti, chi aiat ammìtidu sa netzessidade de “coitare”.

Su primu ministru Mario Draghi at espressadu sa satisfatzione de su guvernu pro sa detzisione de sa Frantza de aviare is protzeduras giuditziàrias, rechertas dae parte de s’Itàlia, in is cunfrontos de is responsàbiles de crìmines graves de terrorismu, chi ant lassadu una ferida galu aberta. In prus at afirmadu chi sa memòria de cuddos atos orrorosos est galu bia in sa cussèntzia de is italianos. At fintzas rinnovadu sa partetzipatzione sua a su dolore de is familiares in s’ammentu cummòvidu de su sacrifìtziu de is vìtimas.

S’Eliseo, a pustis de is arrestos de is ex terroristas, at pretzisadu chi sa detzisione de su presidente Emmanuel Macron si còllocat in manera istrinta in sa lògica de sa ‘dotrina Mitterrand’ de acordare s’asilu a is ex brigatistas, francu a is responsàbiles de reatos de sàmbene.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Mèrcuris, su 28 de abrile a ora de is 11 in s’Àula de su Consìgiu regionale de sa Sardigna ant cumentzare is tzelebratziones de “Sa Die de sa Sardigna”.

Is traballos ant a èssere abertos dae su presidente de su Consìgiu regionale Michele Pais. Ant a sighire: sa relatzione de Antonello Angioni (Cumponente de su Comitadu pro Sa Die de sa Sardigna) a su tìtulu “Sa Die 2021: Riflessiones tra Sardidade e Istòria” e is interventos de is Presidentes de is Grupos contziliares.

Su grupu musicale Tazenda at intonare s’innu sardu “Procurade de moderare”. Sas tzelebratziones ant a èssere serradas dae su Presidente de sa Regione Christian Solinas.

Fintzas ocannu pro more de s’apretu sanitàriu sa festa at a èssere tzelebrada cun unu nùmeru de partetzipantes limitadu. Pro difùndere s’eventu a foras de s’Àula contziliare est istada aparitzada sa direta internet chi at a èssere trasmìtida in su giassu istitutzionale de su Consìgiu regionale.

Ma ite est Sa Die de sa Sardigna? Est sa festa de su pòpulu sardu, chi ammentat sa rebellia populare de su 28 de abrile 1794 chi nche aiat bogadu dae Casteddu is Piemontesos e su vitzeré Balbiano, a pustis chi su guvernu torinesu no aiat iscurtadu is rechertas de s’ìsula.

Is Sardos pediant chi esserent riservadas a issos is càrrigas tziviles e militares e prus autonomia respetu a is detzisiones de sa classe dirigente locale.

Su guvernu piemontesu aiat naradu chi nono a ogna recherta, pro custu sa burghesia tzitadina, cun s’agiudu de su restu de sa populatzione, aiat iscadenadu su movimentu insurretzionale.

A parte custu, is sardos fiant iscronnosos pro ite cando sa flota frantzesa in su 1793 aiat chircadu de ocupare s’ìsula de Carluforti e de isbarcare a Casteddu, is piemontesos belle si fiant difèndidos a solos, e s’isetaiat unu reconnoschimentu dae su guvernu sabàudu.

A nde betare su noe fiat istadu s’arrestu ordinadu dae su vitzeré de duos capos de su partidu patriòticu, is abogados casteddajos Vincenzo Cabras e Efisio Pintor. Su fatu fiat acontèssidu pròpiu su 28 abrile de su 1794: sa populatzione afelonada aiat detzìdidu de nche bogare dae sa tzitade su vitzeré Balbiano e totu is Piemontesos, chi in su mese de maju s’annu etotu fiant istados imbarcados a truba e incumandados foras de s’ìsula. Indanimados dae su chi fiat sutzèdidu a Casteddu, is abitantes de S’Alighera e Tàtari aiant fatu ateretantu, faghende cumentzare sa Sarda Rivolutzione.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”