In Cuba est pro acabbare un’època.

Difatis a pustis de prus de sessanta annos at a èssere decretada sa fine de s’era Castro, e custu at a acontèssere in ocasione de su de oto Cungressos de su Partidu Comunista chi s’at a abèrrere chenàbura.

In is imbenientes dies Raul Castro, 89 annos, at a lassare su partidu de s’ìsula in is manos de su presidente cubanu de immoe Miguel Diaz-Canel.

Custu at a èssere sa primu bia de unu tzivile comente capu de su Partidu comunista de Cuba dae sa creatzione sua in su 1965, in unu passàgiu de cunsignas chi aberit unu cursu nou pro su Paisu, in su sinnu de sa continuidade in sa lìnia polìtica.

In su 2016, durante su de sete Cungressos de su partidu, ddoe est istadu s’adiosu pùblicu de Fidel Castro, mortu unos cantos meses a pustis, e giai tando, in modu simbòlicu, ddoe fiat istadu unu passàgiu epocale.

Su de oto cungressos, in programma dae su 16 a su 19 de abrile, at a èssere su de su ritiru polìticu definitivu de su frade Raul, gasi comente est istadu annuntziadu giai in su 2018.

Miguel Diaz-Canel, presidente giai dae su 2018, at a sutzèdere a Raul e at a èssere issu su primu segretàriu de su partidu.

Sa dirigèntzia polìtica at a èssere rinnovada cun una generatzione noa, e de sa leva chi aiat partetzipadu a sa rivolutzione de s’ìsula in 1959 no ddoe at a èssere prus nemos.

Is pròssimos annos ant a èssere is prus importantes pro s’ìsula, pro ite ant a detzìdere s’istòria sua a pustis de unu longu caminu detzìdidu dae Fidel prima e a pustis dae su frade Raul.

Pro custu sa dirigèntzia noa at a tènnere su còmpitu de afrontare disafios comente sa grave crisi econòmica chi est corfende s’ìsula, e ddoe tenet medas aspetativas pro is detzisiones chi diant pòdere essire dae su cungressu massimamente pro is reformas econòmicas, fintzas a pustis de s’abertura a su setore privadu de is ùrtimos annos.

Podet èssere chi Cuba resessat a sighire a poderare s’ànima sua e a èssere galu capatza de detzìdere su destinu pròpiu, sena s’influèntzia de is potèntzias istràngias.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

At pesadu unu muntone de chèscias su pràngiu de mèrcuris coladu in un’albergo de Sàrdara – in prena zona arantzu – acanta ddoe fiant unas 40 persones tra polìticos e dirigentes mannos de sa Regione Sardigna.

Sa rebota est istada interrùmpida dae sa Guàrdia de Finàntzia, chi at identificadu deghennoe partetzipantes, is àteros imbetzes ant acudidu a si fuire pro non si fàghere connòschere. Unu de is chi si sunt fuidos diat aere brincadu dae sa bentana e si diat èssere istichidu in mesu a sa tupa pro s’iscrancare sa contraventzione de 400 èuros e prus che totu sa figura lègia.

Sa giustìtzia est valutende is giustificatziones donadas dae is presentes arribbados dae vàrias partes de s’Ìsula e sa Procura de sa Repùblica de Casteddu at abertu un’inchiesta, pedende a is capos de sa Guàrdia de Finàntzia una relatzione pretzisa de su chi est acontèssidu a Sàrdara.

A su chi s’ischit finas a immoe, calicunu at fatu una telefonada anònima a is finantzieris de sa Tenèntzia de Seddori, avisende de sa presèntzia de medas màchinas in su parchègiu de s’albergo. Difatis is normas contra su covid previstas pro sa zona arantzu non permitiant a is albergadores de serbire pastos a persones esternas non registradas.

In s’ora chi sunt essende a campu is nùmenes de is possìbiles polìticos e dirigentes presentes a su pràngiu, sunt medas is protestas de is vàrias fortzas polìticas. Calicunu partidu at publicadu comunicados acanta decrarant chi nemos de is esponentes issoro fiat presente a su “pràngiu de sa birgòngia”.

Su guvernadore de sa Sardigna, Christian Solinas, amargadu meda dae su fatu, diat èssere prontu a pigare provedimentos sèrios in is cunfrontos de is chi s’agataiant a s’ispuntinu.

Duncas, sa satzadura de Sàrdara arriscat de pònnere in trèulu partidos e majoria, finas a cando no at a èssere craridu su fatu e ognunu non s’at a pigare is responsabilidades suas. Su chi est capitadu, difatis, est una mancàntzia de rispetu de sa polìtica pro is sardos, in custu momentu de limitatziones e crisi chi sunt pesende meda subra sa populatzione e s’economia de su Paisu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”