A pustis de 21 annos s’Itàlia de sa vela est arribbada a sa Copa Amèrica.

Luna Rossa at bìnchidu sa barca Ineos e s’est agiudicada sa Prada Cup, e oras podet cumpètere contra Emirates Team New Zealand.

Unu resurtadu mannu, in una de is cumpetitziones isportivas prus antigas de semper e chi festat is 170 annos de vida.

Custa at a èssere sa de tres bias chi un’iscuadra italiana partètzipat a is regatas chi assignant sa Copa Amèrica.

Sa prima bia est acontèssidu su 1992 cun su “Moro de Venètzia” de Gardini e Cayard, e sa segunda in su 2000 cun sa “Luna Rossa” de Francesco De Angelis.

Custa borta at a èssere pro Max Sirena – binchidore de duas Copas – sa prima borta in assolutu cun barca e cun echipàgiu italianos.

Tzertu, dae su 2000, acantu pro s’ùrtima bia imbarcatzione italiana at partetzipadu a una regata de Copa Amèrica, est cambiadu totu. Sa vela at cambiadu meda: dae is tecnologias, a is modos e tempos de istare in abba.

A ogna contu pro s’Itàlia est una satisfatzione manna su de àere dimustradu de èssere presente fintzas in custa cumpetitzione ispantosa.

Su mèritu est primariamente de Max Sirena, su skipper chi in passadu at giai bìnchidu sa Copa Amèrica, ma mai cun is colores italianos.

Cumplimentos duncas a Luna Rossa, capatza de catzare is britànnicos de Ineos, chi no ant pòdidu fàghere nudda in sa Prada Cup: 7-1 cun vitòria italiana sena cunfrontos.

S’apuntamentu cun s’istòria est fissadu pro beranu chi benit. Luna Rossa at a disafiare dae curtzu su defender e meres de domo, in Auckland comente 21 annos a oe: su Emirates Teams New Zealand. Su disafiu at a cumintzu cumentzare su 6 martzu pro sa de 36 editziones de sa Copa Amèrica de vela. E totus isperant chi siat sa bia bona pro pònnere su pròpiu nùmene in su trofeu prus antigu de su mundu e batire is regate de Copa Amèrica a Casteddu. Luna Rossa difatis s’est preparada pròpiu in su cabulogu sardu, acanta Max Sirena oramai est una de domo, e in s’iscuadra sunt presentes su bellu de 14 sardos.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu no at conchistadu mancu unu puntu in domo contra su Torino, e no est resèssidu a andare a in antis in sa classìfica.

Custa crisi niedda est arrischende de fàghere falare s’iscuadra sarda dereta in Sèrie B.

Mancu contra is piemontesos s’est bidu unu Casteddu balente, cun is sardos chi ant àpidu pagos ocasiones pro fàghere gol – nudda in su primu tempus -. Una pariga de ocasiones ddas ant tentas Simeone e Joao Pedro, ma però no ddas ant isfrutadas.

Sa rete pro su Torino est istada marcada – a su minutu ’76 – dae su difensore Bremer: unu bellu corpu de conca a pustis de unu brìnchidu chi at collionadu su giogadore casteddaju Godin.

Pro su chi s’est bidu in campu, su 0-1 finale pro is granadas, est unu resurtadu meritadu pro is aversàrios: pro s’unidade e sa gana dae gherrare de s’iscuadra.

Immoe s’allenadore ruju-blu Di Francesco, mancari siat istadu cunfirmadu pagas chidas a oe de su presidente Giulini, arriscat de nche pèrdere sa banchita a beru custa borta. Difatis custa fiat sa partida prus delicada pro cumintzare a chircare de abarrare in sa màssima categoria natzionale de fùbalu. Dae eris sero sunt essidos a pìgiu medas nùmenes de àteros allenadores chi diant a pòdere pigare su postu de s’abrutzesu.

Mescamente sunt duos is tècnicos prus remonados dae is pràticos de fùbalu: Donadoni e Semplici. Tocat a nàrrere chi s’ex tzentrucampista de su Milan est istadu medas istajones a oe – 2010/2011 – sa ghia de s’iscuadra sarda.

Domìnigu a is tres de merie, su Casteddu at a giogare foras de domo, a s’Istàdiu Ezio Scida, contra su Crotone. Mancari s’iscuadra calabresa siat s’ùrtima in classìfica, at a èssere un’aversàriu istragosu meda. S’allenadore Stroppa est bravu meda e no est resèssidu a boddire is puntos meritados.

Isperamus chi is sardos resessant a bìnchere torra a pustis tres meses colados. Ma chie at a èssere s’allenadore chi s’at a sètzere in banchita ruju-blu in sa partida chi benit? Amus a bìdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”