A bortas su fùbalu est meda severu e sena piedade, comente est capitadu domìnigu a sa Sardinia Arena.

Casteddu-Atalanta est acabbada 0-1 cun is meres de domo chi ant pèrdidu torra a coa de partida cun su gol marcadu dae su colombianu Luis Muriel.

Una maja de su giogadore bergamascu, chi gràtzias a una finta àbile e lestra at “imbriagadu” is defensores sardos, Sebastian Walukiewicz e Gabriele Zappa, e a pustis at postu sa botza in rete, a palas de Alessio Cragno.

Est istada una làstima manna pro is òmines de Eusebio Di Francesco, pro ite ant giogadu una partida bona contra una de is iscuadras prus balentes de sa Sèrie A.

Difatis is nieddu-asulos de Giampiero Gasperini sunt istados cungiados bene meda de is ruju-blu, ma però s’atacu sardu no est istadu perigulosu pro sa difesa de is aversàrios.

Custa borta puru su Casteddu at marcadu belle e nudda e dae tropu tempus est istramanchende sa bitòria- s’ùrtima in campionadu est istada cussa de su 7 de onniasantu contra sa Sampdoria – .

Sa partida sighente de is ruju-blu ant a èssere contra su Torino, in domo, a sa Sardinia Arena. Una partida istragosa meda contra is granadas chi sunt a in antis de is sardos de duos puntos ebbia.

At a èssere una gherra a beru, pro ite is duas iscuadras ant a bòlere chircare a ogna còstitu de nde istupare dae is ùrtimos postos in sa classìfica de Sèrie A.

Su Toro si presentat in Sardigna de muta mala, a pustis de sa partida parigiada contra su Genoa pro zero a zero.

Su capitanu Belotti “Su Cabone” at a bajulare su pesu de s’atacu piemontesu totu in palas suas e at èssere s’òmine prus perigulosu pro is casteddajos.

Di Francesco, mancari siat istadu cunfirmadu, arriscat semper de nche pèrdere sa banchita, custa borta diat èssere sa partida prus delicada pro abarrare in sa màssima categoria natzionale de fùbalu.

Pro chenàbura sero, isperamus de pòdere bìdere unu Casteddu prus balente, pro superare custa crisi chi est arrischende de fàghere falare s’iscuadra in Sèrie B.

Is sardos ant renèschere a torrare a bìnchere a pustis tres meses dae s’ùrtima borta? Amus a bìdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Nudda de fàghere pro su Casteddu contra sa Lazio. Is sardos sunt torrados in s’Ìsula a bèrtula bòida.

In s’Istàdiu Olìmpicu de Roma est acabbada 1-0 pro is meres de domo cun su gol marcadu dae Ciro Immobile. Pro is casteddajos pagos o nudda is tiros in porta, mancari calicuna ocasione bona.

Eusebio Di Francesco a pustis de sa partida at naradu chi is giogadores ruju-blu ant giogadu una bona partida, ma est abarradu delusu pro su resurtadu.

A is latziales ddis serbiant puntos pro abarrare in sa zona arta de sa classìfica e ant meritadu de bìnchere.

Tocat a nàrrere chi is sardos fiant motivados e ant torradu a fàghere bìdere calicuna cosa bona in prus de is meses colados.

Su gol de sa Lazio est istadu fatu dae Immobile, cun unu tiru lestru a su segundu tempus. Su Casteddu no est renèssidu prus a adderetare su resurtadu.

S’ùrtima vitòria casteddaja in su campionadu est istada su 7 de onniasantu contra sa Sampdoria de s’ex allenadore Claudio Ranieri – pro 2-0 – cun is gol de su brasilianu Joao Pedro e de s’argentinu Nahitan Nandez.

Dae tando est coladu tropu tempus e mancari Di Francesco siat istadu cunfirmadu dae su presidente Tommaso Giulini – pro donare prus fortza a s’iscuadra – arriscat semper de nche pèrdere sa banchita. Pro ite s’est cumpresu chi si is ruju-blu ant sighire aici, at a èssere istragosu meda abarrare in Sèrie A.

Sa partida sighente de su Casteddu at a èssere contra s’Atalanta a sa Sardinia Arena. Una partida difìtzile meda contra is nieddos-asulos bergamascos chi sunt dae una pariga de annos a oe semper in is primos postos in classìfica de Sèrie A.

Is sardos diant a dèpere giogare bene meda, cun un’iscuadra prus unida, gherradora e is atacantes prus perigulosos. S’iscuadra de s’allenadore abrutzesu est marchende belle e nudda, e su capitanu Joao Pedro a sa sola non podet fàghere miràculos. Diat a tocare a agatare sa forma atlética mègius su giogadore Leonardo Pavoletti, a pustis de su dannu lègiu chi at tentu in s’istajone colada.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”