Su Casteddu at cuncuistadu unu puntu in domo contra su Sassuolo, cun is emilianos chi sunt arrenèschidos a agatare su parègiu a  coa de sa partida – 95’ minutu -.

Una befa manna pro is ruju-blu chi fiant comintzende a fàghere sa buca bona pro is tres puntos de sa vitòria.

Tzertu, a sa fine is òmines de Eusebio Di Fracesco ant postu fine a sa filera de ses partidas pérdidas, e sunt resèssidos a andare a in antis in sa classìfica.

Tocat a nàrrere chi su Casteddu no at giogadu bene comente s’ispetaiat, pro ite in bona parte de sa gara ant cumandadu su giogu is aversàrios e ant tentu ocasiones medas pro marcare unu gol.

Duncas, chi semus impartziales, su resultadu pro is òmines de Roberto De Zerbi est istrintu meda e tocat a ringratziare su portieri de is sardos Alessio Cragno, si is ruju-blu no ant leadu una meca de retes.

S’estremu defensore de domo in duas atziones at fatu paradas balentes de aberu: una borta in una iscuta de pee de Filip Djuricic e un’àtera in una addobada de conca de Traorè, nd’at bogadu sa botza dae in intro de sa porta.

Sa rete marcada dae Joao Pedro – unu bellu corpu de conca a pustis de su servìtziu de Razvan Marin – cando su Casteddu fiat patende is atacos de su Sassuolo, diat a pòdere èssere s’ocasione  pro iscatzare sa crisi cun sa vitòria.  Pro su chi s’est bidu in campu, su 1-1 finale, cun su gol de Jeremie Boga, est unu resultadu meritadu pro is aversàrios

Pro su tempus benente su Casteddu diat a dèpere  giogare prus bene meda, cun un’iscuadra prus unida e gherradora. S’isperat de pòdere bìdere is ruju-blu prus cuntzentrados pro superare custa crisi chi est arrischende de fàghere falare s’iscuadra in Sèrie B.

Domìnigu sero, is casteddajos ant a giogare foras de domo, a Roma, contra un’aversàriu istragosu meda comente sa Lazio. Is sardos ant arrenèschere a torrare a bìnchere a pustis tres meses colados dae s’ùltima borta? Amus a bìdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

Su Casteddu at torradu a pèrdere, custa borta contra su Genoa pro 1-0. S’iscuadra est dae ses partidas de sighidu chi non lompet a sa vitòria in campionadu.

Seguru ca in custas garas at tentu aversàrios balentes puru, comente Atalanta e Milan, ma in àteras partidas, sa delusione est istada manna meda.

In s’istàdiu Marassi de Gènova, una rete de s’atacante Mattia Destro at detzisu sa partida, mancare is ruju-blu apant tentu prus de un’ocasione pro marcare unu gol. Is giogadores ant isperditziadu atziones de giogu bellas a beru e non sunt resèssidos mancu a paregiare.

Tocat a nàrrere chi a pustis de is primas partidas is tifosos casteddajos si sunt acuntentados de s’iscuadra de Di Francesco, e teniant isperu bonu de sighire in cuss’àndala. Ma dae una pariga de chidas a oe s’est cumpresu chi ocannu puru s’obietivu de su Casteddu est su de sighire abarrare Sèrie A.

Est pro custu ca a pustis de sa partida pèrdida eris, is tifosos s’ispetaiant su càmbiu de s’allenadore, imbetzes su presidente Tommaso Giulini at donadu galu fide a Eusebio Di Francesco. Difatis sa chida colada dd’at allonghiadu su cuntratu chi acabbaiat in su 2022, finas a su 2023.

Giulini at chistionadu in Sky de custa detzisione: “Amus cunfirmadu Di Francesco pro donare galu prus fortza a s’iscuadra. Tzertu oe non semus resèssidos a bìnchere e custa cosa nos dispraghet meda”.

S’allenadore abrutzesu a pustis at naradu: “So cuntentu meda chi sa sotziedade at bidu ca s’impignu e su traballu non sunt mancados. Immoe tocat a nois a torrare a pagare sa fide chi nos ant donadu”.

Sa partida chi benit est domìniga, in domo, contra su Sassuolo de Roberto De Zerbi. No at a èssere fàtzile pro ite s’iscuadra emiliana giogat bene a beru. Sa partida de s’andada fiat acabada 1-1.

Is òmines de Di Francesco sunt resolutos a giogare una bona partida in sa Sardinia Arena pro comintzare bene su Girone de torrada.

Is tifosos pedint chi is giogadores isulanos nde boghent a foras su caràtere issoro pro torrare a bìnchere e pro onorare sa màllia ruju-blu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”