Su Casteddu no at conchistadu mancu unu puntu in domo contra su Torino, e no est resèssidu a andare a in antis in sa classìfica.

Custa crisi niedda est arrischende de fàghere falare s’iscuadra sarda dereta in Sèrie B.

Mancu contra is piemontesos s’est bidu unu Casteddu balente, cun is sardos chi ant àpidu pagos ocasiones pro fàghere gol – nudda in su primu tempus -. Una pariga de ocasiones ddas ant tentas Simeone e Joao Pedro, ma però no ddas ant isfrutadas.

Sa rete pro su Torino est istada marcada – a su minutu ’76 – dae su difensore Bremer: unu bellu corpu de conca a pustis de unu brìnchidu chi at collionadu su giogadore casteddaju Godin.

Pro su chi s’est bidu in campu, su 0-1 finale pro is granadas, est unu resurtadu meritadu pro is aversàrios: pro s’unidade e sa gana dae gherrare de s’iscuadra.

Immoe s’allenadore ruju-blu Di Francesco, mancari siat istadu cunfirmadu pagas chidas a oe de su presidente Giulini, arriscat de nche pèrdere sa banchita a beru custa borta. Difatis custa fiat sa partida prus delicada pro cumintzare a chircare de abarrare in sa màssima categoria natzionale de fùbalu. Dae eris sero sunt essidos a pìgiu medas nùmenes de àteros allenadores chi diant a pòdere pigare su postu de s’abrutzesu.

Mescamente sunt duos is tècnicos prus remonados dae is pràticos de fùbalu: Donadoni e Semplici. Tocat a nàrrere chi s’ex tzentrucampista de su Milan est istadu medas istajones a oe – 2010/2011 – sa ghia de s’iscuadra sarda.

Domìnigu a is tres de merie, su Casteddu at a giogare foras de domo, a s’Istàdiu Ezio Scida, contra su Crotone. Mancari s’iscuadra calabresa siat s’ùrtima in classìfica, at a èssere un’aversàriu istragosu meda. S’allenadore Stroppa est bravu meda e no est resèssidu a boddire is puntos meritados.

Isperamus chi is sardos resessant a bìnchere torra a pustis tres meses colados. Ma chie at a èssere s’allenadore chi s’at a sètzere in banchita ruju-blu in sa partida chi benit? Amus a bìdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

A bortas su fùbalu est meda severu e sena piedade, comente est capitadu domìnigu a sa Sardinia Arena.

Casteddu-Atalanta est acabbada 0-1 cun is meres de domo chi ant pèrdidu torra a coa de partida cun su gol marcadu dae su colombianu Luis Muriel.

Una maja de su giogadore bergamascu, chi gràtzias a una finta àbile e lestra at “imbriagadu” is defensores sardos, Sebastian Walukiewicz e Gabriele Zappa, e a pustis at postu sa botza in rete, a palas de Alessio Cragno.

Est istada una làstima manna pro is òmines de Eusebio Di Francesco, pro ite ant giogadu una partida bona contra una de is iscuadras prus balentes de sa Sèrie A.

Difatis is nieddu-asulos de Giampiero Gasperini sunt istados cungiados bene meda de is ruju-blu, ma però s’atacu sardu no est istadu perigulosu pro sa difesa de is aversàrios.

Custa borta puru su Casteddu at marcadu belle e nudda e dae tropu tempus est istramanchende sa bitòria- s’ùrtima in campionadu est istada cussa de su 7 de onniasantu contra sa Sampdoria – .

Sa partida sighente de is ruju-blu ant a èssere contra su Torino, in domo, a sa Sardinia Arena. Una partida istragosa meda contra is granadas chi sunt a in antis de is sardos de duos puntos ebbia.

At a èssere una gherra a beru, pro ite is duas iscuadras ant a bòlere chircare a ogna còstitu de nde istupare dae is ùrtimos postos in sa classìfica de Sèrie A.

Su Toro si presentat in Sardigna de muta mala, a pustis de sa partida parigiada contra su Genoa pro zero a zero.

Su capitanu Belotti “Su Cabone” at a bajulare su pesu de s’atacu piemontesu totu in palas suas e at èssere s’òmine prus perigulosu pro is casteddajos.

Di Francesco, mancari siat istadu cunfirmadu, arriscat semper de nche pèrdere sa banchita, custa borta diat èssere sa partida prus delicada pro abarrare in sa màssima categoria natzionale de fùbalu.

Pro chenàbura sero, isperamus de pòdere bìdere unu Casteddu prus balente, pro superare custa crisi chi est arrischende de fàghere falare s’iscuadra in Sèrie B.

Is sardos ant renèschere a torrare a bìnchere a pustis tres meses dae s’ùrtima borta? Amus a bìdere.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”