Oramai est arribbada s’ora de sa veridade pro su guvernu ghiadu dae Mario Draghi.

Difatis cras a ora e is 10 su primu ministru nou at a fàghere su discursu programmàticu in s’àula de Palatzu Madama, chi at a èssere repìtidu giòbia a Montecitorio.

SA majoria manna chi l’at a sustènnere est treulada dae medas cuntierras tra is partidos. Tando non totu in Parlamentu est seguru.

Is discuncòrdias prus fortes diant èssere in su M5S, cun brigas internas, cun is medas dissidentes prontos votare nono a s’esecutivu nou s’ala “governista” chi imbetzes traballat pro sustènnere su guvernu.

Ma fintzas sa Sinistra italiana aparit segada e is raportos tra Lega e Pd si faghent semper prus lègios. Crara de in deretura sa positzione de Fratelli d’Italia ghiada dae Giorgia Meloni chi s’est posta dae meda a s’opositzione de s’esecutivu ghiadu dae s’ex presidente de sa BCE.

Fintzas sa nòmina de is sutasegretàrios no at a èssere fàtzile, cun una prova de fortza tra is partidos polìticos de sa majoria.

In s’ora su premier Draghi est isetende de agatare solutziones pro sa pandemia, de sa cale a donare prus pensamentu sunt is variantes de su Covid-19. Prima de totu cussa inglesa, chi tra carchi chida at a a èssere sa chi s’at a ispainare de prus.

In su mentres su Cts, s’Iss e su Tzentru europeu pro sa preventzione e su controllu de is maladias, cheret a s’esecutivu nou de afortiare is mesurat contra su Covid e cussìgiat unu firmu totale nou.

Un’ipòtesi difìtzile de atuare pro ite su mundu de is impresas s’oponet a barra parada a custa detzisione. Difìtzile istabilire si at a èssere torradu a cunfirmare su cummissàriu Arcuri, acusadu dae medas de no àere donadu rispostas eficatzes a sa luta contra su Coronavirus.

Seguru a pustis de àere otentu sa fidùtzia – francu corfos de iscena – Draghi dae lunis at a atuare vàrios provedimentos in sa lìnia in is vatzinos e cun su cuntrastu a sa pandemia.

Pro immoe custu est s’elencu de is ministros de su guvernu:

Luciana Lamorgese a s’Internu, matessi càrriga giai in su guvernu Conte

Lugi De Maio (M5S), a is Èsteros, matessi càrriga giai in su guvernu Conte

Lorenzo Guerini (Pd) a sa Difesa, matessi càrriga giai in su guvernu Conte

Daniele Afranco a s’Economia, diretore generale atuale de sa Banca de Itàlia

Giancarlo Giorgetti (vitze-segretàriu de sa Lega), a s’Isvilupu Econòmicu

Marta Cartabia a sa Giustìtzia, ex presidente de sa Corte Costitutzionale

Roberto Speranza (Leu), a sa Salude, matessi càrriga giai in su guvernu Conte

Federico De Incà (M5S) a is Raportos cun su Parlamentu, matessi càrriga giai in su guvernu Conte

Roberto Cingolani a su ministeru nou de sa Transitzione ecològica, ex diretore Iit

Patrizio Bianchi a s’Imparu, dotzente universitàriu

Cristina Messa a s’Universidade, dotzente universitària

Enrico Giovannini a is Infrastruturas e Trsportos, ex presidente de s’Istat

Renato Brunetta (Forza Italia) a sa Pùblica amministratzione

Dario Franceschini (Pd) a sa Cultura, matessi càrriga giai in su guvernu Conte

Andrea Orlando (vitzesegretàriu de su Pd) a su Traballu

Massimo Garavaglia (Lega) a su Turismu

Stefano Patuanelli (M5S) a s’Agricultura

Vittorio Colao a s’Innovatzione tecnològica

Mariastella Gelmini (Fortza Itàlia) a is Afares regionales

Mara Carfagna (Forza Italia) a su Sud

Elena Bonetti (Italia Viva) a is Paris oportunidades, matessi càrriga giai in su guvernu Conte

Fabiana Dadone (M5S) a is Polìticas giovaniles

Erika Stefani (Lega) a is Disabilidades

Su sutasegretàriu a sa presidèntzia de su Consìgiu at a èssere su magistradu Roberto Garofoli.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”

In sa die de oe su Presidente de sa Camera Roberto Fico at a cumentzare is consultatziones cun is partidos pro bìere chi si ddoe sunt is cunditziones de fàghere su guvernu “Conte-ter”.

Fico – chi at retzidu su mandadu esplorativu dae su Presidente Sergio Mattarella – at a atopare pro primu is delegados de su Movimentu Chimbe Isteddos, e a sighire is rapresentantes de su Partidu Democràticu, Itàlia Viva e Lìberos e Uguales.

Sa crisi de su Guvernu s’est aberta a pustis de is dimissiones de is ministras Teresa Bellanova e Elena Bonetti e de su sutasegretàriu Ivan Scalfarotto.  Mancari is votos a favore de Giuseppe Conte a sa Camera e  a su Senadu – bàtoro dies a oe – est istada declarada   sa crisi cun is dimissiones de su primu ministru.

S’incàrrigu de Fico est istragosu meda, pro ite su capu de Itàlia Viva, Matteo Renzi, diat puntare a unu Guvernu ghiadu dae unu primu ministru chi non siat Conte.

Is esponentes printzipales de su Partidu Democràticu e de su M5S bolent  comente Presidente de su Consìgiu semper s’abogadu pulliesu.  Ma essende chi su tentativu de allargare sa majoria sena is votos de su partidu de Renzi no est resèssidu, at èssere difìtzile meda chi Conte bèngiat cunfirmadu.

In custas oras sunt essidos a pìgiu àteros nùmenes, comente cussu de su  Ministru de is Esteros Luigi di Maio e de sa Ministra de is Internos Luciana Lamorgese.

In unu cuntestu polìticu che custu non s’ischit ite at a pòdere capitare. Seguru – sarvu sorpresas – non s’at a lòmpere in presse a is eletziones, comente imbetzes est dimandende sa minoràntzia ghiada de su capu de sa Lega Matteo Salvini.

Fico at a dèpere agatare una solutzione a lestru, pro ite s’Itàlia non si podet permìtere àteros “trumbulamentos” in is meses sighentes, bidas totu is discumbènios causados dae sa pandemia.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”