S’est concruida eris sero in Ogiastra sa prima fase de su monitoràgiu sanitàriu a pitzu de totu sa populatzione cumentzadu su 4 de ghennàrgiu in Sardigna.

A pustis de is 27 mìgia tampones de su 4 e 5 ghennàrgiu chi aiant rilevadu 132 positivos – medas de is cale non cunfirmados dae su tampone molecolare – est acabada fintzas sa segunda fase de sa campagna regionale in is 23 Comunos ogiastrinos, cun unu calu minore de adesiones, ma cun prus casos positivos agatados dae is tampones a immunofluorescèntzia.

In totu sunt istadas 25.200 is persones chi ant leadu parte a su controllu tra eris e oe, e sunt istados cunfirmados 157 positivos.

Is casos “suspetos” sunt istados giai sutapostos a su tampone molecolare, chi at a dèpere cunfirmare sa positividade a su virus.

In is chidas imbenientes sa campagna “Sardi e Sicuri”, promòvida dae sa Regione e coordinada dae su viròlogu Crisanti — chi s’11 de ghennàrgiu fiat in Lanusè e in Tortolì – s’at a iscostiare in àteros territòrios de s’Ìsula, cumintzende dae su nugoresu e posca dae su Campidanu de mesu.

Ma labade is resurtados finales de custas duas dies de monitoràgiu a pitzu de sa populatzione ogiastrina:

Essit a campu comente in Cardedu sa pertzentuale de is positivos a su Covid, si siat abbassada a pustis de is 17 casos cumproados in sa fase unu.

De sutaliniare posca chi in su Comunu de Ussassa sa populatzione at detzisu de non si fàghere tamponare, comente sinnu de protesta contra sa mancàntzia de su dotore de base dae su 1° de ghennàrgiu 2021. Difatis in su tzentru montanu dae tres annos mancat su mèigu de meighina generale e finas apagu tempus a oe is ussassesos sunt dèpidos andare a Seui. Ma cun sa fine de su cuntratu de su dot. Lino Masia, peri Seui est abarradu sena dotore e immoe is duas biddas non tenent mèigu de famìlia.

Su monitoràgiu sanitàriu contra su Covid est serbidu a mapare su virus in Ogiastra e a inchingiare sa màchina organizativa regionale in previsione de s’indàgine epidemiològica in totu su territòriu sardu. Sighit a andare a in antis fintzas sa campagna de vatzinatzione, cun s’Ìsula chi est a su de 6 postos tra is regiones italianas pro nùmeru de vatzinos fatos. Cantu prima diant dèpere èssere vatzinados peri totus is residentes e su personale de is Rsa de sa Sardigna.

Martis a merie in Ogiastra, s’est concruida sa campagna de controllu sanitàriu aprontada dae sa Regione Sardigna “Sardi e Sicuri”, cun sa collaboratzione de su microbiòlogu e ordinàriu de s’Universidade de Pàdova Andrea Crisanti. Ant leadu parte a su progetu totu is 23 comunos de su territòriu.

Is proas ant a èssere torradas a repìtere a pitzu de totus is chi sunt resurtados negativos a su primu tampone tra una chida, s’11 e su 12 de ghennàrgiu. In Ogiastra in custas duas dies sunt istados fatos 26.936 tampones e sunt istados registrados 142 positivos. Eris a note però est lòmpida sa noa dae su repartu Covid de su Laboratòriu de Anàlisi de s’Ispidale Santu Frantziscu de Nùgoro, chi ant curretu calicunu datu, comente su de Irbono, acanta is 6 positivos sunt resurtados a sa segundu controllu totu negativos.

S’adesione a su monitoràgiu est istada arta, prus de su 50% de is residentes de is biddas ogiastrinas at fatu su tampone. In custas duas dies sunt istados fatos 26.936 tampones e sunt istados registrados 142 positivos.

Nùmeros artos in Tertenia (29) e in Tortolì (30).

Ma ite nde essit a campu dae is resurtados de su monitoràgiu a pitzu de s’ispàinu de su virus in sa zona? Osservemus cun atentu is nùmeros de cada comunu:

Talana 2,28 %

Tertenia 1,57 %

Elini 1,26 %

Seui 1,23 %

Lotzorai 0,77 %

Biddamanna 0,71 %

Cardedu 0,69 %

Irbono 0.63 %

Tortolì 0.56 %

Gelisuli 0,56 %

Baunei/Santa Maria 0,47 %

Lanusè 0,39 %

Foghesu 0,38 %

Àrthana 0,25 %

Triei 0,15 %

Ulassa 0,12 %

Barì 0,06 %

Nissunu casu cumproadu in is comunas de: Gàiru, Jersu, Loceri, Osini, Orthullè e Ussassa.

Pro su chi interessat s’adesione a sa campagna de controllu aparitzada dae sa Regione Sardigna, podimus afirmare chi prus de su 50% de is residentes de is sighentes biddas at fatu su tampone: Triei, Ussassa, Loceri, Elini, Seui, Biddamanna, Orthullè, Gelisuli, Ulassa, Lotzorai, Foghesu, Baunei e Cardedu.

A s’imbesse, meda bassa sa partetzipatzione a s’indàgine epidemiològica de is abitantes de Talana, in ue comente giai naradu in pretzedèntzia s’est cumproadu un’artu tassu de positivos in base a is proas fatas.

De sutaliniare chi podiant partetzipare a su monitoràgiu solu is residentes dae is deghe annos in susu.

Attività realizzata col contributo della Regione Sardegna – IMPRENTAS 2020-2021. LR 22/2018, art. 22”