In custas dies coladas semus andados a girollu in su tretu cungiadu de sa lìnia ferroviària Mandas-Arbatassa.

Is binàrios chi partint dae s’istatzione de Seui e lompent a sa de Gàiru, colende dae su sartu de Ussassa, est cungiadu dae medas annos, pro more de duos pontes de s’Otighentos chi no ant passadu su collàudu.

Pro is amantiosos de su Treninu Birde, sa ferrovia chi passat in custas biddas est cunsiderada sa prus bella de sa Sardigna.

Ph: Roberto Anedda

Custu pro ite sa lìnia in custu tretu arribat a unu logu ìnnidu de bellesa rara, in mesu a is montes imbusciados dae padentes crosos, in ue est fàtzile a bìere muvrones, chervos, sirbones e àteras feras.

In custu logu ispantosu meda, no est raru a ammirare su bòlidu de s’àbbila chi faghet su niu in is bellos Tacos de sa zona.

Ph: Roberto Anedda

In custu tretu de ferrovia matas mannas, a una parte e a s’àtera de is binàrios, òbiant is naes issoro faghende umbra e donende friscura a chie ddoe colat.

Ph: Roberto Anedda

Non su Treninu Birde, chi comente amus naradu, ocannu puru no at biagiare in custa trata. Pro poderare biu su regordu de is chi ant bidu custos logos e pro ingangulitzare is chi non ddoe sunt mai istados, amus detzisu de pònnere calicuna fotografia.

Ph: Roberto Anedda

Cun custa iscusa amus a bìdere peri a ite puntu sunt is traballos pro torrare a pònnere in seguresa is pontes chi is annos colados no ant passadu su collàudu.

Ph: Roberto Anedda

Tzertu s’emergèntzia de su COVID-19 ocannu no at agiudadu a apressibire is cantieris, però tocat a nàrrere ca custa zona, pro medas cosas, paret iscarèssida dae totus e medas servìtzios pro sa populatzione sunt pighende s’àndala de su fumu.

Ph: Roberto Anedda

Difatis, is impresàrios de su logu sunt cungende medas atividades in su setore de su turismu.

S’ispera est chi sa lìnia Mandas-Arbatassa siat aberta totu cantu prima, pro ite su Treninu Birde est perfetu peri pro una vacàntzia in seguresa, sena gente a incarcu, bidu su perìgulu semper presente de su Coronavirus, chi nos at a acumpangiare peri pro su tempus benente.

Prus de mesu millione de italianos traballant in vacàntzia, pro unu giru de afares de casi unu milliardu e mesu de èuros.

Cun medas ufìtzios pùblicos e privados cungiados pro more dae is limitatziones contra s’ispàinu su coronavirus, is tzitades italianas sunt bòidas.

Su traballu inteligente at àpidu una resèssida manna, e custu fenòmenu at a èssere un’ocasione importante pro su setore e is impresàrios de is servìtzios turìsticos.

Unu mercadu nou, cun casi su 25% dae is italianos chi ant a traballare collegadu dae remotu, ma in villegiatura.

Ph: Roberto Anedda

Una vacàntzia carculada in mèdia de unas baranta dies, paris cun totu sa famìlia. Sa cosa prus importante pro custos turistas noos est chi su servìtziu pro su collegamentu a internet siat bonu meda.

Sa destinatzione preferida est su mare, e sa regione italiana cun prus ofertas “workstation” – postòrgios de traballu — est sa Pùllia. Fatu fatu ddoe est Sardigna, cun Crabonaxa chi est resurtada sa localidade prus seberada dae is “traballadores in vacàntzia”.

Ph: Roberto Anedda

Custu pro ite sa bidda sarda est sa chi at ofertu prus solutziones de biàgiu aposta pro custa casta de clientela.

In custas dies coladas, semus andados a bisitare su tzentru tzitadinu e su sartu de Crabonaxa. In is carreras amus agatadu gente meda passigende, e ristorantes e tzilleris fiant prenos.

Ph: Roberto Anedda

Is areniles cun medas fileras de paracos pro su sole, sunt istados ocupados dae is turistas, innamorados de is colores de su mare cristallinu.

Ph: Roberto Anedda

Chie ddoe est giai istadu ischit de ite semus alleghende. Su mare est comente su chelu craru sena nues, e is areniles lughentes che s’oru. Tocat a andare a ddos bìdere custos logos, tra is prus bellos de sa Sardigna.

Ph: Roberto Anedda

Cussigiamus de bisitare is plajas de Portu Giunco, Punta Molentis, Proceddus, Simius e de Portu Sa Ruxi. Una prus bella de s’àtera.