Lìbanu, forte esplosione eris in sa zona de su portu de Beirut. Sunt prus de 100 is mortos e mìgias is feridos, tra custos peri duos sordados italianos chi faghent parte de un’unidade de su contingente italianu in Lìbanu. Su ministru at annuntziadu s’istadu de apretu in totus is ispidales de sa capitale.

Comente at iscritu Repubblica no est galu crara sa dinàmica de is eventos, ma segundu su chi iscrient is giornales locales si diat tratare de prus esplosiones, una de is cales diat àere corfidu unu magasinu acanta ddoe teniat allogadu materiale esplosivu, ma non s’ischit galu de cale natura.

Forsis unu magasinu de patarros e fogos de artifìtziu secuestrados dae is autoridades doganales de su portu. Segundu su canale televisivu pan-àrabu Al Mayadeen s’isciòpidu chi est istadu intesu fintzas a Tzipru, a 200 chilòmetros de distàntzia, diat èssere istadu provocada dae nitradu de ammòniu.

Segundu s’agèntzia turca Andalu, unu palatzu de tres pranos pagu a presu nd’est caladu a càusa de su rebentamentu e ddoe tenet gente a suta s’isciùsciu.

Fontes israelianas cualificadas, remonadas dae Reuters, ant coitadu a nàrrere chi Israele non tenet nudda de ite fàghere cun su chi est capitadu in su portu de Beirut. Fintzas Hezbollah at decraradu chi s’esplosione no est istada causada dae mìssiles. In su Paisu b’est tensione pro sa publicatzione chenàbura de sa sentèntzia de su Tribunale ispetziale pro su Libanu pro s’ochimentu de s’ex primu ministru libanesu Rafiq Hariri, babbu de Saad, mortu in Beirut su 14 de freàrgiu de su 2005 paris cun àteras 21 persones. In su banchitu de is imputados bator membros de Hezbollah cun s’acusa de “complotu a iscopu terrorìsticu e omitzìdiu preterintentzionale”.

A merie Donald Trump aiat naradu ca forsis ddoe teniat sa possibilidade chi su rebentamentu esseret un’atentadu terrorìsticu: «Apo addobiadu sos generales nostros e paret chi non siat un’intzidente industriale. Issos narant chi s0assimbìgiat prus a un’atentadu, forsis una bomba».

Su ministru de sa Salude de su Lìbanu at sotadu sa gente a lassare sa tzitade. S’àera luada dae is esplosiones diat pòdere difatis tènnere cunsighèntzias fintzas mortales.

«Facu un’apellu pretzisu a totus is Paisos frades chi istimant su Libanu a istare a su costàgiu suo e a nos agiudare a senare is feridas profundas nostras» at naradu su primu ministru libanesu.

Frantziscu at segadu su mudìmene, alleghende de sa detzisione de su primu ministru turcu Recep Tayyip Erdogan a pitzu su museu de Santa Sofia in Istanbul.

A s’agabbu de s’Angelus su Santu Padre at afirmadu: “So in pensamentu pro Santa Sofia e so addolimadu meda”.

Pagos faeddos ma graes meda in mèritu a sa ricunversione de su sìtiu dae museu a moschea.

Erdogan, in is dies coladas at naradu chi dae su 24 de chenàbura de custu mese, s’istrutura at a torrare a abèrrere a su cultu islàmicu. Sa chèscia de Paba Bergoglio s’agiunghet a sa de su Patriarca de Costantinòpoli.
Bartolomeo I at fintzas ipotizadu chi custa mòvida de su presidente turcu diat pòdere creare trèulos tra cristianos e musulmanos.

Difatis Santa Sofia fiat devènnida unu logu in ue is culturas de s’Oriente e de s’Otzidente s’abbratzaiant una cun s’àtera. Peri sa Crèsia Ortodossa russa cun su Patriarca de Mosca Kiril at naradu chi est sentende meda su chi est capitende.

S’edifìtziu dedicadu a sa sapièntzia de Deus – Sophia – dae su de VI sèculos d.c. a su de XV sèculos, est istadu prima una catedrale gregu-catòlica e de posca ortodossa.
In su perìodu otomanu ebbia est devènnidu una moschea fintzas a su 1931, cando est istada trasformada in unu museu gràtzias a unu decretu de su babbu fundadore de sa Turchia moderna: Mustafa Kemal Ataturk.

Su guvernu turcu de immoe at rispostu a is protestas arribbadas dae totu su mundu, decrarende chi est unu sèberu leadu in coerèntzia cun “soberania natzionale” .
In prus at sutaliniadu chi no at a èssere negadu s’atzessu a is chi non sunt musulmanos, gosi comente acontesset giai in totus is àteras moscheas.

Sa ricunversione cuntestada de Santa Sofia, est istada tra is temas tratados a su telefònu dae su presidente russu Vladimir Putin e s’omòlogu turcu suo, a pustis de su collòchiu a pitzu de situatzione in Lìbia e Sìria. Dd’at fatu a ischire su Cremlinu etotu. Putin diat àere postu a notu a Erdogan chi s’opinione pùblica in Rùssia est istada tocada meda dae sa detzisione turca.