Frantziscu at segadu su mudìmene, alleghende de sa detzisione de su primu ministru turcu Recep Tayyip Erdogan a pitzu su museu de Santa Sofia in Istanbul.

A s’agabbu de s’Angelus su Santu Padre at afirmadu: “So in pensamentu pro Santa Sofia e so addolimadu meda”.

Pagos faeddos ma graes meda in mèritu a sa ricunversione de su sìtiu dae museu a moschea.

Erdogan, in is dies coladas at naradu chi dae su 24 de chenàbura de custu mese, s’istrutura at a torrare a abèrrere a su cultu islàmicu. Sa chèscia de Paba Bergoglio s’agiunghet a sa de su Patriarca de Costantinòpoli.
Bartolomeo I at fintzas ipotizadu chi custa mòvida de su presidente turcu diat pòdere creare trèulos tra cristianos e musulmanos.

Difatis Santa Sofia fiat devènnida unu logu in ue is culturas de s’Oriente e de s’Otzidente s’abbratzaiant una cun s’àtera. Peri sa Crèsia Ortodossa russa cun su Patriarca de Mosca Kiril at naradu chi est sentende meda su chi est capitende.

S’edifìtziu dedicadu a sa sapièntzia de Deus – Sophia – dae su de VI sèculos d.c. a su de XV sèculos, est istadu prima una catedrale gregu-catòlica e de posca ortodossa.
In su perìodu otomanu ebbia est devènnidu una moschea fintzas a su 1931, cando est istada trasformada in unu museu gràtzias a unu decretu de su babbu fundadore de sa Turchia moderna: Mustafa Kemal Ataturk.

Su guvernu turcu de immoe at rispostu a is protestas arribbadas dae totu su mundu, decrarende chi est unu sèberu leadu in coerèntzia cun “soberania natzionale” .
In prus at sutaliniadu chi no at a èssere negadu s’atzessu a is chi non sunt musulmanos, gosi comente acontesset giai in totus is àteras moscheas.

Sa ricunversione cuntestada de Santa Sofia, est istada tra is temas tratados a su telefònu dae su presidente russu Vladimir Putin e s’omòlogu turcu suo, a pustis de su collòchiu a pitzu de situatzione in Lìbia e Sìria. Dd’at fatu a ischire su Cremlinu etotu. Putin diat àere postu a notu a Erdogan chi s’opinione pùblica in Rùssia est istada tocada meda dae sa detzisione turca.

Is autoridades de su logu ant naradu chi su “Magic Bus” poniat in perìgulu sa vida de is andaiant a ddu bìdere e pro custu est istadu leadu cun unu elicòteru.

Su postalinu betzu e ruinadu fiat parchegiadu in su coro de su parcu natzionale de Denali, a chèntinas de chilòmetros a nord de Anchorage, in s’àndala Stampede.

Custu veìculu est divenidu famadu pro ite, su 6 de cabudanni de su 1992, ddoe est istadu agatadu mortu Christopher McCandless, unu pitzocu de 24 annos chi aiat detzìdidu de andare a bìvere in Alaska.

S’idea de su giòvanu fiat sa de bìvere de su chi diat àere agatadu in su sartu. Un’ispètzia de refudu in is cunfrontos de sa sotziedade materialista e de su consumu, arribbada a pustis de s’èssere laureadu. Christopher a pustis de àere biagiadu in paritzos istados americanos, fiat lòmpidu in Alaska, in ue si pensat chi siat mortu de patimentos.
S’istòria sua, acapiada in s’ùrtimu perìodu a su “Magic Bus” – comente beniat mutiat su postalinu – est istada contada in su giornale Outside de Jon Krakauer, s’iscritore americanu chi fatu fatu at publicadu su libru a tìtulu “Nelle terre estreme”, chi at ispiradu su film de Sean Penn “Into the wild”. Ispantosas meda is mùsicas de Eddie Vedder, colonna sonora de s’òpera tzinematogràfica .

In medas, pro copiare sa marrania disfortunada de McCandless si sunt aventurados in cussu logu ispèrdidu pro agatare su pulminu, divenidu sa domo e sa tumba de Christopher. Ogna annu percursu fiat rugradu dae chèntinas de persones, medas privas de esperièntzia e de atretzadura adeguada, chi pro ddoe lòmpere arriscaiant sa vida. Paritzos sunt mortos allupados chirchende de giumpare is abbas fritas de su riu Teklanka, àteros ant pèrdidu sa vida in caminu.
Fintzas unu grupu de escursionistas italianos, pagos meses a oe, est istadu sarbadu dae is guàrdias de su parcu natzionale.
Ogna interventu de sucursu cumportaiat medas isfortzos e costos tropu artos, e pro custu is autoridades s’Alaska ant detzisu de nde pesare su postalinu.

Istravanadas meda is immàgines giradas dae is sordados de sa Guàrdia Natzionale chi ant elitrasportadu su pulminu betzu, bolende in pitzu de is padentes crosos de conìferas.
De acòrdiu pro nde iscostiare su mezu fintzas sa sorre de Christopher, Carine McCandless, chi at sotadu is escursionistas ispirados dae su frade a bìvere s’Alaska in seguridade. Galu non s’ischit in ue su “Magic Bus” at a èssere postu.