Su Casteddu at bintu 2-0, a pustis de una partida giogada bene meda. S’iscuadra torrat a bìnchere a pustis de medas partidas.

Fiat dae sa partida contra su Torinu — dae tando sunt coladas oto giornadas – chi is casteddajos no oteniant tres puntos.

Pro otènnere sa bìnchida contra sa Juventus is meres ant bòlidu duos gol: su primu de su giòvanu Gagliano e s’àteru dae Simeone.

Una bella satisfatzione pro is sardos su de bìnchere contra s’iscuadra chi sa partida colada at conchistadu s’iscudetu.

Casteddu-Juventus no est istada una gara traballosa meda pro is giogadores de Walter Zenga pro ite sunt resèssidos a fàghere gol a lestru cun Gagliano. A pustis est lòmpida sa rete de Simeone, gràtzias a su passàgiu de sa giòvana promissa casteddaja.

Is biancu-nieddos no ant reagidu e non sunt resèssidos a adderetzare su resurtadu a s’acabbu de su primu tempus.

S’iscuadra piemontesa est parta iscambada e sena gana de gherrare, podet èssere pro ite fiat pensende giai a sa partida de sa Copa de is Campiones contra su Lione.

Ronaldo puru, su mègius giogadore de Sèrie A, at delusu meda, e a su segundu tempus su resurtadu no est cambiadu.

Duncas su Casteddu at donadu una proa manna in sa Sardigna Arena, superende cust’ùltima parte de s’istajone mala meda.

Pro su campionadu nou at èssere importante renèssere a abarrare unidos e a nde bogare a foras su matessi caràtere de is primos meses de s’istajone colada.

Est pretzisu a megiorare meda sa difesa, forsis su setore prus male pigadu, e chi torret sanu Pavoletti. Custu pro more chi is atacantes torrent a èssere de muta bona, pro fàghere gol comente in is bellos tempos.

Pro regalare una bella satisfatzione a is tifosos sardos, a pustis de unu 2020 iscuminigadu.

Prima però is casteddajos ant a giogare contra su Milan, foras de domo. Sa partida chi benit no at a èssere fàtzile pro ite is lombardos sunt in bonas cunditziones. Su Casteddu depet tènnere a mente ca at pèrdidu sa partida de su girone de andada contra s’iscuadra de Zlatan Ibrahimovic. Pro Zenga – ex portieri de s’Inter – est unu derby.

Casteddu-Torinu est istada una partida bella meda, in ue is sardos ant giogadu bene a beru. Su Casteddu torrat a bìnchere duas partidas de sighidu.

A pustis de sa trasferta vitoriosa a Ferrara contra sa Spal, su Casteddu at torradu a cassare is tres puntos tra is muros amigos de su Sardigna Arena.

Sa prima rete de Casteddu est istada marcada dae Nahitan Nandez – a sa segunda rete in custu campionadu -. A sighire est arribadu su 2-0 de s’atacante argentinu Giovanni Simeone.

Raja Nainggolan – torradu de s’infortùniu – at marcadu su gol de su 3 a 0, cun unu bella fichida de pee iscuta dae largu. S’iscuadra de s’allenadore Longo a pustis at apretadu unu pagu su Casteddu cun sa rete de su difensore Gleison Bremer, e a pustis cun Andrea Belotti, chi est resèssidu a marcare su segundu gol.

Posca est lòmpidu su de bator puntos de sa Casteddu, cun su rigore iscutu dae su brasilianu Joao Pedro.

Is giogadores sardos no ant sufridu e, abarrende unidos, sunt resèssidos a cungiare sa partida cun custu resurtadu.

Cuntentu meda s’allenadore de su Casteddu Walter Zenga, pro ite is giogadores suos ant chircadu de bìnchere a ònnia còstidu.

A s’agabbu de sa partida, paràulas bellas de s’ex portieri de sa natzionale italiana pro sa prestatzione de Andrea Carboni, giogadore giòvanu de Tonara, a sa prima partida dae titulare cun su Casteddu.

Unu triunfu pro is binchidores e grandu cuntentu pro is tifosos casteddajos. S’allenadore de su Torinu Moreno Longo, s’est cumplimentadu cun iscuadra isolana, fintzas si s’est arrennegadu cun is giogadores suos pro no aerent gherradu semper durante sa partida. Su Casteddu abarrat in sa parte arta de sa classìfica e is tifosos suos sighint a sonniare.

Cun custa partida su Casteddu at a tènnere galu de prus sa possibilidade de proare a s’inserire in sa luta pro is cualificatziones a sa Liga Europea benente.