Semus andados a bisitare is carreras de su tzentru de sa tzitade prus traficadas dae sa gente in custas dies.

A girollu pro bìdere si s’economia tzitadina est torrende•si a istantargiare, a pustis de s’apretu de su COVID-19.

Sunt colados prus de duos meses, dae cando totus is atividades econòmicas ant pòdidu torrare a abèrrere, ma pro s’ora in Casteddu, s’intendet meda sa mancàntzia de is turistas istràngios.

Pro fàghere un’esèmpiu s’annu coladu, in sa matessi iscuta de tempus, bie s’ora de pràngiu is ristorantes e is tzilleris de sa Marina e de Stampaxi fiant prenos a isticu de clientes.

Ph: Roberto Anedda

Immoe is mesas in foras sunt bòidas e sena turistas papende e bufende in cumpangia. Pro fortuna a s’ora de chena, su traballu est de prus, ma est tropu pagu pro recuperare is pèrdidas de su mangianu.

In prus tocat a pensare chi custos locales, ant dèpidu istòddere is postos pro more de is règulas noas contra sa pesta de su Coronavirus.

Medas cummertziantes chi amus intesu, sunt oriolados meda pro ite non resessent a pagare sa pesone de su locale.

Ph: Roberto Anedda

In medas casos, is meres dae is muros ant lassadu su matessi prètziu de prima de s’apretu de su COVID-19, sena fàghere iscontu nudda. Si custa situatzione no at a mudare, ant a èssere medas is impresàrios chi ant a cungiare butega.

Tzertu, is contos s’ant a fàghere in is meses chi benint, pro ite est galu a coitu pro bìdere comente at andare de a veras totu s’istajone turìstica.

Ph: Roberto Anedda

Si contat chi sa situatzione in tzitade potzat cambiare a lestru, pro ite in su portu de Casteddu diant a pòdere lòmpere is naves mannas de crusiera.

Nd’amus a torrare a chistionare tra unas cantas chidas, pro bìdere chi is caminos de sa “passillada” de is casteddajos, s’ant a torrare a prenare de gente. Diat a èssere unu sinnale bonu pro s’economia de sa tzitade.

Ph: Roberto Anedda

Ma si ant a lòmpere a beru is turistas, at a tocare a abarrare prus abbistos contra sa pesta de su coronavirus. Pro cussu, cando serbit, est a si pònnere sa mascaredda.

Grandu festa, sàbadu coladu, in Portu Frailis – Arbatassa- pro sa manifestatzione Red Valley Sea Festival.

At arribbadu gente meda pro bìdere is cantantes Salmo e Ghali, istellas de sa mùsica natzionale italiana, chi ant cantadu dae pitzu de una barca, in custu particulare cuntzertu in mare.

Su palcu est istadu aparitzadu in pitzu de una barca a beru – sa Lady Ship – a largu de s’arenile, in su murinadòrgiu.

PH: Roberto Anedda

Is chi ant acudidu a custu eventu ispetadu meda, ant iscurtadu sa mùsica e ant bidu su cuntzertu in pitzu de is barcas. Duncas ant rispetadu is normas de istesiamentu sotziale e cando est serbidu, s’ant postu finas is mascareddas.

Is organizadores de sa manifestatzione si sunt impinnados meda pro evitare chi su bellu mare ogiastrinu èsseret imbrutadu o luadu, bida sa presèntzia manna de imbarcatziones e de gente. Pro custu motivu, e pro sa seguresa de su pùblicu, s’est sighidu unu protocollu de règulas pretzisu meda.

Bidu su sutzessu mannu chi at tentu custa versione noa de su Red Valley, custa diat a èssere una bona solutzione finas pro àteros ispetàculos.

PH: Roberto Anedda

Ma is chi ant ammaniadu s’eventu ant seberadu custa fòrmula pro more de is limitatziones impostas dae is normas contra su Covid-19.

Tzertu Salmo e Ghali sunt nùmenes famados natzionales, sunt sighidos dae medas sustenidores, duncas su sutzessu fiat belle seguru. Non est seguru imbetzes chi sa pròpiu cosa andet bene cun àteros cantantes.

Su Fèstival Red Valley in is annos colados est istada una manifestatzione tra is prus bellas in su cartellone musicale de s’istade sarda. In sa pratza de is Iscòllios Rujos in Arbatassa, sunt lòmpidos nùmenes mannos de sa mùsica internatzionale. Artistas balentes chi ant cantadu a in antis de mìgias de persones.

Pròpiu s’annu coladu, in su mese de austu, su terranoesu Maurizio Pisciottu – in arte Salmo- at cantadu bufende e ballende in mesu a sa gente.

S’istade imbeniente diat a èssere bellu meda a torrare a bìdere cussa pratza prena de persones. Custu est s’augùriu nostru pro su Red Valley.