S’annu coladu, segundu is datos de s’osservatorju regionale de su turismu, Tortolì est resurtada a su primu postu de sa classìfica comente zona cun prus turistas isulanos durante s’arta istajone.

Tra mese de argiolas e cabudanni, is presèntzias de is bacantzieris sardos in totale sunt istadas 49014. Custu est su nùmeru is chi ant passadu sa note in Tortolì, chi ant allogiadu – prus che totu — in logu de albergu.

Su datu nd’est essidu a campu in su de tres atòbios de “Tourism Master Classess Webinar”, cuncordadu dae “Sardinia Tourism Call to Action”.

Custu reconnoschimentu est unu bellu billete de bìsita pro su turismu e pro s’economia de Tortolì e de totu s’Ogiastra.

Una noa bella a beru, pro ite non s’ischit comente at a èssere s’istajone a pustis de s’abertura a is ispostamentos tra regiones italianas e natziones europeas.

Ph: Roberto Anedda

In is dies coladas, semus andados a bìdere is ispiàgias de Tortolì, unu de is ùrtimos bìculos de paradisu abarrados in sa Terra.

Su de bìdere torra is plajas animadas dae sa gente, nos at prenadu su coro de ispera pro su tempus benente.

Podimus nàrrere chi sardos e continentales meda, siant lompende ocannu puru, e custa est una noa bona meda pro s’istajone turìstica.

Ph: Roberto Anedda

In custa dies s’abba de su mare est colore de su chelu craru sena nues, e is areniles lìmpidos che s’oru.

Pro bìdere custos logos ispantosos meda, diat a bastare andare pagu a largu de sa bidda prus manna de sa s’Ogiastra.

Semus alleghende de s’ispiàgia de Orrì, un’arenile a pagos chilòmetros dae Tortolì. Pro ddoe lòmpere semus colados dae s’istrada chi s’agatat a pustis s’essida de su tzentru tzitadinu, conca a Casteddu.

Un’àtera plaja chi mèritat una bisita, semper in su sartu de sa tzitadina ogiastrina, est cussa de “Foxilioni”, pagu prus addae de Orrì.

A pustis de un’àtera pariga de chilòmetros de istrada ddoe est s’ispiàgia de Muscì. Pro arribare a custu logu tocat a fàghere un’àndala isterrada.

Cussigiamus de bisitare puru is plajas de Santu Millanu, Portu Frailis, Cala Morisca e sa “Capannina” chi s’agatant iscudende conca a Arbatassa.

Pro chie bolet chircare galu àteros logos bellos, at a bastare andare pagu prus a largu, o conca a Lotzorai opuru a s’àtera banda, conca a Barì. S’Ogiastra est bella totu.

Tocat de andare a ddu bìdere custu logu ammajadore. Non solu pro pòdere fàghere una caminada in seguresa, pro evitare atropèlliu de gente, ma fintzas pro mirare calidades meda de erbas e de àrbores chi ddoe creschent.

Ph: Roberto Anedda

Semus alleghende de Margiani Pubusa, unu monte chi lompet a un’artària de 1320 metros subra su livellu de su mare, e s’agatat in su sartu de Seui. Unu logu ìnnidu de bellesa rara, sa zona de Tònneri, a làcana cun Perda de Liana – in sartu de Gàiru -, e in bàsciu cun Frùmini, in sartu de Àrthana.

Ph: Roberto Anedda

In ue si podet bìere cun muvrones, chervos, sirbones e àteras feras. Sunt diferentes puru is ispètzias de pugiones: astores, istrias, cucumiaos, perdighes e gosi sighende.

No est raru a ammirare su bòlidu de sa “reina de su chelu”: s’àbbila. In su tempus coladu, in custos montes, s’agataiat fintzas su gurtùrgiu – de ossu o barbudu -. S’ùrtimu est mortu casi chimbanta annos a oe.

Ph: Roberto Anedda

Pro lòmpere a Margiani Pubusa, semus colados dae s’istrada chi s’agatat a giosso de Tònneri, ma si diat a pòdere fàghere peri de su caminu de Montarbu.

S’ àndala pro arribare a sa punta de su monte est agiumai totu isterrada. Su primu tretu est caminu bonu, imbetzes su chi sighit in mesu a su padente est prus in essida, e s’ùrtimu bìculu de caminu est su prus istragosu, mancari siat impedradu. Tzertu s’àndala est meda mègius oe de comente fiat a unu tempus, pro ite est istada arrangiada. Immoe bastant chimbanta minutos, màssimu un’ora, pro lòmpere a punta su monte.

Ph: Roberto Anedda

Subra de Margiani Pubusa s’agatat su postòrgiu pro fàghere craru de Forestas, pro amparare su sartu de is fogos in s’istade. Custa est istada fraigada in is annos sessanta de su millenoighentos.

Ph: Roberto Anedda

A 1320 metros sa vista est un’ispetàculu ispantosu meda. A fàghere de cornitze a Margiani Pubusa ddoe sunt a ponente is montes de su Gennargentu, a tramuntana sa “sorre” Perda de Liana, a oriente is costas e su mare ogiastrinu, a solianu si bidet Monte Santa Vitòria – in sartu de Stersili – e su Campidanu.