Unu grupu de turistas americanos est aterradu eris mangianu a s’aeroportu de Casteddu cun unu bolu privadu: is passigeris, in totu una deghina, ma cussos interessados de sa norma sunt 5, ant a dèpere fàghere contoniare a logu issoro pro more de is limitatziones ligadas a sas normas in su Coronavirus.

“Sa Regione Sardigna non tenet niuna responsabilidade pro su chi est capitadu. In deretura, cun sa collaboratzione de sa sotziedade de gestione de s’aeroportu, nos semus donados ite fàghere – aviende leende cuntatu cun su Guvernu, su Ministeru e su Prefetu – pro agatare una solutzione chi cunsentiret a is passigeris americanos de abarrare in Sardigna, fintzas rispetende su perìudu de cuarantena”.

Dd’at naradu su presidente de sa Regione Christian Solinas cummentende su fatu chi at interessadu unu grupu de turistas arribbadu in Sardigna cun un’aèreu privadu bènnidu dae su Nord Amèrica e chi dae eris a mangianu est firmu in s’aeroportu de Casteddu-Su Masu cun is passigeris chi isetant de ischire si ant apòdere isbarcare pro sas limitatziones ligadas a is normas natzionales in su Coronavirus.

“S’interpretatzione restritiva particulare de is normas fata dae su Guvernu, mancari sa garantzia nostra de de garantire fintzas in custu casu sa seguridade sanitària, at causadu unu dannu mannu a sa credibilidade turìstica internatzionale de s’ìsula Nostra e de su sensu nostru de ospitalidade. Nos auguramus chi in is oras sighentes si fatzat unu’isfortzu pro cunsentire sa risolutzione de custu fatu”, at concruidu su presidente.

Is problemas essidos a campu a pustis de s’isbarcu, fatu fatu a is controllos de frontera. Dae eris difatis s’Unione europea at abertu a is bolos internatzionales, lassende foras però carchi Paisu tra sos cales pròpiu is Istados Unidos.

Ma fintzas is àteros chimbe de sa comitiva ant detzìdidu de lassare sa Sardigna. Pro solidaridade cun is amigos, fintzas issos ant a fàghere torrada in Colorado. Custos, tra is cales calicunu sardu, diant èssere pòdidos abarrare in Sardigna osservende sa cuarantena.

In un post pùblicu s’ex sìndigu de Casteddu Massimo Zedda at pubblicadu su cumentu indiritzadu a su Guvernadore Solinas in riferimentu a sa abertura sena controllos de portos e aeroportos sardos.

Un’atacu frontale, chi bullat sa lìnia polìtica tenta dae Christian Solinas in is ùrtimos meses.

«Su Presidente de sa Regione aberit totu, portos e aeroportos, sena controllu perunu – si leghet in su post- in su mentres chi in is televisiones e in is giornales naraiat de bòlere crastinare s’arribu de is turistas, pro contivigiare sa salude de is sardos cun passaportos, esàmines, anàlisis de su sàmbene, tampones e gosi sighende, in sa matessi ora iscriiat a su Ministru de is trasportos pro pedire de torrare a abèrrere totu. Est unu machiore: imbetzes de nd’aprofitare de su fatu chi s’Ìsula apat tentu unu nùmeru bassu de impestados e de traballare pro s’abertura in seguridade, a s’imbesse semus sa regione cun su livellu prus bassu de preventzione e organizatzione in su territòriu».

«S’autotzertificatzione non benit recherta a s’isbarcu in sos portos e aeroportos sardos – sighit Zedda – comente ant naradu diversos servìtzios giornalìsticos, s’aplicatzione pensada dae sa Regione no esistet e si peri si esisteret non diat serbire pro ite solu s’app Immuni de su Guvernu cunsentit de torrare a cumpònnere sos cuntatos de una persone positiva cun àteras persones, no esistent protocollos adotados e trasmìtidos a is istruturas ritzetivas, non ddoe at protocollos de seguridade pro is ispidales,a su puntu chi is bìsitas ordinàrias sunt firmas, unu muntone de sardos sunt isetende dae paritzos meses de pòdere prenotare una bìsita e non sunt istados predispostos prèsidios sanitàrios territoriales in is logos in ue ddoe at sa contzentratzione prus manna de turistas».

« Duos meses a oe diamus àere tentu sa possibilidade de inghitzare un’isperimentatzione pro torrare a abèrrere a pagu a pagu, cun trastos e at risursas frunidos dae su Guvernu, ma su presidente at pensadu chi esseret prus importante allegare de passaportos sanitàrios chi non esistint e de ddu contare in televisione – concruit s’ex sìndigu-. Diat àere dèpidu traballare, ma s’ischit, a traballare istracat».