Casteddu. Gente meda in is carreras de su tzentru de sa tzitade pro assìstere a s’ispetàculu de is Fritzas Tricolore.

S’ocurrèntzia est istada su 74° anniversàriu de sa nàschida de sa Repùblica italiana.

Custa est sa de tres tapas de is bòlidos chi sa Patùllia Acrobàtica Natzionale at a fàghere in totu is regiones italianas.

Ph: Roberto Anedda

Is Fritzas ant mòvidu dae s’aeroportu de Rivolto – provìntzia de Ùdine – su 25 de maju, pro fàghere is primos bòlidos subra is tzitades de Nord de s’Itàlia. Pro s’ispetàculu de Casteddu, imbetzes, s’iscuadra acrobàtica at mòvidu dae Deximumannu.

Paritzos casteddajos ant isetadu a bruncu in susu su passàgiu de is aèreos de s’aeronàutica militare italiana.

Is Fritzas ant rugradu in bolu sa tzitade a is ùndighi mancu cuartu, puntuales cun su programma aprontadu pro sa die.

Sa formatzione de is noe aeroplanos at boladu pro pagos segundos, e at intintu su chelu cun is colores de sa bandera italiana.

Sa Patùllia est passada subra sa carrera de Carlo Felice e est artziada conca a su cuarteri de Casteddu de Susu.

A pustis at sìghidu a bolare cara a su Poetu, in ue at furriadu, pro s’ùrtimu bolu subra Casteddu, conca a Palermo, segunda tapa de oe de su 313º Grupu Addestramentu Acrobàticu.

Bidas is limitatziones de is meses colados, su bolu de is Fritzas est unu imprassu simbòlicu a totu sa Natzione chi est dereta de nd’essire dae s’apretu de su Coronavirus.

Su Giru de Itàlia de sa Patùllia Acrobàtica dae s’aeronàutica Militare italiana at a acabbare su 2 de làmpadas cun su bolu subra sa tzitade Roma. Sa die de sa Festa de sa Repùblica, chi pro ocannu non at a bìdere sa traditzionale parada militare in is Foros Imperiales.

Su fumu cun is tres colores de sa bandera – birde, biancu e ruju – diat bòlere rapresentare s’unidade de s’Itàlia e s’ispera chi s’economia si potzat torrare a istantargiare.

In fines est arribbada a domo sua. Silvia Romano at barigadu su liminàrgiu de apartamentu de Milanu, in bia Casoretto, paris cun sa mama e cun sa sorre.

Sunt colados degheoto meses dae cando sa cooperadora lombarda est istada furada in Kènia. Pro prus de un’annu e mesu est istada presonera in Àfrica, cambiende diversos atacadòrgios.

Sa Procura de Roma chi indagat pro su rapimentu de Silvia Romano, at imbiadu una rogatòria a su guvernu de sa sòmalu pro pedire sa collaboratzione de is autoridades giuditziàrias locales.

Difatis sa giòvana, a pustis chi unu cumandu de oto persones nde l’aiat leada dae unu tzentru cummertziale keniota in su mese de onniasantu de su 2018, est abarrada presonera de su grupu terrorista islàmicu Al Shabaab in Somàlia.

Sa pisedda milanesa at cunfirmadu chi durante sa presonia s’est cunvertida a s’Islam e chi de immoe in susu s’at a mutire Aisha. Est craru chi sa pitzoca at bìvidu un’esperièntzia mala a beru, e pro custu ant a èssere is autoridades a istabilire si siat istada custrinta a si cunvèrtere o si l’apat fatu de idea sua.

Non mancadas is polèmicas pro su fatu chi pro la liberare est istadu pagadu unu riscatu.

Non sunt mancadas mancu is brigas tra is fortzas polìticas, cun crìticas pagu decorosas fatas dae esponentes de calicunu partidu polìticu.

Gasi comente dae unas cantas die, dae cando sa cooperadora milanesa est istada iscatividada, medas sunt istadas is cuntierras in printzipales retzes sotziales pro sa cunversione religiosa sua. Però non sunt mancadas nemmancu is manifestatziones de cuntentesa pro s’agabbu de sa presonia de sa voluntària italiana.

Sa liberatzione sua diat àere dèpidu unire totus is italianos, bida sa resèssida de s’operatzione delicada, ghiada dae su generale Luciano Carta de Golothene, chi at permìtidu a Silvia Romano de torrare sana e sarva in Itàlia.

A custu propòsitu est pretzisu pònnere a notu is faeddos de s’archipìscamu de Perugia Gualtiero Bassetti: “Totus, in custu momentu, dda intendimus comente chi siat fìgia nostra”. Su presidente de sa Cei, intervistadu dae su sitiadu Umbria24, at agiuntu faeddende semper de Silvia Romano,: “Est una fìgia nostra chi at passadu perìgulos mannos, ma chi at tentu ànimu e coràgiu meda”.