A dolu mannu su Pàliu de Siena, in custu iscomunigadu 2020, non s’at a pòdere cùrrere pro more de is provedimentos contra su COVID-19.

Una de is manifestatziones a caddu prus famada de su Mundu e tra is prus nòdidas de Itàlia est istada cantzellada in modu ufitziale.

Custa detzisione est lòmpida a pustis de sa reunione in su Palatzu Pùblicu de Siena tra is ammaniadores de s’antiga giostra de caddos.

A s’addòbiu ant partetzipadu: su sìndigu Luigi De Mossi, su magistradu e is Priores de is contradas, su decanu e su vitze-decanu de is capitanos.

Su Pàliu – segundu is documentos antigos de su XII sèculu – est istadu cantzelladu in ocasione de is duas gherras mundiales ebbia. Est capitadu dae su 1915 a su 1918, durante sa Gherra Manna, e dae su 1940 e 1944 in s’ùrtimu cunflitu mundiale.

Tzertu, s’est proadu finas a s’ùrtimu a ispostare is duas datas de sa cursa de is caddos de sa tzitade de is deghessete contradas.

Sa giostra in onore de Nostra Segnora de Proventzano si fiat pensadu de dda fàghere su 22 de austu, e sa cursa de s’Assunta su 26 de cabudanni, a pustis de s’istade.

In custas dies s’est cumpresu chi pro more de sa gravidade de su chi est sutzedende e pro mègius seguresa, s’ùnica possibilidade pro ocannu est cussa de si firmare.

S’annu coladu a bìnchere su Pàliu de su 2 de mese de argiolas est istadu su curridore Giovanni Atzeni de Nurri — numingiadu Tittia – chi at cùrridu cun su caddu “Tale e Quale” pro sa contrada de sa Giraffa .

Su cadderi sardu est lòmpidu pro primu in sa giostra de s’Assunta de su matessi annu – cun is colores de sa Selva – , mancari siat rutu de su caddu “Remorex”. Difatis, fintzas sena su cadderi, est resèssidu a bìnchere sa cursa.

Un’àteru cadderi sardu famadu meda in sa festa prus manna de sa tzitade de Siena est Andrea Degortes mutidu “Aceto”. Nàschidu in Terranoa est su cavalleri- de custos tempos – chi nche dd’at fata a bìnchere de prus su Pàliu, est a nàrrere batòrdighi bias.

Bìdidas sas limitatziones impostas pro sa pesta de su COVID-19, at a èssere unu cuntzertu de su Primu de Maju diferente meda.

Sos artistas non s’ant a mustrare dae in antis a unu muntone de gente in festa, ma custa borta su pùblicu at a pòdere assistire dae domo. Una direta in biu in su canale televisivu Raitre dae sas 20 a sas 24 conduida dae sa presentadora Ambra Angioini, pro tres bias de sighidu a sa ghia de s’eventu.

B’at chie at a cantare in pitzu de palcos improvisados, chie dae domo in collegamentu internet, ma su chi contat est chi sa mùsica de su cuntzertu de sa Festa de sos Traballadores non si siat firmada.

S’atòbiu dae trint’annos caentat su coro de sos italianos e faghet acudire una truma de giòvanos e prus pagu giòvanos in sa Capitale de Itàlia.

S’eventu de una de sas tres siglas sindacales prus importante ocannu, comente a semper, at a bantare sa presèntzia sos nùmenes prus fentomandos de sa mùsica natzionale.

Tres sos artistas de bàlia: Vasco Rossi, Zucchero e Gianna Nannini. Segundu su chi s’est pòdidu ischire, su cantante de Zocca non diat dèpere cantare ma at a saludare ebbia su pùblicu dae domo sua e espressare unu pensamentu pro sa situatzione difìtzile chi medas persones sunt bivende in custos meses de apretu. Sas àteras duas istellas de sa mùsica imbetzes ant a regalare a su pùbblicu provas de non pèrdere.

Ant a èssere presentes fintzas Edoardo e Eugenio Bennato, duas garantzias cun unu tràgiu galanu chi ant a fàghere brincare in sos divanos de domo sos telespetadore.

Digna de mentovu sa sa presèntzia de cantantes istimados meda comente a Alex Britti, Nicolò Fabi, Paola Turci, Noemi e Irene Grandi. Poi grupos musicales cun unu repertòriu ricu comente Le Vibrazioni e Lo Stato Sociale. B’at a èssere cantantes diferentes e cun generes musicales diversos, artistas giòvanos famados e àteros chi sunt faghende·si connòschere e apretziare.

Bastat a pensare a Fabrizio Moro, Ermal Meta, Francesco Gabbani e Francesca Michelin. At a èssere interessante dae bìdere duas còpias inèditas Bugo paris cun Nicola Savino, e Rocco Papaleo cun Tosca.

Non prus pagu interessantes ant a èssere sas cantzones regaladas dae Aiello, Cristiano Godano de sos Marlene Kuntz, Dardust Fasma, Fulminacci, Leo Gassmann, Margherita Vicario e s’Orchestra Accademia di Santa Cecilia.

Su cuntzertu inèditu de su Primu de Maju, in prus de èssere trasmìtidu in direta in su canales tres de sa Rai, at a èssere mandadu in cuntemporànea fintzas in sas frecuèntzias de Radio2.