In ocasione de su tour italianu chi l’at a bìere esibende·si a cumintzare dae su 30 de maju 2020 in Lignano Sabbiadoro, Tiziano Ferro at a cantare peri in Sardigna.

Su cantante de Latina at a artziare in su palcu de Casteddu s’11 de mese argiolas in sa pratza de sa Fiera Campionària de carrera Diaz.

S’artista latziale, classe 1980, est de su 2001 chi s’est incraradu in su mundu de sa mùsica natzionale.

Su primu sìngulu est istadu “Xdono”, chi at tentu sutzessu meda. Custu discu dd’at fatu lòmpere a sa punta prus arta de is classìficas de is òperas musicales prus bèndidas de totu s’Europa.

S’album sighente “Rosso Relativo”, de su matessi annu, dd’at traduidu e cantadu in medas limbas: ispagnolu, portughesu, frantzesu e inglesu.

A sighire su cantautore at realizadu, in is ùrtimos bint’annos de carriera, òperas chi ant tentu meda agradessimentu.

Bastat a nomenare calicunu de is discos suos pro cumprèndere: “111” (2003), “Nessuno è solo” (2006), “Alla mia età” (2008), “Il mestiere della vita” (2016).

Su traballu nou “Accetto miracoli” est essidu in su mese de onniasantu de su 2019, cun totus is sìngulos no imprentados.

Però is cuntzertos de ocannu de Tiziano Ferro sunt in arriscu, pro more de is ùrtimos disponimentos de su guvernu pro s’epidèmia de su coronavirus.

Est possìbile chi is ispetàculos ant a èssere fatos fughire a àteros tempos benidores. Duncas, fortzis is chi sunt interessados a iscurtare is cantzones noas de s’artista italianu, ddis at a tocare a ispetare.

A propósitu, in is dies coladas, sunt medas is artistas chi ant cantzelladu o rimandadu is cuntzertos issoro.

Is ispetàculos de Nick Cave puru, programmados in su mese de làmpadas a Roma, Milànu e Padova, sunt brincados.

Fintzas a immoe, is datas de su tour natzionale de beranu e de s’istade sunt cunfrimadas, comente at naradu su cantante latziale.

Tiziano Ferro custos faeddos ddos at narados in custas dies, in direta dae Los Angeles – in ue bivet – in s’ispàtziu sotziale Instagram.

In custa ocasione at cantadu paris cun un’àtera istella de sa mùsica natzionale, Laura Pausini. Sa direta Instagram est istada sighida dae 40.000 personas collegadas in su pròpiu momentu.

In s’istade 2020, a Arriora, at a cantare pro sa prima borta in Sardigna su cantautore e chitarrista americanu Ben Harper.

Tres is datas italianas, totus in su mese de austu: su chimbe a Brescia, a sa Festa de sa Ràdiu Onda d’Urto; s’otu a Taormina , in su Teatru Antigu; su deghe a Arriora in su Parcu de is sonos.

S’artista californianu, classe 1969, est de su 1992 chi s’est incraradu in su mundu de sa mùsica. Su primu album de sutzessu est istadu “Welcome To The Cruel World” – Virgin Records – de su 1994.

Ben Harper , dae tando, non s’est prus frimadu e oe est un’istella de sa mùsica internatzionale.

S’album sighente, “Fight for Your Mind” de su 1995, est cussu in ue est prus forte s’impinnu polìticu suo. In su matessi annu at cantadu pro sa prima borta in Itàlia, in ocasione de s’Arezzo Wave.

Pro is traballos suos at bìnchidu discos de plàtinu meda. S’ùltimu album essidu in su mese de argiolas coladu est intituladu “Uneven Days”.

Is discos suos tenent sónidos de sa mùsica blues, ma sunt puru cundidos dae folk, rock, e reggae.

Rivistas nódidas, comente Rolling Stone e Billboard, ant semper tènnidu pro issu faeddos durches che mele.

Su cantautore americanu – chi tenet sàmbene africanu, cherokee, russu e ebreu – in Arriora at a cantare siat is cantzones noas , siat is betzas giai famadas.

Unu nùmene mannu comente Harper dimustrat ca is artistas balentes sunt sempre prus presentes in su cartellone musicale de s’istade sarda.

Sa band chi dd’at a acumpangiare in cuntzertu at èssere sa “The Innocent Criminals” chi at giai sonadu medas bortas cun su cantautore californianu in su tempus coladu. At puru agiudadu a Harper a iscrìere medas cantzones, comente “Diamonds on the Inside”.

Su grupu musicale nàschidu in is annos ’90 est formadu dae su percussionista Leon Mobley, su bassista Juan Nelson, su baterista Oliver Charles e de su chitarrista Jason Mozersky.

Pro chie est interessadu, is billetes pro s’ispetàculu de Harper – contadu comente su contzertu sardu de s’annu – si podent galu comporare.