James Blunt at a cantare in Sardigna, cust’istade in sa Forte Arena de Santa Margherita de Pula. Su cantautore britànnicu at a artziare in su palcu su 27 de argiolas 2020.

In ocasione de su tour europeu chi l’at bidu esibende·si giai dae su mese coladu in unas cantas printzipales tzitades europeas, arribbat cun unu cuntzertu dae non pèrdere in unu de sos logos prus bellos de s’Ìsula.

Si diat èssere dèpidu esibire tra una pariga de chidas peri a Milanu, Roma e Pàdova ma bidos sos ùrtimos disponimentos de su guvernu pro more de s’epidèmia de su coronavirus, est possìbile chi sos ispetàculos ant a èssere rimandados a un’àtera die galu de atatzare.

Grandu festa su mese de ladàmine coladu pro s’essida de su de ses album suos registradu in istùdiu “Once Upon a Mind” cun s’eticheta Atlantic Records.

Comente Blunt at annuntziadu sa tournèe noa in Europa, sunt istados bèndidos in deretura totus sos billetes pro su cuntzertu de su mese de abrile in su Royal Albert Hall de Londra.

Ma ite b’at in custa essida musicale noa de s’ex militare britànnicu classe 1974?

Siguramente una torrada a su passadu pro s’artista, a pustis de s’isperimentatzione eletrònica de s’album pretzedente.

Su traballu nou “Once Upon A Mind” si cumponet de ùndighi petzos chi caentant su coro e apassionant sa mente de sos amantiosos de mùsica.

Su primu sìngulu “Cold”, sa ballada “Lunsters”, su petzu pop “5 Miles” e “Halfway” tenent unu sonu country, pro un’òpera chi tocat sas cordas de s’ànima, in ue s’intendet su rastu de su carisma de James Blunt.

S’istella internatzionale at publicadu su primu album suo “Back To Bedlam” in su 2004, paris cun su sìngulu “You’re Beautiful” chi est divenidu in pagu tempus unu sutzessu mundiale.

Un’òpera maistra assoluta chi at fatu lòmpere peri s’album a sa punta prus arta de sas classìficas de sas òperas musicales prus bèndidas in totus sos continentes.

In prus, in “Back to Bedlam” b’at peri una dedica personale a s’òpera de Jim Morrison: “So Long, Jimmy”.

Sos billetes pro s’ispetàculu de su cantautore britànnicu si podent giai comporare dae su mese de idas de s’annu coladu in su Box Office Sardigna, Ticketone e in sas butegas autorizadas.

B’at isetu mannu pro su cuntzertu de su sassofonista istadunidensu in tour mundiale a pustis de s’essida de s’album nou e de s’autobiografia sua, at a arribbare a Itàlia pro s’ùnicu cuntzertu cun su cuartetu suo, su 7 de martzu a su Bflat Jazz Club de Casteddu.

B’at una foto in biancu e nieddu chi contat meda mègius de àteras fotografias s’edade de s’oro de su jazz. Est istada tirada dae Arte Kane belle 60 annos a oe, su 12 de austu de su 1958, a sas 10 de mangianu, in unu caminu de Harlem, in New York.

Si iscerant unos cantos pitzinnos e 57 mannos. Mannos de su jazz, dae Charles Mingus a Thelonious Monk. E de cussos mitos de sa mùsica mundiale nd’abbarrant galu in vida feti duos: Sonny Rollins e Benny Golson. Pròpiu Benny “Jazz Legend” Golson, noranta annos fatos, est torradu galu un’àtera bia giòvanu gràtzias a unu discu, Horizon Ahead, e a un’ autobiografia, Whisper Not, in ue torrat a percùrrere sas medas vidas suas de musitzista.

Norant’annos. Galu in fortzas, sighet a sulare su sax tenore cosa sua cun cussu vibradu iscarfangiosu chi torrat prus modde in sas balladas prus romànticas. Durante sa carriera longa sua, Golson at obiadu totus sos prus mannos, dae s’amigu suo dec andu fiat minore John Coltrane – chi frecuentaiant sa matessi classe – a sos medas àteros cun sos cales at cumpartzidu sa mùsica e su palcu: Dizzy Gillespie, Clifford Brown, sos Jazz Messengers de Artes Blakey diveninde·nde su diretore musicale, Arte Farmer cun su cale at fundadu unu delitziosu Jazztet. Totus campiones dignos de istare in sos libros de istòria chi a dolu mannu oe faghet a los iscurtare in sos discos ebbia.

Ma Benny Golson s’agatat galu. Un’artista chi at cumpostu jazz standard famados comente Blues march, Stablemates, I remember Clifford, Whisper not, Along came Betty e Killer Joe, clàssicos chi sos sonadores prus giòvanos sighint semper a improvisare. Mr Golson sighet a biagiare fatu de su mundu e a los interpretare in sos fèstivals internatzionales prus importantes, cun un’elegàntzia naturale e unu sonu de cabbale.

At partetzipadu fintzas a su film “The terminal”, in ue interpretat su jazzista chi su protagonista Tom Hanks chircat a ogna còstitu de nd’otènnere s’autògrafu.