Bìdidas sas limitatziones impostas pro sa pesta de su COVID-19, at a èssere unu cuntzertu de su Primu de Maju diferente meda.

Sos artistas non s’ant a mustrare dae in antis a unu muntone de gente in festa, ma custa borta su pùblicu at a pòdere assistire dae domo. Una direta in biu in su canale televisivu Raitre dae sas 20 a sas 24 conduida dae sa presentadora Ambra Angioini, pro tres bias de sighidu a sa ghia de s’eventu.

B’at chie at a cantare in pitzu de palcos improvisados, chie dae domo in collegamentu internet, ma su chi contat est chi sa mùsica de su cuntzertu de sa Festa de sos Traballadores non si siat firmada.

S’atòbiu dae trint’annos caentat su coro de sos italianos e faghet acudire una truma de giòvanos e prus pagu giòvanos in sa Capitale de Itàlia.

S’eventu de una de sas tres siglas sindacales prus importante ocannu, comente a semper, at a bantare sa presèntzia sos nùmenes prus fentomandos de sa mùsica natzionale.

Tres sos artistas de bàlia: Vasco Rossi, Zucchero e Gianna Nannini. Segundu su chi s’est pòdidu ischire, su cantante de Zocca non diat dèpere cantare ma at a saludare ebbia su pùblicu dae domo sua e espressare unu pensamentu pro sa situatzione difìtzile chi medas persones sunt bivende in custos meses de apretu. Sas àteras duas istellas de sa mùsica imbetzes ant a regalare a su pùbblicu provas de non pèrdere.

Ant a èssere presentes fintzas Edoardo e Eugenio Bennato, duas garantzias cun unu tràgiu galanu chi ant a fàghere brincare in sos divanos de domo sos telespetadore.

Digna de mentovu sa sa presèntzia de cantantes istimados meda comente a Alex Britti, Nicolò Fabi, Paola Turci, Noemi e Irene Grandi. Poi grupos musicales cun unu repertòriu ricu comente Le Vibrazioni e Lo Stato Sociale. B’at a èssere cantantes diferentes e cun generes musicales diversos, artistas giòvanos famados e àteros chi sunt faghende·si connòschere e apretziare.

Bastat a pensare a Fabrizio Moro, Ermal Meta, Francesco Gabbani e Francesca Michelin. At a èssere interessante dae bìdere duas còpias inèditas Bugo paris cun Nicola Savino, e Rocco Papaleo cun Tosca.

Non prus pagu interessantes ant a èssere sas cantzones regaladas dae Aiello, Cristiano Godano de sos Marlene Kuntz, Dardust Fasma, Fulminacci, Leo Gassmann, Margherita Vicario e s’Orchestra Accademia di Santa Cecilia.

Su cuntzertu inèditu de su Primu de Maju, in prus de èssere trasmìtidu in direta in su canales tres de sa Rai, at a èssere mandadu in cuntemporànea fintzas in sas frecuèntzias de Radio2.

In s’istade 2020, a Arriora, at a cantare pro sa prima borta in Sardigna su cantautore e chitarrista americanu Ben Harper.

Tres is datas italianas, totus in su mese de austu: su chimbe a Brescia, a sa Festa de sa Ràdiu Onda d’Urto; s’otu a Taormina , in su Teatru Antigu; su deghe a Arriora in su Parcu de is sonos.

S’artista californianu, classe 1969, est de su 1992 chi s’est incraradu in su mundu de sa mùsica. Su primu album de sutzessu est istadu “Welcome To The Cruel World” – Virgin Records – de su 1994.

Ben Harper , dae tando, non s’est prus frimadu e oe est un’istella de sa mùsica internatzionale.

S’album sighente, “Fight for Your Mind” de su 1995, est cussu in ue est prus forte s’impinnu polìticu suo. In su matessi annu at cantadu pro sa prima borta in Itàlia, in ocasione de s’Arezzo Wave.

Pro is traballos suos at bìnchidu discos de plàtinu meda. S’ùltimu album essidu in su mese de argiolas coladu est intituladu “Uneven Days”.

Is discos suos tenent sónidos de sa mùsica blues, ma sunt puru cundidos dae folk, rock, e reggae.

Rivistas nódidas, comente Rolling Stone e Billboard, ant semper tènnidu pro issu faeddos durches che mele.

Su cantautore americanu – chi tenet sàmbene africanu, cherokee, russu e ebreu – in Arriora at a cantare siat is cantzones noas , siat is betzas giai famadas.

Unu nùmene mannu comente Harper dimustrat ca is artistas balentes sunt sempre prus presentes in su cartellone musicale de s’istade sarda.

Sa band chi dd’at a acumpangiare in cuntzertu at èssere sa “The Innocent Criminals” chi at giai sonadu medas bortas cun su cantautore californianu in su tempus coladu. At puru agiudadu a Harper a iscrìere medas cantzones, comente “Diamonds on the Inside”.

Su grupu musicale nàschidu in is annos ’90 est formadu dae su percussionista Leon Mobley, su bassista Juan Nelson, su baterista Oliver Charles e de su chitarrista Jason Mozersky.

Pro chie est interessadu, is billetes pro s’ispetàculu de Harper – contadu comente su contzertu sardu de s’annu – si podent galu comporare.