In is ùrtimos tempos est essida a campu una teoria noa chi interessat sa Sardigna e sa pesta de su coronavirus.

Si tratat de una mudadura genètica causada dae sa malàrica chi diat pòdere ilebiare is efetos de su COVID-19 in sa populatzione isulana.

Segundu is duos espertos de su Comitadu tècnicu Sientìficu de sa Regione Sardigna custa est un’ìpòtesi chi tocat a tènnere in contu, ma pro more chi no abarret una teoria ebbia, diant a tocare a fàghere chircas sientìficas cun istùdios aprofundidos subra is persones corpidas dae su virus Corona.

Custu fatu, però, non depet indoire is sardos a trascurare sa perigulosidade de s’epidèmia, cun s’idea de èssere in calicuna manera “protèghidos” dae custa possìbile caraterìstica de su DNA.

Sa Sardigna est una de is regiones italianas chi tenent prus pados malàidos ricoverados e in terapia intensiva. Est comente chi is sardos poderent mègius is atacos de su virus. «Est possìbile chi su sistema immunitàriu nostru – at afirmadu su professore Cucca, chi faghet parte de su Comitadu tècnicu sientìficu de sa Regione – apat isvilupadu cun su tempus una forma particulare chi dd’at permìtidu de rispòndere mègius a sa malàrica».

«Esistent genes chi donant rispostas meda prus valitòrias a livellu anticorpale – sighit su professore chi traballat a s’Universidade de Tàtari – belle su 50% de is sardos presentat custa variante genètica, a s’imbesse, in tzertas logos de s’Europa custas caraterìsticas s’agatant solu in su 0,5 -1% de sa populatzione».

«Custas formas de genes – narat Cucca- semus seguros chi determinant in manera cuncreta non solu una risposta mègius a sa malàrica, ma in generale unu sistema immune prus prontu a rispòndere a totu una sèrie de atacos che a cussu de su covid-19».

Siat Cucca, siat su professore Cappuccinelli, semper de su Comitadu tècnicu sientìficu, pretzisant però chi si tratat de suponimentos chi andant provados cun istùdios mirados, e duncas non nos depent fàghere pensare chi podimus pigare a sa làbia sa mesuras pro atremenare su virus corona. «Sunt ipòtesis interessantes e ammajadoras, ma andant suportadas dae chircas sientìficas sèrias– at concruidu Cappuccinelli- e est dàbile chi in is anàlisis a campiones chi s’ant a fàghere pro su controllu de s’ispàinu de s’epidèmia nos potzant frunire àteros datos chi ant a afortiare custa ipòtesi».

Su Presidente de su Cunsìgiu, Giuseppe Conte, prus de una chida a oe at allargadu a totu su territòriu natzionale is medidas restritivas chi fiant giai istadas aplicadas in sa Regione Lombardia e in is àteras provìntzias de su Nord Itàlia prus corfidas dae s’epidemia a de su Covid-19.

Su presidente de su cunsìgiu at postu sa firma a su decretu su sero de su 9 de martzu, su provedimentu est intradu in vigèntzia sa die sighente at a bàlere finas a su 3 de abrile.

Custu su chi totus sos tzitadinos depent fàghere pro evitare s’ispàinu de sa pesta:

essire dae domo solu pro motivu de traballu, de salude o de netzessidade, custos bisòngios tocat a ddos atestare cun su follu de s’autodecraratzione chi si podet iscarrigare dae sa rete ìnternet o at a pòdere èssere donada dae is fortzas de politzia a su momentu de su controllu. Si si faghet una decraratzione frassa si cumitit unu reatu.

Evitare de s’atobiare cun medas persones in is logos pùblicos o abertos a su pùblicu. In prus si racumandat a totus is betzos o malàidos de patologias crònicas, est a nàrrere chi sufrint de immunudepressione cungènita o achirida, de fàghere a mancu de essire dae domo, francu pro netzessidades urgentes.

Si racumandat a totus de s’ispostare solu si est netzessàriu a beru. A is sugetos cun sintomatologia de infetzione respiratòria e calentura (prus arta de 37,5° C) si racumandadu de s’abarrare in domo, de non tènnere cuntatu cun àtera gente e de mutire su dotore de famìlia.

Totus is chi a cumentzare dae is batòrdighi dies prima de sa data de publicatzione de su Dpcm de s’8 martzu, siant intrados in Itàlia a pustis de èssere istados in zonas a arriscu epidemiològicu, ddu depent fàghere a ischire a su Dipartimentu de preventzione de s’azienda sanitària cumpetente pro territòriu, e fintzas a su dotore de famìlia.

Is persones postas dae su Dipartimentu de preventzione de sa Asl suta bardiamentu sanitàriu e isulamentu fidutziàriu depent abbarrare isulados pro batòrdighi dies, contende dae s’ùrtima essida.

Non depent tènnere nisciunu cuntatu sotziale, non depent cambiare allògiu e non depent biagiare. In prus tenent s’òbrigu de si fàghere agatare dae is autoridades adetas a su controllu in cada momentu de sa die.

Si sa persona suta bardiamentu mustrat is sìntomos de s’influèntzia depet avèrtere deretu su dutore de meighina generale; si depet pònnere sa mascaredda chirùrgica, depet abbarrare a largu de is àteros chi istant in domo cun issu; non depet essire dae s’aposentu suo e de depet poderare sa ghenna cungiada faghende girare s’àrea, in s’ora chi est isetende de nde ddu leare a s’ispidale, si est netzessàriu.