Su traballu est firmadu dae Giacomo Cao (diretore Dimcm, Dipartimentu ingegneria mecànica, chìmica e de sos materiales), Roberto Orrù (dotzente Dimcm), e Marina Luginina (dotoranda de chirca Dimcm).

Sos ispetzialistas formant s’Unidade de chirca de su Cunsòrtziu interuniversitàriu natzionale pro sa sièntzia e tecnologia de sos materiales (Instm). Cun s’iscuadra chi traballat a Casteddu ant collaboradu a sos istùdios e a sa redatzione de su traballu David Grossin, Fabien Brouillet, Geoffroy Chevallier, Carole Thouronb e Christophe Drouet, dotzentes e chircadores de su Tzentru interuniversitàriu de chirca e de ingegneria de sos materiales de s’Universidade “Paul Sabatier” de Tolosa.

Un’àteru esèmpiu profetosu de interatzione transnatzionale cun efetos bonos siat pro sa reputatzione e acreditamentu de s’Universidade de Casteddu, siat in sas fileras aplicativas e in sa didàtica in un’àmbitu in ue serbit intùidu, cumpetèntzias e connoschimentos consolidados. S’artìculu – postu in sa setzione Materials for biology and meighinas – s’intìtulat “First successful stabilization of consolidated Amorphous Calcium Phosphate (ACP) by cold sintering: toward highly-resorbable reactive bioceramics”.

Biomateriales e tèssitu òsseu. “In su campu de sa rigeneratzione òssea est a tènnere a disponimentu biomateriales cun una bona suspidura e reativos capatzos de incarrelare a sa lestra sa neoformatzione de su tessutu òsseu. Fintzas chi sos mecanismos de mineralizatzione òssea non siant galu istados craridos bene bene, sos istùdios in literadura cunsìgiant chi sa formatzione de materiale òsseu nou potzat interessare precursores a base de fosfatu de carche amorfu (Acp). Su traballu nostru – osservat su professore Orrù – s’insertat in custu cuntestu e sa prima borta amus isvilupadu unu protzessu basadu in sa tecnologia de Spark plasma sintering (Sps) chi cunsentit de otènnere su produtu disigiadu. Amus introduidu in intro de s’aparechiatura Sps, sa prima in Itàlia disponìbile in s’ateneu nostru dae su 2003, prùeres de fosfatu de carche amorfu dopato cun iones carbonadu otentas a issoro furriada cale ispentumadu partinde dae una solutzione abbosa cun nitrados de carche e magnèsiu, de-ammòniu idrògenu fosfatu e bicarbonadu de sòdiu. S’isgheladura de sos prùeres de partèntzia pro mèdiu de Sps at cunsentidu de parare fronte a s’instabilidade tèrmica giai connota de custas sustàntzias, permitende cunditziones operativas chi nde preservarent su relativu caràtere de metastabilità”.

S’ismenguamentu de sos tempos de rigeneratzione òssea. “Pro su grustu meu su reconnoschimentu de su traballu e su sèberu de dedicare sa cobertedda a una figura meda rapresentativa de s’istùdiu nostru dae parte de una rivista importante comente su Journal of Materials Chemistry B. Su traballu est un’orgòlliu mannu – at pretzisadu su professore Cao – si còllocat in s’àmbitu de su disafiu chi punnat a otènnere una famìlia noa de cumpostos a base de fosfatu de carche amorfu cun una reatividade sempere prus manna e una capatzidade de biosuspimentu chi cunsentant de minimare meda sos tempos de sos protzessos de rigeneratzione òssea”.

Su diretore de su Dimcm at agiuntu: “Sa faina s’insertat in s’àmbitu de una collaboratzione profetosa tra su dipartimentu nostru e sos collegas de s’Universidade de Tolosa a sa cale at partetzipadu in manera ativa sa dotoranda de natzionalidade russa Marina Luginina chi est pro cunsighire su tìtulu de dotora de chirca in Sièntzias e tecnologias pro s’innovatzione in s’universidade nostra”.

Tres campiones de tres malàidos ricoverados sunt resurtados positivos a su virus.

S’influèntzia est lòmpida in Sardigna e sos primos campiones positivos a su virus de ocannu sunt istados agatados unas cantas die a oe dae su laboratòriu de Virologia Ispetziale de s’Aiensa Ospedaliera Universitària de Tàtari.

Su virus est istadu identificadu in duos malàidos ricoverados in sos repartos de s’Aou de Tàtari e unu in unu malàidu chi s’agatat in un’ispidale gadduresu.

Totus e tres sos campiones – faghet ischire su laboratòriu de Virologia Ispetziale – sunt resurtados positivos a su virus influente de tipu A sutatipu “H1N1 pdm09”. Pro s’ora non sunt istados identificados campiones positivos pro virus influente de tipu A sutatipu H3N2, e de tipu B giai signalados a livellu natzionale.

Su laboratòriu de Virologia Ispetziale, chi faghet parte de s’istrutura cumplessa de Microbiologia e Virologia dirìgida dae su professore Salvatore Rubino, est coordinadu dae sa professora Callina Serra.

«In Sardigna – at naradu Salvatore Rubino, diretore de sa Microbiologia e Virologia de s’Aou de Tàtari – s’istajone influente incumentzat pro su prus unu pagu a trigadiu cunfrontu a s’Itàlia. Finas a immoe, a livellu natzionale, s’istajone influente est istada caraterizada dae una tzirculatzione moderada de sos viros A/H3N2, A/H1N1 pdm09 e B, comente resurtat peri dae s’ùrtimu raportu Influnet pro sa vigilàntzia virològica. In Sardinga sa punta màssima l’amus a tènnere tra ghennàrgiu e metade de freàrgiu».

Sa regorta de sos campiones de analizare benit fata dae sos mèdicos “guardianos”, chi s’agatant in totu su territòriu de sa Sardigna. In prus s’agiunghent sos dotores de sos ispedales regionales.

Pro immoe su prus de sos campiones benit dae sos dotores de sos repartos de sos ispidales. Pretzisamente: Pediatria, Meighina e Terapia intensiva. Sos tres campiones positivos a su virus influente fiant de unu pipiu e de duos adultos.

«Sos campiones clìnicos impreados pro sa chirca de su virus influente o de sos cumponentes suos – ispiegat sa professora Callina Serra de su laboratòriu de Virologia Ispetziale – sunt istados testados cun metòdicas molecolares pro individuare tipu e sutatipu de su virus influente tzirculante. Sos datos otentos benint imbiados ogna chida, pro bia telemàtica, a su Tzentru de coordinamentu natzionale de s’Istitutu Superiore de Sanidade pro compudare s’eficatzidade de sa campagna vatzinale e s’essia de possìbiles mudaduras virales».

A livellu natzionale, sos primos duos campiones positivos a su virus influente sunt: unu de tipu A sutatipu “H1N1 pdm09” e unu de tipu B, lineàgiu Victoria, sunt istados signalados pro mèdiu de su portale InfluNet a s’acabbu de onnisantu.

In su perìudu a in antis de su cumintzu de sa vigilàntzia virològica (chida 46/2019), calicunu laboratòriu de riferimentu ant signaladu casos isolados de infetzione de virus influente in Itàlia. Mescamente, sunt istados cunfirmados tres casos de influèntzia: unu virus B/Victoria identificadu a s’acabbu de cabudanni (chida 39/2019) dae s’Azienda ospedaliera universitària de Parma in una pitzinna de 6 annos; unu virus A (H1N1) pdm09 identificadu a metade de mese de ladàmine (chida 42/2019) in su repartu de Maladias Infetivas de s’ispidale pediàtricu Giovanni XXIII de Bari in una pitzinna de 6 annos; unu virus B/Victoria identificadu a fine de mese de ladàmine (chida 43/2019) a s’IRCCS “Lazzaro Spallanzani” de Roma in unu sugetu de 24 annos contoniadu dae s’istràngiu.